ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មន្រ្តី​ គ.ជ.ប៖ ​ស្ថាប័ន​មិន​មាន​សមត្ថកិច្ច​ស៊ើប​អង្កេត​ការ​ចល័ត​​ទាហាន​មក​ចុះ​ឈ្មោះ​បោះ​ឆ្នោត


លោក សោម សូរីដា អគ្គលេខាធិការរងស្ថាប័នបោះឆ្នោត គ.ជ.ប ថ្លែងក្នុងសន្និសីទសារព័ត៌មាន នៅថ្ងៃទី៣១ ខែធ្នូ ឆ្នាំ២០២០។ (ស៊ុន ណារិន/វីអូអេ)

មន្រ្តី​ជាន់​ខ្ពស់​នៃ​គណៈ​កម្មាធិការ​ជាតិ​រៀបចំ​ការ​បោះ​ឆ្នោត​ (គ.ជ.ប) បាន​ថ្លែង​ថា ​មន្រ្តី​ចុះ​ឈ្មោះ​បោះ​ឆ្នោត​នៅ​តាម​មូលដ្ឋាន​ឃុំ​សង្កាត់ ​មិន​មាន​សមត្ថកិច្ច​ក្នុង​ការ​សួរ​នាំ​អំពី​ការ​ចល័ត​ទាហាន ​មក​ចុះ​ឈ្មោះ​បោះ​ឆ្នោត​នោះ​ទេ ខណៈ​មាន​ការ​ចោទ​ប្រកាន់​ពី​គណបក្ស​នយោបាយ​ថា​ មាន​ការ​ចុះ​ឈ្មោះ​មនុស្ស​ដើម្បី​បង្កើន​សំឡេង​គាំទ្រ​នៅ​តំបន់​ជាក់​លាក់​មួយ​ចំនួន។

ក្នុង​សន្និសីទ​សារព័ត៌មាន​បិទ​បញ្ចប់​បញ្ជី​ឈ្មោះ​បោះ​ឆ្នោត​សម្រាប់​ឆ្នាំ​ ២០២០ នា​ថ្ងៃ​ព្រហស្បតិ៍នេះ លោក សោម សូរីដា អគ្គលេខាធិការ​រង​នៃ​ គ.ជ.ប បាន​ថ្លែង​ថា ​ករណី​ទាហាន​ចុះ​ឈ្មោះ​បោះ​ឆ្នោត​ជា​ក្រុម​នៅក្នុង​ឃុំ​សង្កាត់​ណា​មួយ​ មិន​មែន​ជា​សមត្ថកិច្ច​របស់ ​គ.ជ.ប ក្នុង​ការ​ស៊ើប​អង្កេត និង​សួរ​នាំ​អំពី​មូល​ហេតុ​ដែល​ពួកគេ​ផ្លាស់​មក​ចុះ​ឈ្មោះ​នៅ​តំបន់​នោះ​ទេ។ លោក​បន្ថែម​ថា ​គ.ជ.ប ក៏​មិន​ដឹង​ថា​ទាហាន​ប៉ុន្មាន​នាក់​ដែល​ត្រូវ​បាន​ចាត់​ចែង​សម្រាប់​ការពារ​នៅ​តំបន់​ ដែល​ពួក​គេចុះ​ឈ្មោះ​បោះ​ឆ្នោត​ដែរ។​

លោក​មាន​ប្រសាសន៍​ឆ្លើយ​តប​នឹង​សំណួរ​បស់​ VOA ​ថា​៖ «កង​ទ័ព​ដែល​មាន​ទីតាំង​នៅ​ក្នុង​កន្លែង​ណា​មួយ​នៃ​បន្ទាយ​ទាហាន​ណា​មួយ​នៃ​ឃុំ​សង្កាត់​ណា​មួយ ក៏​ត្រូវ​ចាំ​បាច់​បំពេញ​គ្រប់​លក្ខខណ្ឌ ​ទើប​ក្រុម​ចុះ​ឈ្មោះ​បោះ​ឆ្នោត អាច​ចុះ​ឈ្មោះ​ឲ្យ​បាន។ ប៉ុន្តែ​ហេតុ​ផល ហេតុ​អី​បាន​ជា​ចល័ត​បែប​ណា បែប​ណា​នោះ វា​មិន​មែន​ជា​សមត្ថកិច្ច​របស់ ​គ.ជ.ប​ ទេ​»។

លោក​បន្ថែម​ថា៖ «អញ្ចឹង​តាម​ការ​ប្តឹង​កន្លង​មក​នេះ គឺ​យើង​មើល​ឃើញ​ថា ​គឺ​ជា​ការ​អះអាង​ដោយមនុស្ស​ម្នាក់ ភ្នាក់ងារ​គណបក្ស​ម្នាក់ឬ​ក៏​មួយ​ក្រុម ទៅ​លើប្រជាពលរដ្ឋ​ដែល​បាន​បំពេញ​គ្រប់​លក្ខខណ្ឌ​ទៅ​លើ​ការ​ចុះ​ឈ្មោះ​បោះ​ឆ្នោត»។ អញ្ចឹង​ករណី​នេះ យើង​អាច​ទទួល​យក​បាន​ទេ?»

