ការបាញ់គ្រាប់មីស៊ីលរបស់ប្រទេសកូរ៉េខាងជើងចេញពីទីក្រុង Sinpo កាលពីព្រឹកថ្ងៃអាទិត្យនេះ បានទទួលការបរាជ័យ។
នាយអគ្គសេនាធិការចម្រុះរបស់ប្រទេសកូរ៉េខាងត្បូង មិនបានផ្ដល់ព័ត៌មានលម្អិតណាមួយអំពីការបាញ់គ្រាប់មីស៊ីលនេះទេ។
ការបាញ់គ្រាប់មីស៊ីលនេះ បានធ្វើឡើងក្នុងរយៈពេលមួយថ្ងៃក្រោយមក បន្ទាប់ពីមានការដើរក្បួនព្យុះយាត្រាយោធាដ៏ធំមួយនៅក្នុងរដ្ឋធានីព្យុងយ៉ាង ប្រទេសកូរ៉េខាងជើង។ ដំណើរព្យុះយាត្រានេះគឺជាផ្នែកមួយនៃការប្រារព្ធពិធីខួបកំណើតដល់បិតាស្ថាបនិកជាតិកូរ៉េខាងជើងលោក Kim Il Sung ដែលបានទទួលមរណភាពកាលពីឆ្នាំ ១៩៩៤។ ដំណើរព្យុះយាត្រានេះក៏ត្រូវបានគេមើលឃើញជាទូទៅថា ជាការបង្ហាញកម្លាំងរបស់រដ្ឋាភិបាលលោក Kim Jong Un ផងដែរ។
រដ្ឋមន្ត្រីក្រសួងការពារជាតិសហរដ្ឋអាមេរិក លោក Jim Mattis បានចេញនូវសេចក្ដីប្រកាសយ៉ាងសង្ខេបមួយថា៖ «លោកប្រធានាធិបតីសហរដ្ឋអាមេរិក Donald Trump និងក្រុមយោធាសហរដ្ឋអាមេរិក បានដឹងអំពីការបាញ់គ្រាប់មីស៊ីល ដែលមិនទទួលបានជោគជ័យរបស់កូរ៉េខាងជើងនេះ។ លោកប្រធានាធិបតីមិនបានបញ្ចេញយោបល់អ្វីបន្ថែមទៀតនោះទេ»។
នៅក្នុងរយៈពេលភ្លាមៗ បន្ទាប់ពីកូរ៉េខាងជើងបានបាញ់គ្រាប់មីស៊ីលនេះ ទីបញ្ជាការសហរដ្ឋអាមេរិកប្រចាំតំបន់ប៉ាស៊ីហ្វិក បានបញ្ជាក់នៅក្នុងសេចក្ដីប្រកាសរបស់ខ្លួនថា គ្រាប់មីស៊ីលនេះបានផ្ទុះស្ទើរតែភ្លាមៗ បន្ទាប់ពីបានបាញ់មក។
សេចក្ដីប្រកាសរបស់ទីបញ្ជាការសហរដ្ឋអាមេរិកប្រចាំតំបន់ប៉ាស៊ីហ្វិក ក៏បានបញ្ជាក់សារជាថ្មីអំពីការប្ដេជ្ញាពេញទំហឹងរបស់រដ្ឋាភិបាលក្រុងវ៉ាស៊ីនតោន នៅក្នុងការធ្វើការយ៉ាងជិតស្និទ្ធជាមួយសម្ព័ន្ធមិត្តរបស់ខ្លួន ជាពិសេសជាមួយនឹងកូរ៉េខាងត្បូង និងជប៉ុន ដើម្បីរក្សាសន្តិសុខឲ្យបានល្អ។
ការបាញ់គ្រាប់មីស៊ីលរបស់កូរ៉េខាងជើងនេះ ក៏ត្រូវបានគេរាយការណ៍ថា មិនមែនជាប្រភេទគ្រាប់ផ្លោងមីស៊ីលឆ្លងទ្វីប ដែលលោក Trump បានព្រមានថានឹងមិនអនុញ្ញាតឲ្យកើតឡើងនោះទេ។ លោក Trump ធ្លាប់បានព្រមានយ៉ាងដូច្នេះ ដោយហេតុថា គ្រាប់ផ្លោងមីស៊ីលឆ្លងទ្វីបនេះប្រសិនបើសាកល្បងបានជោគជ័យ នឹងធ្វើឲ្យកូរ៉េខាងជើងវិវត្តកាន់តែជិតទៅដល់ការសម្រេចបាននូវសមត្ថភាពគ្រាប់ផ្លោងមីស៊ីលនុយក្លេអ៊ែរ ដែលបាញ់បានចម្ងាយឆ្ងាយ ដែលអាចជាការគំរាមកំហែងដោយផ្ទាល់ចំពោះសន្តិសុខជាតិរបស់សហរដ្ឋអាមេរិក៕
