ក្រសួងបរិស្ថានកម្ពុជាប្រកាសថា គុណភាពខ្យល់នៅកម្ពុជាមានស្ថានភាពធម្មតា និងបានអំពាវនាវដល់ប្រជាពលរដ្ឋក្នុងប្រទេសមួយនេះ កុំព្រួយបារម្ភអំពីខ្យល់កខ្វក់ប្រភេទ PM2.5 ដែលកំពុងធ្វើឲ្យប៉ះពាល់ដល់សុខភាពប្រជាជនក្នុងទីក្រុងបាងកក ប្រទេសថៃ។
បើតាមសេចក្តីជូនដំណឹងរបស់ក្រសួងបរិស្ថានកម្ពុជាចេញកាលពីថ្ងៃអាទិត្យបញ្ជាក់ថា ផ្អែកតាមលទ្ធផលត្រួតពិនិត្យគុណភាពខ្យល់ក្នុងរាជធានីភ្នំពេញបង្ហាញថា ស្ថានភាពគុណភាពខ្យល់នៅរាជធានីភ្នំពេញចាប់ពីថ្ងៃទី២៧ ខែមករា ដល់ថ្ងៃទី០២ ខែកុម្ភៈ ឆ្នាំ២០១៩ មានកម្រិតល្អប្រសើរ។
ក្រសួងបរិស្ថានបានបង្ហោះសារលើទំព័រហ្វេសប៊ុករបស់ខ្លួនថា៖
«មន្ត្រីជំនាញក្រសួងបរិស្ថានបានធ្វើការតាមដានជាប្រចាំ និងធ្វើការវាយតម្លៃរៀងរាល់២៤ម៉ោងម្តង ដើម្បីតាមដានគុណភាពខ្យល់។ ក្រសួងបរិស្ថានសូមអំពាវនាវដល់បងប្អូនកុំមានការព្រួយបារម្ភអ្វីឡើយ ហើយក្រសួងនឹងផ្តល់ព័ត៌មានជាប្រចាំ ប្រសិនបើមានបញ្ហាអ្វីមួយគួរកត់សម្គាល់ពាក់ព័ន្ធនឹងគុណភាពខ្យល់នេះ»។
ការចេញសេចក្តីជូនដំណឹងរបស់ក្រសួងបរិស្ថាន ធ្វើឡើងខណៈខ្យល់កខ្វក់ដែលមានឈ្មោះថា PM2.5 កំពុងវាយប្រហារក្នុងទីក្រុងបាងកក និងខេត្តមួយចំនួននៃប្រទេសថៃបណ្តាលឲ្យប៉ះពាល់ដល់សុខភាពប្រជាជន រហូតឈានដល់ការបិទគ្រឹះស្ថានសិក្សាជាច្រើនកន្លែង។
ស្របពេលដែលក្នុងប្រទេសថៃកំពុងរងគ្រោះដោយសារខ្យល់កខ្វក់នេះ គេឃើញនៅតាមបណ្តាញសង្គមហ្វេសប៊ុកនៅកម្ពុជា ក៏មានការចែករំលែកតៗគ្នានូវសារជាសំឡេងមួយ ដែលបុរសម្នាក់បាននិយាយថា ខ្លួនបានឮមន្រ្តីក្រសួងសុខាភិបាលលើកឡើងអំពីខ្យល់កខ្វក់នេះ ថាកំពុងកើតមាននៅរាជធានីភ្នំពេញ។
ពាក់ព័ន្ធនឹងសារនេះ លោក នេត្រ ភក្រ្តា រដ្ឋលេខាធិការនិងជាអ្នកនាំពាក្យក្រសួងបរិស្ថាន ប្រាប់ VOA កាលពីយប់ថ្ងៃសៅរ៍ថា រាល់ព័ត៌មានពាក់ព័ន្ធនឹងខ្យល់កខ្វក់ទាំងឡាយណាដែលមិនចេញដោយក្រសួងបរិស្ថាន គឺមិនមែនជាព័ត៌មានផ្លូវការនោះទេ។ លោកបន្ថែមថា ក្រសួងបរិស្ថាននឹងធ្វើសេចក្តីជូនដំណឹងដល់ប្រជាពលរដ្ឋ ប្រសិនបើមានករណីមានប៉ះពាល់ពីខ្យល់កខ្វក់នោះ។