ក្នុង​សន្និសីទ​សារព័ត៌មាន​មួយ​កាល​ពី​ថ្ងៃ​ពុធ​ លោក អ៊ី សាំង​ឡេង អនុ​ប្រធាន​គណបក្ស​សម្ព័ន្ធ​ដើម្បី​ប្រជាធិប​តេយ្យ ​(LDP)​ បាន​លើក​ឡើង​ថា​ មាន​ការ​ចល័ត​មនុស្ស​មក​ចុះ​ឈ្មោះ​បោះ​ឆ្នោត​ក្នុង​ឃុំ​សង្កាត់​មួយ​ចំនួន កាល​ពី​ខែ​តុលា ដែល​លោក​ថា ​មាន​ចេតនា​កេង​ចំណេញ​សំឡេង​ឆ្នោត​។

លោក​ថ្លែង​ថា​ គណបក្សមាន ​«ភស្តុតាង​ច្បាស់​លាស់​» ដែល​បញ្ជាក់​ថា​ពិត​ជា​មាន​មនុស្ស​ជាង​ ៣ ​ពាន់​នាក់​ ដែល​មិន​មែន​ជា​អ្នក​រស់​នៅ​ក្នុង​ឃុំ​សង្កាត់ ប៉ុន្តែ​ពួកគេ​អាច​ចុះ​ឈ្មោះ​បោះ​ឆ្នោត​បាន។ លោក​បន្ថែម​ថា ការ​រក​ឃើញ​នេះ​មិន​មែន​ជា​ការ​ប្តូរលំនៅ​ដ្ឋាន​ធម្មតា​របស់​ប្រជា​ពលរដ្ឋ​នោះ​ទេ គឺ​ក្នុង​គោល​បំណង​ធានា​ចំនួន​មនុស្ស​បោះ​ឆ្នោត​ឲ្យ​គណ​បក្ស​ណា​មួយ។

លោក​មាន​ប្រសាសន៍​ថា៖ «យើង​សម្រេច​ចិត្ត​ប្តឹង​ទីមួយ ​វា​ប៉ះពាល់​ខ្លាំង​ដល់​លទ្ធផល​បោះ​ឆ្នោត។ ទីពីរ​រឿង​ហ្នឹង វា​ខុស​[ច្បាប់]​មែន។ វា​ខុស​មែន វា​ខុស​ម៉េច? គឺ​ជា​ការ​លួច​បន្លំ​ឆន្ទៈ​របស់​ប្រជាពលរដ្ឋក្នុង​មូលដ្ឋាន​ខ្លាំង​ណាស់។ បើ​បោះ​ឆ្នោត​ឃុំ​សង្កាត់ ប្រជាពលរដ្ឋ​ចង់​រើស​មេឃុំ​នេះ បែរ​ទៅ​ជាប់​មេឃុំ​នោះ។ បើ​បោះ​ឆ្នោត​ថ្នាក់​ជាតិ ប្រជា​ពលរដ្ឋ​សំឡេង​ភាគ​ច្រើន​គាំទ្រ​តំណាង​រាស្រ្ត​គណបក្ស​នេះ បែរ​ជា​គណ​បក្ស​នេះ​ច្រើន​ជាង​យើង​វិញ​ទៅ»។

ក្រុម​ការងារ​របស់​គណបក្ស​ LDP ​ក៏​បាន​បង្ហាញ​ទាំង​រូបភាព និង​វីដេអូ​ដែល​ពួកគេ​ថតបាន ទាក់ទង​នឹង​ភាព​មិន​ប្រក្រតី​នៃ​ការ​ចុះ​ឈ្មោះ​បោះ​ឆ្នោត​អ្នក​ដែល​មិន​មាន​លំនៅឋាន​ក្នុង​ឃុំ​សង្កាត់។

