កាលពីថ្ងៃចន្ទ ប្រទេសកូរ៉េខាងជើងបានទាមទារឱ្យសហរដ្ឋអាមេរិកនិងប្រទេសកូរ៉េខាងត្បូងបញ្ឈប់ការធ្វើសមយុទ្ធយោធាទ្រង់ទ្រាយធំ ដោយបានហៅសមយុទ្ធទាំងនេះថាជាការបង្កហេតុដែលអាចនាំឱ្យរដ្ឋាភិបាលកូរ៉េខាងជើងចាត់ «វិធានការតបតខ្លាំងជាងមុន»។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
ក្រសួងការបរទេសកូរ៉េខាងជើងបានបញ្ជាក់នៅក្នុងសេចក្តីថ្លែងការណ៍មួយដែលចេញផ្សាយដោយទីភ្នាក់ងារព័ត៌មាន KCNA របស់ប្រទេសនេះថា៖ «ស្ថានការណ៍នៅលើឧបទ្វីបកូរ៉េនិងនៅក្បែរៗនោះបានចូលដល់ដំណាក់កាលប្រឈមមុខដាក់គ្នាធ្ងន់ធ្ងរនៃអំណាចដើម្បីអំណាចជាថ្មីម្ដងទៀត ដោយសារវិធានការយោធាគ្មានឈប់ឈរនិងមិនបានគិតហ្មត់ចត់របស់សហរដ្ឋអាមេរិកនិងប្រទេសកូរ៉េខាងត្បូង»។
សហរដ្ឋអាមេរិកនិងប្រទេសកូរ៉េខាងត្បូងបានចាប់ផ្តើមធ្វើសមយុទ្ធយោធាផ្លូវអាកាសរួមគ្នាដ៏ធំបំផុតមួយកាលពីថ្ងៃចន្ទ ដោយមានការចូលរួមពីយន្តហោះចម្បាំងរាប់រយគ្រឿងរបស់ប្រទេសទាំងពីរ ដោយធ្វើត្រាប់ឱ្យដូចការវាយប្រហារជាក់ស្ដែងរយៈពេល ២៤ ម៉ោងក្នុងមួយថ្ងៃ។
កងទ័ពជើងអាកាសរបស់សហរដ្ឋអាមេរិកបានបញ្ជាក់ថា សមយុទ្ធដែលមានឈ្មោះថា Vigilant Storm នេះនឹងធ្វើរហូតដល់ថ្ងៃសុក្រខាងមុខ ហើយមានការចូលរួមពីយន្តហោះចម្បាំងប្រមាណ ២៤០ គ្រឿងដែលធ្វើសមយុទ្ធចេញទៅវាយប្រហារចំនួនប្រហែល ១.៦០០ ជើង។
រដ្ឋាភិបាលសហរដ្ឋអាមេរិកនិងរដ្ឋាភិបាលកូរ៉េខាងត្បូងជឿថា រដ្ឋាភិបាលកូរ៉េខាងជើងប្រហែលជាជិតសាកល្បងអាវុធនុយក្លេអ៊ែរជាថ្មីទៀត បន្ទាប់ពីកូរ៉េខាងជើងមិនបានសាកល្បងអាវុធប្រភេទនេះតាំងពីឆ្នាំ ២០១៧ មក ហើយអាមេរិកនិងកូរ៉េខាងត្បូងប្រកាន់យកយុទ្ធសាស្ត្រ «កម្លារារាំង» កូរ៉េខាងជើងតាមរយៈការធ្វើសមយុទ្ធយោធាទ្រង់ទ្រាយធំនានា។
សេចក្តីថ្លែងការណ៍របស់ក្រសួងការបរទេសកូរ៉េខាងជើងនេះបានបញ្ជាក់ថា កូរ៉េខាងជើង «ត្រៀមលក្ខណៈរួចជាស្រេចដើម្បីចាត់វិធានការចាំបាច់ទាំងអស់ដើម្បីការពារអធិបតេយ្យភាព សន្តិសុខប្រជាពលរដ្ឋ និងបូរណភាពទឹកដីរបស់ខ្លួនប្រឆាំងនឹងការគំរាមកំហែងយោធាណាមួយពីខាងក្រៅ»។
សេចក្តីថ្លែងការណ៍នេះបានបន្ថែមថា៖ «ប្រសិនបើសហរដ្ឋអាមេរិកនៅតែបន្តការបង្កហេតុខាងយោធាធ្ងន់ធ្ងរតទៅទៀត សាធារណរដ្ឋប្រជាមានិតប្រជាធិបតេយ្យកូរ៉េនឹងចាត់វិធានការតបតខ្លាំងជាងមុន»៕