លោកបញ្ជាក់ថា៖
«ចំពោះព័ត៌មានទាំងឡាយណាដែលមិនបានចេញពីក្រសួងបរិស្ថាន ដែលធ្វើការត្រួតពិនិត្យទៅលើប្រព័ន្ធខ្យល់នៅក្នុងប្រទេសកម្ពុជានេះ គឺមិនមែនជាព័ត៌មានផ្លូវការទេ។ អញ្ចឹងគឺក្រសួងបរិស្ថាននឹងធ្វើការជូនដំណឹង នៅពេលដែលយើងយល់ថា វាដល់ភាព ដល់ពេលដែល ឬមួយក៏មានការប៉ះពាល់ណាមួយនោះ។ ក៏ប៉ុន្តែរហូតមកដល់ពេលនេះ ដូចអ្វីដែលខ្ញុំបានបញ្ជាក់អញ្ចឹង គឺមិនទាន់មានបញ្ហានោះឡើយ»។
លោក នេត្រ ភក្រ្តា បន្ថែមថា៖
«កម្រិតរបស់វាគឺរហូតទៅដល់គេមានសន្ទស្សន៍របស់គេ គេមានឧបករណ៍នៅក្នុងការពិនិត្យមើលខ្យល់ ទំហំខ្យល់ហ្នឹង ថាតើវាមានភាគល្អិតយ៉ាងម៉េចខ្លះ? ភាគល្អិតហ្នឹងច្រើន ឬមួយក៏តិច? ហើយឥឡូវនេះនៅក្នុងរាជធានីភ្នំពេញ ភាគល្អិតរបស់វានៅក្រោម៥០ទេ គឺចន្លោះពី២០-៣០ទេ។ ក៏ប៉ុន្តែចំណុចដែលត្រូវប្រកាសអាសន្នហ្នឹង គឺកម្រិតពី៣០០ ទៅ៤០០អីឯណោះ។ អញ្ចឹងសម្រាប់ប្រទេសកម្ពុជាយើងគឺនៅក្រោម៥០ គឺនៅក្រោមស្តង់ដារនៅឡើយទេ»។
VOA បានព្យាយាមសុំការអត្ថាធិប្បាយពីលោក លី សូវ៉ាន់ អ្នកនាំពាក្យក្រសួងសុខាភិបាល តែរហូតមកដល់ល្ងាចថ្ងៃចន្ទនេះ មិនមានការឆ្លើយតបនៅឡើយ។
PM2.5 គឺជាភាគល្អិតនិចលតូចៗនៅក្នុងខ្យល់ ដែលមានអង្កត់ផ្ចិតតូចជាង២,៥មីក្រុង។ ភាគល្អិតនេះមានប្រភពមកពីការដុតឥន្ធនៈផូស៊ីល និងកម្ទេចធូលីផ្សេងៗទៀត ហើយភាគល្អិតនេះអាចស្រូបចូលទៅដល់សួត និងពេលខ្លះដល់សរសៃឈាម ដែលអាចបង្កការប៉ះពាល់ដល់សុខភាពមនុស្ស ប្រសិនបើការស្រូបចូលលើសកម្រិត។
កាលពីសប្តាហ៍មុន ស្ថានទូតកម្ពុជាប្រចាំប្រទេសថៃក៏បានអំពាវនាវឲ្យប្រជាពលរដ្ឋខ្មែរដែលកំពុងស្ថិតក្នុងប្រទេសថៃទាំងអស់ ត្រូវប្រុងប្រយ័ត្នខ្ពស់ និងពាក់ម៉ាស់ប្រភេទ N95 ដើម្បីការពារខ្យល់កខ្វក់ប្រភេទ PM2.5 ដែលកំពុងធ្វើឲ្យប៉ះពាល់ដល់សុខភាពក្នុងប្រទេសក្បែរខាងមួយនេះផងដែរ៕
