ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

អង្គការ​សង្គម​ស៊ីវិល​ជំរុញ​រដ្ឋាភិបាល​ដោះ​ស្រាយ​បញ្ហា​កុមារ​រង​គ្រោះ​អំឡុង​ពេល​វិបត្តិ​ជំងឺ​កូវីដ​១៩


រូបឯកសារ៖ កុមារី​ម្នាក់​កំពុង​រៀន​តាម​អនឡាញ​នៅ​ផ្ទះ​របស់​នាង​ក្នុង​រាជធានី​ភ្នំពេញ នៅ​ថ្ងៃទី២៥ ខែមិថុនា ឆ្នាំ២០២០ ខណៈ​ពេលដែល​សាលារៀន​របស់​នាង​ត្រូវបាន​ផ្អាក ដើម្បី​ទប់ស្កាត់​ការ​ឆ្លងរាលដាល​ជំងឺ​កូវីដ​១៩។ (កាន់ វិច្ឆិកា/វីអូអេ)

នៅ​ក្នុង​ឱកាស​ទិវា​កុមារ​អន្តរ​ជាតិ​១ មិថុនា​នេះ អង្គការ​សង្គម​ស៊ីវិល​ចំនួន​៧ បាន​បង្ហាញ​ក្តី​បារម្ភ​អំពី​ផល​ប៉ះពាល់​នៃ​វិបត្តិ​ជំងឺ​កូវីដ​១៩​មក​លើ​កុមារ ក្នុង​នោះ​មាន​ការ​សិក្សា​របស់​ពួកគេ បញ្ហា​បោះ​បង់​ការ​សិក្សា និង​ភាព​តានតឹង​ផ្លូវ​ចិត្ត​ជា​ដើម។

នៅ​ក្នុង​សេចក្តី​ថ្លែងការណ៍​មួយ​ចេញ​ផ្សាយ​នៅ​ថ្ងៃ​អង្គារ​នេះ អង្គការ​សិទ្ធិ​មនុស្ស​លីកាដូ​បាន​ជំរុញ​ឲ្យ​មាន​ការ​គិត​គូរ​ទៅ​លើ​កុមារ ដែល​រង​ផល​ប៉ះពាល់​ដោយ​សារ​វិបត្តិ​ជំងឺ​កូវីដ​១៩ ដោយ​លើក​ឡើង​ថា​កុមារមិន​គួរ​ត្រូវ​បាន​មើល​រំលង​ក្នុង​ការ​ឆ្លើយ​តប​នឹង​ជំងឺ​កូវីដ​១៩​ឡើយ។

អង្គការ​លីកាដូ​បញ្ជាក់​ថា៖ «រាជ​រដ្ឋាភិបាល​គួរ​ចាប់​ផ្ដើម​ចាត់​ទុក​សិទ្ធិ​ និង​សុខុមាល​ភាពរបស់​កុមារ​ជា​បញ្ហាស្នូល​មួយ​ក្នុង​ការបន្ត​កិច្ច​ខិត​ខំ​ប្រឹង​ប្រែង ​ដើម្បីគ្រប់​គ្រង​និង​ទប់​ស្កាត់ការ​រីករាល​ដាល​ជា​សាកលនៃ​ជំងឺ​កូវីដ​១៩»។

លោក អំ សំអាត នាយក​រងទទួល​បន្ទុក​កម្មវិធី​ឃ្លាំ​មើល​នៃ​អង្គការ​លីកាដូ​ បាន​មានប្រសាសន៍​នៅ​ក្នុង​សេចក្តី​ថ្លែង​ការណ៍​ថា៖ «តម្រូវ​ការរបស់កុ​មារ​មិន​គួរត្រូវ​បានមើល​រំលង​ទៀត​ទេ។ សិទ្ធិ ​សុខុមាល​ភាព​ និង​សំឡេង​របស់​កុមារ គួរ​តែ​ជា​អាទិភាព​ នៅ​គ្រប់​វិធាន​ការ​ឆ្លើយ​តបចំពោះ​វិបត្តិ​ជំងឺ​កូវីដ​១៩​នៅ​កម្ពុជា»។