កាល​ពី​ខែ​មេសា ឆ្នាំ​២០១៨ គឺ​មុន​ការ​បោះ​ឆ្នោត​ថ្នាក់​ជាតិ VOA ​បាន​ស៊ើបអង្កេត​ការ​ចុះ​ឈ្មោះ​បោះ​ឆ្នោត​មួយ​ដោយ​រក​ឃើញ​អំពី​ការ​នាំ​ទាហាន និង​គ្រួសារ​របស់​ទាហាន មក​ចុះ​ឈ្មោះ​បោះ​ឆ្នោត​នៅ​ក្នុង​ឃុំ​ត្រាំ​សសរ ស្រុក​ស្រីស្នំ ខេត្ត​សៀមរាប។ មេប៉ុស្តិ៍​ឃុំត្រាំសសរ​បាន​បញ្ជាក់​អាសយដ្ឋាន​របស់​ទាហាន​ជាង ​២០០ ​នាក់​កាល​នោះ ដើម្បី​ពួកគេ​អាច​បោះ​ឆ្នោត​នៅ​ទី​នោះ​បាន ហើយ​ការ​ដែលពួកគេ​ចុះ​ឈ្មោះ​បោះ​ឆ្នោត​នៅ​ឃុំ​នោះ​ប៉ូលិស​ថា​ ដើម្បី​ត្រៀម​«​ការពារ​ការ​បោះ​ឆ្នោត»។

លោក កន សាវាង្ស អ្នក​សម្រប​សម្រួល​ផ្នែក​អង្កេត​នៃ​អង្គការ​ខុម​ហ្វ្រែល ​ដែល​ឃ្លាំ​មើល​ការ​បោះ​ឆ្នោត មាន​ប្រសា​សន៍​ថា​កន្លង​ទៅ ក៏​មាន​ការ​ចុះ​ឈ្មោះ​កង​កម្លាំង​ដែល​ត្រូវ​បាន​អាជ្ញាធរ​ចាត់​ចែង​សម្រាប់​ការពារ​នៅ​ពេល​បោះ​ឆ្នោត ដែល​ពួកគេ​ត្រូវ​ចុះ​ឈ្មោះ​បោះ​ឆ្នោត​នៅ​តំបន់​ជិត​បំផុត ដើម្បី​អាច​ចូលរួម​បោះ​ឆ្នោត​បាន​ងាយ​ស្រួល​។ លោក​ជំរុញ​ឲ្យ​មាន​ការ​ធានា​ថា ​កុំ​ឲ្យ​មាន​ឈ្មោះ​បោះ​ឆ្នោត​ពីរ​កន្លែង ប្រសិន​បើ​មាន​ការ​ប្តូរ​ទីលំនៅ​ឋាន ហើយ​ត្រូវ​បញ្ជាក់​ហេតុ​ផល​សម​រម្យ​សម្រាប់​កង​កម្លាំង​ដែល​ជា​អ្នក​ការ​ពារ​នៅ​តំបន់​នោះ ដើម្បី​កុំ​ឲ្យ​គណបក្ស​នយោបាយ​យល់​ច្រឡំ។

លោក​បញ្ជាក់​ថា៖ «ក៏​ប៉ុន្តែ​បើ​សិន​ជា​ហេតុ​ផល​ទាំង​នេះ​មិន​មាន​ទេ ហើយ​រក​ឃើញ​ថាអ្នក​ទាំង​អស់​ហ្នឹង គឺ​ជា​ហេតុ​ផល​នយោបាយមួយ ដែល​មិន​មែនជា​អ្នកមក​ស្នាក់​នៅ នៅ​ហ្នឹង​ផង ហើយ​ពុំមែន​ជា​អ្នក​សន្តិ​សុខ​ការ​ពារ​ផង ហើយ​អាច​ទៅ​បោះ​ឆ្នោត​នៅ​ហ្នឹង អាហ្នឹង​ជា​បញ្ហា​នយោបាយ​មួយ ដែល​ គ.ជ.ប ត្រូវ​តែ​ពិនិត្យ​មើល»។

លោក សោម សូរីដា អគ្គលេខាធិការ​រង​នៃ គ.ជ.ប បាន​ឲ្យ​ដឹង​ថា​ឈ្មោះ​ស្ទួន​ចំនួន ​៣.៧៤៥ ​នាក់ ក្នុង​នោះ​មាន​ស្រ្តី​ប្រមាណ ​១.៧០០ ​នាក់ ត្រូវ​បាន​លុប​ចោល​សម្រាប់​បញ្ជី​ឈ្មោះ​បោះ​ឆ្នោត​ឆ្នាំ ​២០២០​នេះ។ ចំណែក​ឈ្មោះ​មនុស្ស​ប្រមាណ ​១៥ ​ម៉ឺន ​៤ ​ពាន់​នាក់ ត្រូវ​បាន​លុប​ចោល​ចេញ​ពី​បញ្ជី ក្រោម​ហេតុ​ផលស្លាប់​ជា​អ្នក​ផ្លាស់​ចេញ ចុះ​ឈ្មោះ​លើស​ពី​មួយកន្លែង ​(ឈ្មោះ​ស្ទួន) និង​អ្នក​ត្រូវ​ដក​ហូត​សិទ្ធិបោះ​ឆ្នោត។

