សហជីពបុគ្គលិកសិក្សាធិការសាកលវិទ្យាល័យ (ASUU) នៅក្នុងប្រទេសនីហ្សេរីយ៉ា បានប្រកាសផ្អាកកូដកម្មនៅក្នុងសេចក្តីថ្លែងការណ៍មួយកាលពីថ្ងៃទី១៤ ខែតុលាកន្លងទៅនេះ បន្ទាប់ពីមានកិច្ចប្រជុំក្រុមប្រឹក្សាប្រតិបត្តិថ្នាក់ជាតិបន្ទាន់មួយ និងបង្គាប់ឱ្យសមាជិកខ្លួនចូលធ្វើការឡើងវិញជាបន្ទាន់នោះ។
សហជីពគ្រូបង្រៀននេះបាននិយាយថា សេចក្តីសម្រេចនេះធ្វើឡើងបន្ទាប់ពីមានការចរចាយ៉ាងតានតឹងអស់រយៈពេលជាច្រើនសប្តាហ៍កន្លងមក ជាមួយនឹងអាជ្ញាធរនីហ្សេរីយ៉ា និងដីកាតុលាការដែលបង្គាប់ឱ្យផ្អាកធ្វើកូដកម្ម។
គ្រូបង្រៀននៅសាកលវិទ្យាល័យបានដើរចេញពីថ្នាក់រៀនកាលពីថ្ងៃទី១៤ ខែកុម្ភៈកន្លងទៅ ដើម្បីតវ៉ាលើជម្លោះប្រាក់បៀវត្សរ៍។ សហជីពនេះក៏បានថ្លែងថា អាជ្ញាធរនីហ្សេរីយ៉ាបានបដិសេធចំពោះការសន្យាកាលពីពេលមុនក្នុងការវិនិយោគទឹកប្រាក់ប្រមាណ ៣ ពាន់លានដុល្លារអាមេរិកលើសាលាសាធារណៈ។
នៅដើមខែតុលាកន្លងទៅនេះលោក Muhammadu Buhari ប្រធានាធិបតីនីហ្សេរីយ៉ាបានបង្ហាញខ្ទង់ថវិកាជាតិសម្រាប់ឆ្នាំ២០២៣ និងបានបម្រុងទុកទឹកប្រាក់ប្រមាណ ៦៩០ លានដុល្លារអាមេរិកសម្រាប់សាកលវិទ្យាល័យ និងទឹកប្រាក់ប្រមាណ ៣៩០ លានដុល្លារអាមេរិកសម្រាប់សាលាពហុបច្ចេកវិទ្យា និងមហាវិទ្យាល័យអប់រំ។
អាជ្ញាធរក៏បានយល់ព្រមទូទាត់ប្រាក់បៀវត្សរ៍ដល់គ្រូបង្រៀនសម្រាប់រយៈពេលជាច្រើនខែដែលមិនបានបង្រៀនផងដែរ។
លោក Peter Adamu ជាសមាជិកនៃក្រុមប្រឹក្សាប្រតិបត្តិនៃសហជីព ASUU។ លោកថា អាជ្ញាធរមិនបានធ្វើតាមការទាមទាររបស់សហជីពឱ្យបានពេញលេញទេ ប៉ុន្តែមានការវិវឌ្ឍទៅមុខ។
លោក Peter Adamu បានថ្លែងក្នុងសម្តីដើមថា៖ «យើងបានផ្លាស់ប្តូរជំហរ។ រដ្ឋាភិបាលក៏អ៊ីចឹងដែរ។ យើងបានឈានដល់ចំណុចកណ្តាលមួយ ដូច្នេះយើងសង្ឃឹមថា ភាគីទាំងពីរនឹងប្រកាន់ខ្ជាប់ទៅនឹងកិច្ចព្រមព្រៀងនេះ ហើយសហជីពបានអនុវត្តតាមលក្ខខណ្ឌរបស់យើងក្នុងកិច្ចព្រមព្រៀងនេះហើយ ដូច្នេះយើងសង្ឃឹមថា រដ្ឋាភិបាលនឹងអនុវត្តផ្នែករបស់ខ្លួនក្នុងកិច្ចព្រមព្រៀងដែរ»។
ការតវ៉ាលើប្រាក់បៀវត្សរ៍ និងគ្រឿងបរិក្ខារសុខមាលភាពដែលចាស់ៗរបស់សហជីពគ្រូបង្រៀនក្លាយជារឿងសាមញ្ញនៅក្នុងប្រព័ន្ធអប់រំនីហ្សេរីយ៉ាអស់រយៈពេលជាច្រើនទសវត្សរ៍មកហើយ ដែលជួនកាលមានរយៈពេលជាច្រើនខែ។
ការធ្វើកូដកម្មកាលពីលើកមុនក្នុងឆ្នាំ២០២០ បន្ទាប់ពីមានការរាតត្បាតជំងឺកូវីដ១៩មានរយៈពេល ៩ ខែ ដែលជារយៈពេលយូរបំផុតក្នុងប្រវត្តិសាស្ត្រនីហ្សេរីយ៉ា។
សហជីព ASUU ថា ការចរចានឹងបន្តស្របពេលសាលារៀនបើកទ្វារ។ មនុស្សជាច្រើនសង្ឃឹមថា បញ្ហារវាងសហជីព និងរដ្ឋាភិបាលអាចត្រូវបានដោះស្រាយដើម្បីភាពល្អប្រសើរ៕
