ក្រសួងមហាផ្ទៃប្រកាសទទួលស្គាល់ជាផ្លូវការនូវសមាជិកក្រុមប្រឹក្សាឃុំ-សង្កាត់ថ្មីទូទាំងប្រទេស ក្រោយការប្រកាសលទ្ធផលបោះឆ្នោតផ្លូវការរបស់គណៈកម្មាធិការជាតិរៀបចំការបោះឆ្នោត (គ.ជ.ប.)។ ចាប់ពីថ្ងៃចន្ទនេះ សមាជិកក្រុមប្រឹក្សាឃុំ-សង្កាត់ ដែលជាប់ឆ្នោតក្នុងឃុំ-សង្កាត់ជាង១.៦០០ទូទាំងប្រទេសកម្ពុជា បានចាប់ផ្តើមរៀបចំពិធីផ្ទេរតំណែង និងឡើងកាន់តំណែងពេញសិទ្ធិជាបន្តបន្ទាប់។ នេះបើតាមការបញ្ជាក់របស់អ្នកនាំពាក្យក្រសួងមហាផ្ទៃ។
លោកនាយឧត្តមសេនីយ៍ខៀវ សុភ័គ អ្នកនាំពាក្យក្រសួងមហាផ្ទៃ ប្រាប់ VOA នាព្រឹកថ្ងៃចន្ទនេះថា លោក ស ខេង រដ្ឋមន្រ្តីក្រសួងមហាផ្ទៃបានចុះហត្ថលេខាទទួលស្គាល់សមាជិកក្រុមប្រឹក្សាឃុំ-សង្កាត់ ដែលបានជាប់ការបោះឆ្នោតអាណត្តិទី៤នេះ កាលពីសប្តាហ៍មុនមកម៉្លេះ ហើយនៅថ្ងៃចន្ទនេះ មានការរៀបចំពិធីផ្ទេរតំណែងសមាជិកក្រុមប្រឹក្សាឃុំ-សង្កាត់ផ្លូវការ ដោយអភិបាលរាជធានី-ខេត្តជាបន្តបន្ទាប់រហូតដល់ចុងសប្តាហ៍នេះ ដើម្បីឲ្យពួកគេអាចបំពេញការងាររបស់ខ្លួននៅតាមឃុំ-សង្កាត់នីមួយៗដោយពេញសិទ្ធិ។
លោកនាយឧត្តមសេនីយ៍ខៀវ សុភ័គបន្ថែមថា ជាធម្មតាសមាជិកក្រុមប្រឹក្សាឃុំ-សង្កាត់ ដែលឡើងកាន់តំណែងថ្មី មិនទាន់មានបទពិសោធន៍ និងសមត្ថភាពគ្រប់គ្រាន់ ដូចសមាជិកក្រុមប្រឹក្សាឃុំ-សង្កាត់ចាស់ៗដែលធ្លាប់ធ្វើការពីមុន ដូច្នេះលោករំពឹងថា សមាជិកក្រុមប្រឹក្សាឃុំ-សង្កាត់ថ្មីនឹងរៀនពីអ្នកចាស់ដើម្បីបំពេញការងារឲ្យបានល្អ។
លោកនាយឧត្តមសេនីយ៍ខៀវ សុភ័គមានប្រសាសន៍ថា៖
«ធម្មតាតែថ្មីហើយវាមិនដែលបានស្រួលដូចគេអ្នកចាស់ទេ ត្រូវមានការពិសោធន៍អីផ្សេងៗ។ ដូចជាការងារអីចឹង ធម្មតាគេយកបទពិសោធន៍ដែរ។ ដូច្នេះមេឃុំថ្មីអាចនឹងពិបាកខ្លះ។ ខ្ញុំថា អ្នកដែលចាស់ហ្នឹងផ្តល់បទពិសោធន៍ឲ្យអ្នកថ្មីទៅ។ អ្នកថ្មីកុំអាងតែយើងបានជាប់ យើងមិនបានរៀនពីអ្នកចាស់។ ប៉ុន្តែខ្ញុំជឿថា ទាំងអស់គ្នានឹងខំបម្រើជាតិ បម្រើប្រជាពលរដ្ឋនៅក្នុងឃុំសង្កាត់នីមួយៗ»។