លោក សោម សូរីដា មាន​ប្រសាសន៍​ថា​ ប្រសិន​បើប្រជាពលរដ្ឋ​ផ្លាស់​ចេញ ហើយ​មិនបាន​ចុះ​ឈ្មោះ​បោះ​ឆ្នោតនៅ​ឃុំ​សង្កាត់​ណា​ថ្មី​ទេ នោះ​ឈ្មោះ​របស់​ពួកគេ​ត្រូវ​រក្សា​ទុក​ដដែល គឺ​មិន​លុប​ចោល​នោះ​ទេ។

លោក​បញ្ជាក់​ថា៖ «ប៉ុន្តែ​បើ​សិន​ជា​គាត់​ទៅ​ចុះ​ឈ្មោះ​នៅ​ក្នុង​ឃុំ​សង្កាត់​ណា​មួយ​ហើយ ហើយ​គាត់​មិន​ទាន់​លុប​ឈ្មោះ​ចេញ​ពី​ឃុំសង្កាត់​ផ្សេង ករណី​នេះគឺ​ជា​ករណី​គាត់​អត់​រាយការណ៍។ ហើយ​ប្រព័ន្ធ​បញ្ជី​ឈ្មោះ​បោះ​ឆ្នោត យើង​អាច​ឆែក​ដឹង​ថា​បុគ្គល​នោះ​ស្ទួន»។

បើ​តាម​ គ.ជ.ប អ្នក​ចុះ​ឈ្មោះ​បោះ​ឆ្នោត​ថ្មី មាន​ជាង​ ២០ ​ម៉ឺន​នាក់ ហើយ​ចំនួន​មនុស្ស​ក្នុង​បញ្ជី​ឈ្មោះ​បោះ​ឆ្នោត រហូត​ដល់​ពេល​នេះ មាន​ចំនួន ​៨,៨​ លាន​នាក់។

គ.ជ.ប ក៏​ឲ្យ​ដឹង​ថា ខ្លួន​បាន​ទទួល​ពាក្យ​បណ្តឹង​ប្រមាណ ​១៤០ ដែល​ភាគ​ច្រើន​លើស​លប់​ជា​ពាក្យ​បណ្តឹង​របស់​គណបក្ស​សម្ព័ន្ធ​ដើម្បី​ប្រជាធិបតេយ្យ។

លោក ទេព នីថា អគ្គលេខាធិការ​របស់ ​គ.ជ.ប មាន​ប្រសាសន៍​ថា​ គ.ជ.ប បាន​យក​ចិត្ត​ទុក​ដាក់​ដោះ​ស្រាយ​ពាក្យ​បណ្តឹង​និង​ធ្វើ​ទៅ​តាម​ច្បាប់​ដែល​មាន​។

លោក​មាន​ប្រសាសន៍​ថា៖ «ហើយ​ការ​ដោះ​ស្រាយ​នៅ ​គ.ជ.ប នេះ គឺ​យើង​បាន​យក​ចិត្ត​ទុក​ដាក់​យ៉ាង​ហ្មត់​ចត់។ អាច​ថា​វាត្រឹម​ត្រូវ​កម្រិត​ណា​នោះ យើង​ឃើញ​ថា​ ការ​សម្រេច​របស់​ក្រុម​ប្រឹក្សា​ធម្មនុញ្ញ​នោះ គឺ​បាន​តម្កល់​សេចក្តី​សម្រេចរបស់ ​គ.ជ.ប​»។

គ.ជ.ប បាន​ឲ្យ​ដឹង​ថា ប្រជាពលរដ្ឋដែល​ខក​ខាន​មិន​បាន​មក​ចុះ​ឈ្មោះ​បោះ​ឆ្នោត​ក្នុង​ឆ្នាំ ​២០២០​ នេះ អាច​ទៅ​ចុះ​ឈ្មោះ​ក្នុងឆ្នាំ​ ២០២១ និង​ឆ្នាំ ​២០២២​ បន្ត​ទៀត៕

XS
SM
MD
LG