នៅថ្ងៃចន្ទនេះ រដ្ឋមន្ត្រីការពារប្រទេសសហរដ្ឋអាមេរិកលោក Mark Esper បានធានាចំពោះប្រទេសអាហ្វហ្គានីស្ថានកុំឲ្យយល់ច្រឡំថា ការដកកងទ័ពរបស់សហរដ្ឋអាមេរិកភ្លាមៗស្ទើរតែទាំងអស់ចេញពីផ្នែកនានានៃប្រទេសស៊ីរីថាជាអ្វីដែលសហរដ្ឋអាមេរិកនឹងធ្វើស្រដៀងគ្នានេះដែរនៅក្នុងប្រទេសអាហ្វហ្គានីស្ថាននោះ។
ដោយថ្លែងនៅឯទីស្នាក់ការបេសកកម្មគាំទ្រប្ដូរផ្ដាច់របស់អង្គការអូតង់នៅក្នុងទីក្រុងកាប៊ុល ប្រទសអាហ្វហ្គានីស្ថាន លោក Esper បាននិយាយថា សហរដ្ឋអាមេរិកនៅតែរក្សា «ការប្ដេជ្ញាជាយូរមកហើយ» របស់ខ្លួនចំពោះប្រទេសអាហ្វហ្គានីស្ថាន។
លោក Esper ថ្លែងដូច្នេះថា៖ «ប្រទេសអាហ្វហ្គានីស្ថានដែលជាសម្ព័ន្ធមិត្តរបស់សហរដ្ឋអាមេរិក និងប្រទេសដទៃទៀតគួរតែទុកចិត្តចំពោះរឿងនេះ ហើយសូមកុំយល់ច្រឡំចំពោះសកម្មភាពរបស់សហរដ្ឋអាមេរិកនៅក្នុងសប្ដាហ៍ថ្មីៗនេះទាក់ទិននឹងប្រទេសស៊ីរី ដោយសារតែសហរដ្ឋអាមេរិកនឹងមិនធ្វើរឿងដូចនេះចំពោះប្រទេសអាហ្វហ្គានីស្ថាននោះទេ»។
ដោយសង្កត់ធ្ងន់អំពីឆន្ទៈរបស់សហរដ្ឋអាមេរិកនៅក្នុងការដាក់ទាហានឈរជើងក្នុងប្រទេសអាហ្វហ្គានីស្ថាន លោក Esper បាននិយាយថា សហរដ្ឋអាមេរិកនៅប្រឈមនឹងការគំរាមកំហែងដែលដំបូងចេញពីពួកអាល់កៃដា ហើយឥឡូវនេះចេញពីពួកតាលីបង់ ក្រុមភេរវកម្មនៅអាហ្វហ្គានីស្ថានដែលមានទំនោររកពួកជ្រុលនិយមរដ្ឋឥស្លាម និងក្រុមផ្សេងៗទៀត។
ការចរចាសន្តិភាពដែលជាប់គាំងជាមួយនឹងពួកតាលីបង់ និងការវាយប្រហារហិង្សាកំពុងបន្តរបស់ពួកបះបោរ និងពួកយុទ្ធជនរដ្ឋឥស្លាម បានធ្វើឲ្យមានភាពស្មុគស្មាញដល់ការសន្យារបស់រដ្ឋបាល ប្រធានាធិបតីសហរដ្ឋអាមេរិកលោក Donald Trump នៅក្នុងការដកទាហានអាមេរិកាំងជាង ៥ ពាន់នាក់ចេញពីប្រទេសអាហ្វហ្គានីស្ថាន។
ទាហានអាមេរិកាំងប្រហែល ១ ម៉ឺន ៤ ពាន់នាក់ នាពេលបច្ចុប្បន្ននេះកំពុងឈរជើងនៅក្នុងប្រទេសអាហ្វហ្គានីស្ថាន ដើម្បីបណ្ដុះបណ្ដាល និងផ្ដល់ប្រឹក្សាដល់ទាហានអាហ្វហ្គានីស្ថាន និងដើម្បីធ្វើប្រតិបត្តិការប្រឆាំងនឹងពួកជ្រុលនិយមនានា។
ការធ្វើដំណើរទៅដល់ទីក្រុងកាប៊ុលរបស់លោក Esper បានធ្វើឡើងនៅចំពេលដែលថ្នាក់ដឹកនាំរដ្ឋាភិបាលអាហ្វហ្គានីស្ថានពន្យារពេលការប្រកាសដែលគ្រោងនឹងធ្វើឡើងអំពីលទ្ធផលបឋមនៃការបោះឆ្នោតប្រធានាធិបតីកាលពីខែមុន៕