ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នក​ការទូត​​ថា មិន​ទាន់​មាន​កិច្ច​ព្រមព្រៀង​​ស្តី​ពី​​ថវិកា​សម្រាប់​បេសកកម្ម​ថែរក្សា​សន្តិភាព​របស់​អង្គការ​សហប្រជាជាតិ​ទេ


រូបឯកសារ៖ នៅ​ក្នុង​រូបថត​ដែល​បានថត​កាល​ពី​ថ្ងៃទី២២ ខែកុម្ភៈ ឆ្នាំ២០១៧ នេះ បង្ហាញ​ពី​មួក​ខៀវ​របស់​កងកម្លាំង​រក្សា​សន្ដិភាព​អង្គការ​សហប្រជាជាតិ​​ដែល​ត្រូវ​បាន​ដាក់នៅ​លើ​កាំភ្លើង​មួយ​ដើម​ ក្រុង Port-au-Prince ប្រទេស​ហៃទី។

មន្ត្រី​ការ​ទូត​មួយ​ចំនួន​និយាយ​កាលពី​ថ្ងៃ​ចន្ទកន្លង​មក​នេះ​ថា រដ្ឋ​ជា​សមាជិក​ចំនួន១៩៣ប្រទេស​របស់​អង្គការ​សហប្រជាជាតិ​រហូត​មក​ដល់​ពេល​នេះ​មិន​បាន​សម្រេច​កិច្ច​ព្រមព្រៀង​មួយ​ស្តី​ពី​ថវិកា​សម្រាប់​បេសកកម្ម​ថែរក្សា​សន្តិភាពរបស់​អង្គការ​សហប្រជាជាតិ​សម្រាប់​ឆ្នាំ​ថ្មី​ដែលនឹង​ត្រូវ​ចាប់​ផ្តើម​នៅ​ថ្ងៃ​ទី១ ខែ​កក្កដា​ខាង​មុខ​នេះ ​ដែល​ការណ៍​នេះ​អាច​នាំ​ទៅដល់​ការ​ធ្វើ​ឲ្យកក​ស្ទះនូវ​រាល់បេសកកម្មថែរក្សា​សន្តិភាព​ទាំង​អស់​ ប្រសិន​បើមិន​មាន​កិច្ច​ព្រមព្រៀង​ណា​មួយក្នុង​ពេល​ឆាប់ៗ​ខាង​មុខ​នេះ​នោះ​ទេ។ នេះ​បើ​តាម​ការ​ចេញ​ផ្សាយ​របស់​ទី​ភ្នាក់​ងារ​ព័ត៌មានAFP។

ប្រភព​មួយ​ចំនួន​លើក​ឡើង​ថា ការ​រាំងស្ទះ​នោះ​កើត​មាន​ឡើង​ដោយ​សារប្រទេស​ចិន និង​ប្រទេស​មួយ​ចំនួនក្នុង​ទ្វីប​អាហ្វ្រិក​បានដាក់​សំណើ​ជា​ច្រើន​នៅ​ដំណាក់​កាល​ចុង​ក្រោយ។

ថវិកា​សម្រាប់​បេសកកម្មថែរក្សា​អង្គការ​សហប្រជាជាតិ ដែល​មាន​ចំនួន​ប្រមាណ​២០​បេសកកម្ម​នៅ​ទូទាំង​ពិភព​លោក និង​មាន​បុគ្គលិក​មួកខៀវ​របស់​អង្គការ​សហប្រជាជាតិ​ប្រមាណ​ជិត​១​ម៉ឺន​នាក់​នោះ មាន​ទឹក​ប្រាក់​ប្រមាណ៦ពាន់​៥០០លាន​ដុល្លារ​ ដែល​មាន​រយៈ​ពេល​១២​ខែ​ ​នឹង​ត្រូវ​ចាប់​ផ្តើម​នៅ​ថ្ងៃ​ទី១ ខែ​កក្កដា​ជា​រៀង​រាល់ឆ្នាំ។

អគ្គលេខាធិការ​រង​អង្គការ​សហប្រជាជាតិ​លោក Jean-Pierre Lacroix បាន​ប្រាប់​សន្និសីទ​សារព័ត៌មាន​តាម​ប្រព័ន្ធ​វីដេអូអនឡាញ​ថា ការ​ចរចា​ស្តី​ពី​ថវិកា​កាល​ពី​ឆ្នាំ​ទៅ​ក៏​ជួប​ការ​លំបាក​ខ្លាំង​ដែរ​ ប៉ុន្តែការ​ពិភាក្សា​គ្នា​ពេល​នោះ​បាន​សម្រេច​នូវ​កិច្ចព្រមព្រៀង​មួយនៅ​ថ្ងៃ​ទី​២៣​ ខែ​មិថុនា​ ឆ្នាំ​២០២០គឺ​មួយ​សប្តាហ៍មុន​ការ​បរិច្ឆេទ​ផុត​កំណត់​ចូលមក​ដល់។

លោក​មាន​ប្រសាសន៍​បន្ត​ថា សម្រាប់​ឆ្នាំ​នេះ «ហានិភ័យគឺ​ថាអាចកើត​មាន​មួយ​រយៈ​ពេល​ ទម្រាំកញ្ចប់​ថវិកា​នឹង​ត្រូវបាន​អនុម័ត​ដោយ​សម័យ​ប្រជុំរបស់​អង្គការ​សហប្រជាជាតិ ហើយ​បេសកកម្ម​របស់​យើង​ នឹង​រឹត​បន្តឹង​ទៅ​លើ​ការ​ចំណាយ​ផ្សេងៗ​ដោយ​ផ្តោត​ការ​ចំណាយលើ​តែ​ការ​ការពារ​របស់​បុគ្គលិក​យើង​តែ​ប៉ុណ្ណោះ៕

XS
SM
MD
LG