បើ​តាម​អង្គការ​លីកាដូ កុមារ​ដែល​នៅ​ក្នុង​គ្រួសារក្រីក្រ​ឬ​រៀន​នៅ​សាលា​រៀនដែល​មាន​ធនធាន​តិច​តួច និង​កុមារ​ដែល​រ​ស់​នៅតាម​ជនបទ​ ត្រូវបានមើល​រំលង​ ដោយ​ពួកគេ​មិន​មាន​មធ្យោបាយ​សម​ស្រប​ និង​គ្រប់​គ្រាន់ ​ដើម្បី​ទទួល​បាន​ការ​អប់រំ​នោះ​ទេ។ ឯកសារ​សិក្សា​ជា​ក្រដាស​មិនត្រូវ​បាន​ចែក​ចាយ​ដល់​កុមារ​គ្រប់​គ្នាទេ ​ហើយ​ប្រសិន​បើ​មិន​មាន​ទូរស័ព្ទ​វ័យ​ឆ្លាត​ កុំព្យូទ័រ​ ទី​តាំង​រៀន​សូត្រ​សមរម្យ ​និង​សេវា​អ៊ីនធឺណិត​ល្អ​ទេ ​នោះ​ប្រសិទ្ធភាព​នៃ​ការ​សិក្សា​ពី​ចម្ងាយ​ គឺ​មិន​អាច​ធ្វើ​ទៅ​រួច​ឡើយ។ អង្គការ​លីកាដូ​បញ្ជាក់​ថា​ឪពុក​ម្ដាយ​ និង​អាណា​ព្យាបាល ​ក៏​បាន​រង​សម្ពាធ​ខ្លាំង​ដែរ​ ដោយ​សារ​អ្នក​ខ្លះ​ខ្វះ​ចំណេះ​ដឹង​ ពេល​វេលា​ ឬ​ធនធាន​ ដើម្បី​ជួយ​គាំទ្រ​ការ​សិក្សា​នៅ​ផ្ទះ​របស់​កូនៗ​ពួក​គេ​ឲ្យ​មាន​ប្រសិទ្ធភាព។

បើ​តាម​អង្គការ​នេះ កាល​ពី​ខែ​មីនា​ ឆ្នាំ២០២១​ ក្រសួង​អប់រំ ក្នុង​កិច្ច​សហ​ការ​ជាមួយ​ក្រុម​ការងារ​ក្នុង​វិស័យ​អប់រំ​ និង​អង្គការ​ដទៃ​ទៀត ​បាន​ចេញ​ផ្សាយ​ការ​វាយ​តម្លៃ​មួយ ដោយបង្ហាញ​ថា​សិស្សានុសិស្ស​យ៉ាង​តិច​១៦%​បាន​ប្រឈម​នឹង​ការ​បោះ​បង់​ការ​សិក្សា​ ហើយ​៦%​ ពេល​នេះ​កំពុង​ធ្វើ​ការ​ពេញ​ម៉ោង​ ក្រោយ​ពី​ការ​បិទ​សាលា​រៀន។

រូបឯកសារ៖ ស្ត្រីម្នាក់ពាក់ម៉ាស់ដើរកាត់សាលារៀនមួយដែលបានបិទទ្វារ ខណៈមានការបារម្ភពីការឆ្លងរាតត្បាតនៃជំងឺកូវីដ ១៩ នៅទីក្រុងភ្នំពេញ ថ្ងៃទី១២ ខែវិច្ឆិកា ឆ្នាំ២០២០។
រូបឯកសារ៖ ស្ត្រីម្នាក់ពាក់ម៉ាស់ដើរកាត់សាលារៀនមួយដែលបានបិទទ្វារ ខណៈមានការបារម្ភពីការឆ្លងរាតត្បាតនៃជំងឺកូវីដ ១៩ នៅទីក្រុងភ្នំពេញ ថ្ងៃទី១២ ខែវិច្ឆិកា ឆ្នាំ២០២០។

ចំណែក​នៅ​ក្នុង​បទ​វិចារណកថាមួយ​ដែល​ធ្វើ​រួម​គ្នា​ដោយ​សម្ព័ន្ធភាព​សកល​នៃ​អង្គការ​មិន​មែន​រដ្ឋា​ភិបាល​ឯករាជ្យចំនួន​៦​ ដូច​ជា​អង្គការ World Vision អង្គការ ChildFun អង្គការ Save the Children និង​អង្គការ ​Plan International ​ជា​ដើម ​អង្គការ​ទាំង​នោះ​បាន​លើក​ឡើង​ថា​លើស​ពី​ភាព​ឯកោ កុមារ​ត្រូវ​ប្រយុទ្ធ​ប្រឆាំង​នឹង​ភាព​ភ័យ​ខ្លាច ​ភាព​តាន​តឹង​ដែល​កំពុង​តែ​កើន​ឡើង និង​កា​រភ័យ​ខ្លាច​ថា​រៀន​មិន​ទាន់​គេ ដោយ​សារ​មាន​បញ្ហា​ប្រឈម​ជា​ច្រើន​ពាក់ព័ន្ធ​នឹង​ការ​រៀន​សូត្រ​ពី​ចម្ងាយ។ បញ្ហា​តាន​តឹង​គឺ​នៅ​ពេល​ដែល​ពួកគេ​បាន​ឃើញ​ឪពុក​ម្តាយ និង​សាច់​ញាតិ​គ្រួសារ​បាត់បង់​ប្រាក់​ចំណូល និង​មាន​ការ​លំបាក​ក្នុង​ការ​ចំណាយ​លើ​ការ​រស់​នៅ។

​អង្គការ​បញ្ជាក់​ថា​សម្រាប់​កុមារ​ជាច្រើន​នៅ​កម្ពុជា​«ការ​វិល​រក​ភាព​ប្រក្រតី​វិញ» អាច​នឹង​ត្រូវ​ការ​កិច្ច​ប្រឹង​ប្រែង​ច្រើន​ជាង​ការ​ប្រយុទ្ធ​ប្រឆាំង​នឹង​ជំងឺ​កូវីដ​១៩​ទៅ​ទៀត​ ដែល​ក្នុង​នោះ​រួម​មាន​ការ​ប្រយុទ្ធ​នឹង​ផល​ប៉ះ​ពាល់​ដែល​អាច​មាន​រយៈ​ពេល​វែង​លើ​ការ​សិក្សា ភាព​ក្រីក្រ​ និង​សុខភាព​ផ្លូវ​ចិត្ត។

អង្គការ​ទាំង​នោះ​ជំរុញ​ឲ្យ​ដាក់​ការ​អភិវឌ្ឍ និង​ការ​រៀន​សូត្រ​របស់​កុមារ​ទៅ​ក្នុង​ចំណុច​ស្នូល​នៃ​ផែនការ​ស្តារ​ឡើង​វិញ ដែល​មិន​ត្រឹម​តែ​សម្រាប់​ការ​ប្រយុទ្ធ​ប្រឆាំង​នឹង​ជំងឺ​កូវីដ​១៩​ប៉ុណ្ណោះ​ទេ ប៉ុន្តែ​ថែម​ទាំង​ដើម្បី​ជម្នះ​ផល​ប៉ះពាល់​រយៈ​ពេល​វែង​របស់​វា​ផង​ដែរ។

លោក រស់ សុវាចា អ្នកនាំពាក្យ​ក្រសួង​អប់រំ យុវជន និង​កីឡា ប្រាប់ ​VOA ​ថា​ ​ក្រសួង​អប់រំ​បាន​ព្យាយាម​ប្រែ​ក្លាយ​វិបត្តិ​ជំងឺ​កូវីដ​១៩​នេះ​ទៅ​ជា​ឱកាស​ក្នុង​ការ​អភិវឌ្ឍ​វិស័យ​អប់រំ ហើយ​វា​ទាមទារ​ឲ្យ​មាន​ការ​ចូលរួម​ពី​ភាគី​ពាក់​ព័ន្ធ​ទាំង​អស់ រួម​ទាំង​ឪពុក​ម្តាយ​របស់​សិស្សានុសិស្ស​ផង​ដែរ។

លោក​បញ្ជាក់​ថា៖ «កូវីដ​១៩​ជះ​ឥទ្ធិពល​មក​លើ​ពិភព​លោក​គ្រប់​វិស័យ។ នៅ​ក្នុង​នោះ ប្រទេស​កម្ពុជា​យើង បើ​យើង​ពិនិត្យដោយ​ឡែក គឺ​វិស័យ​អប់រំ​ យុវជន​និង​កីឡា ក៏​ទទួល​ផល​ជះ​ពី​កូវីដ​១៩​ដែរ។ អ្វី​ដែល​សំខាន់​ដែល​យើង​គួរ​តែ​ផ្តោត​នេះ គឺទៅ​លើ​ការ​បង្វែរ​បញ្ហា​ប្រឈម​នានា ឲ្យ​ទៅ​ជា​ឱកាស​ពង្រឹង​ការ​អប់រំ​ ជា​ពិសេស​នោះ គឺ​ការ​ពង្រឹង​អប់​រំ​ឌីជីថល»។

បើ​តាម​អង្គការ​លីកាដូ ការ​រស់​នៅ​របស់​កុមារ​ ត្រូវ​បាន​កែ​ប្រែ​យ៉ាង​ខ្លាំង​ ដោយ​សារ​ការ​បន្ត​បិទការ​សិក្សា​ដោយ​ផ្ទាល់​ក្នុង​ថ្នាក់​រៀន។ ចាប់​តាំង​ពី​ថ្ងៃ​ទី​២០ ខែ​កុម្ភៈ ឆ្នាំ​២០២១មក កម្ពុជា​បាន​ប្រឈម​នឹង​ការ​ឆ្លង​ជំងឺ​កូវីដ​១៩​យ៉ាង​ខ្លាំង ដែល​នាំ​ឲ្យ​មាន​ការ​បិទ​សាលា​រៀន​ទាំង​រដ្ឋ​ និង​ឯក​ជន​នៅ​ទូទាំង​ប្រទេស ដោយ​មិន​មាន​ការ​កំណត់​ឲ្យ​បើក​ឡើង​វិញ​នៅ​ឡើយ ដែល​នាំ​ឲ្យ​ប៉ះ​ពាល់​ដល់​ការ​សិក្សា​របស់​សិស្សានុសិស្សប្រមាណ​ ៣លាន ២សែន​នាក់។

នៅ​ក្នុង​សារ​អបអរ​សាទរ​ទិវា​កុមារ​អន្តរ​ជាតិ លោក​នាយក​រដ្ឋមន្រ្តី​ ហ៊ុន សែន បាន​លើក​ឡើងថា ​រដ្ឋា​ភិបាល​បាន​ដាក់​ចេញ​ និង​កំពុង​ជំរុញ​ការ​អនុវត្ត​គោល​នយោបាយ​គាំពារ​សង្គម​ ដើម្បី​លើក​កម្ពស់​សុខុមាលភាព​និង​សាមគ្គី​ភាព​សង្គម ដោយ​បន្ត​ផ្តល់​សាច់​ប្រាក់​ជូន​ស្រ្តី​មាន​ផ្ទៃ​ពោះ​ និង​កុមារ​អាយុ​ក្រោម​២​ឆ្នាំ​ និង​កម្មវិធី​ឧបត្ថម្ភ​សាច់​ប្រាក់​ជូន​គ្រួសារ​ក្រីក្រ ​និង​ងាយ​រងគ្រោះ​ក្នុង​វិបត្តិ​ជំងឺ​កូវីដ​១៩។

លោក ហ៊ុន សែន បញ្ជាក់​ថា៖ «រាជ​រដ្ឋាភិបាល​កម្ពុជា​នៅ​តែ​បន្ត​ប្តេជ្ញា​ចិត្ត​លើក​កម្ពស់​ការ​គោរព​សិទ្ធិ​កុមារ​និង​ផ្តល់​កិច្ច​ការ​ពារ​យ៉ាង​ពេញ​ទំហឹង​នៅ​គ្រប់​ស្ថាន​ភាព​ ដោយ​បាន​បង្កើត​នូវ​យន្តការ​ជា​ច្រើន​ក្នុង​ការ​គ្រប់គ្រង​ និង​ផ្តល់​សេវា​ដល់​មុខ​សញ្ញា​កុមារ​ទូទៅ កុមារ​ងាយ​រង​គ្រោះ​ និង​កុមារ​រង​គ្រោះ។ តែ​ទោះ​បី​ជា​មាន​ការ​ខិត​ខំ​ប្រឹង​ប្រែង​យ៉ាង​នេះ​ហើយ​ក៏​ដោយ ក៏​នៅ​មាន​កុមារ​មួយ​ចំនួន​កំពុង​រស់​នៅ​ក្នុង​ស្ថាន​ភាព​ងាយ​រង​គ្រោះ​និង​រង​គ្រោះ ព្រោះ​តែ​ឪពុក​ម្តាយ​ឬ​អាណាព្យាបាល​ធ្វើ​ទេសន្តរ​ប្រវេសន៍ និង​បោះ​បង់​ចោល​រយៈ​ពេល​យូរ និង​ជា​ពិសេស​ក្នុង​ការ​រស់​នៅ​ក្នុង​ស្ថាន​ភាព​នៃ​ការ​ឆ្លង​រាល​ដាល​នៃ​ជំងឺកូវីដ​១៩»។

លោក ហ៊ុន សែន ឲ្យ​ដឹង​ទៀត​ថា​គ្រប់​ក្រសួង ស្ថាប័ន អាជ្ញាធរ​មាន​សមត្ថកិច្ច​គ្រប់​លំដាប់​ថ្នាក់ ត្រូវ​បន្ត​ជំរុញ​ការ​រៀប​ចំ​និង​អនុវត្ត​ប្រព័ន្ធ​កិច្ច​ការ​ពារ​កុមារ​ឲ្យ​មាន​លក្ខណៈ​ប្រទាក់​ក្រឡា​ជា​ពហុ​វិស័យ​នៅ​ក្នុង​សហគមន៍​ ជា​ពិសេស​ការ​ជួយ​ដល់​កុមារ​គ្រប់​វិស័យ៕

XS
SM
MD
LG