លទ្ធផលបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ ដែលចេញដោយគ.ជ.ប. បង្ហាញថា ក្នុងចំណោមគណបក្សនយោបាយចំនួន១២ដែលបានឈរឈ្មោះការបោះឆ្នោតឃុំ-សង្កាត់ទាំង១,៦៤៦នោះ មានតែគណបក្សនយោបាយធំៗចំនួន២ប៉ុណ្ណោះទទួលបានសមាជិកក្រុមប្រឹក្សាឃុំ-សង្កាត់ច្រើនជាងគេ។ ក្នុងនោះគណបក្សប្រជាជនកម្ពុជាទទួលបានអាសនៈសមាជិកក្រុមប្រឹក្សាឃុំ-សង្កាត់ទូទាំងប្រទេសសរុប៦,៥០៣អាសនៈ ក្នុងនោះមានមេឃុំ-ចៅសង្កាត់ចំនួន១.១៥៦អាសនៈ ជំទប់ទី១ចំនួន១.១៣៩អាសនៈ ជំទប់ទី២ ចំនួន៥១០អាសនៈ។ គណបក្សសង្រ្គោះជាតិទទួលបានអាសនៈក្រុមប្រឹក្សាឃុំ-សង្កាត់សរុបចំនួន៥.០០៧អាសនៈ ក្នុងនោះមានមេឃុំ ចៅសង្កាត់ចំនួន៤៨៩អាសនៈ ជំទប់ទី១ចំនួន៥០៣អាសនៈ ជំទប់ទី២ ចំនួន១.០៨៧អាសនៈ។
លោកសុខ ឥសាន អ្នកនាំពាក្យគណបក្សកាន់អំណាចប្រាប់ VOA ថា គណបក្សប្រជាជនកម្ពុជានឹងពង្រឹងគុណភាពសេវាសាធារណៈនៅតាមឃុំ-សង្កាត់ឲ្យមានប្រសិទ្ធភាពជាងមុន ដើម្បីទាក់ទាញការគាំទ្រពីប្រជាពលរដ្ឋវិញ។
លោកមានប្រសាសន៍ថា៖
«មានតែពង្រឹងកែសម្រួលកំណែទម្រង់ស៊ីជម្រៅ ហើយអនុវត្តធ្វើម៉េចបម្រើសេវាសាធារណៈជូនប្រជាពលរដ្ឋឲ្យកាន់តែមានគុណភាព និងប្រសិទ្ធភាពខ្ពស់។ អាហ្នឹងបានយើងទាក់ទាញសមានចិត្តពីប្រជាពលរដ្ឋបាន»។
ចំណែកលោកជិន សុខង៉េង ចៅសង្កាត់វ័យក្មេងមកពីគណបក្សសង្គ្រោះជាតិ ដែលទើបជាប់ឆ្នោតក្នុងសង្កាត់សាលាកំរើក ខេត្តសៀមរាប ប្រាប់ VOA ថា បញ្ហាជាច្រើនដែលលោកនឹងត្រូវដោះស្រាយនៅពេលដែលលោកដឹកនាំសង្កាត់ មានដូចជា ការរៀបចំប្រព័ន្ធរដ្ឋបាលក្នុងសង្កាត់ ការផ្តល់សេវាសាធារណៈ និងបញ្ហាបរិស្ថានជាដើម។
ចៅសង្កាត់ ដែលមានវ័យ២៦ឆ្នាំរូបនេះ បន្ថែមថា ក្នុងនាមជាចៅសង្កាត់ដែលទើបត្រូវបានប្រជាពលរដ្ឋបោះឆ្នោតឲ្យដឹកនាំសង្កាត់ លោកនឹងប្តេជ្ញាសហការជាមួយសមាជិកក្រុមប្រឹក្សាមកពីគណបក្សផ្សេង ដើម្បីដឹកនាំសង្កាត់របស់លោកឲ្យមានការអភិវឌ្ឍតាមរយៈការប្រើប្រាស់យុទ្ធសាស្រ្តរបស់គណបក្ស និងយុទ្ធសាស្រ្តរបស់លោកផ្ទាល់។ មេឃុំថ្មីដែលនឹងត្រូវប្រកាសតែងតាំងជាផ្លូវការនៅរសៀលថ្ងៃសុក្រខាងមុខនេះអះអាងថា លោកនឹងលាលែងចេញពីតំណែង ប្រសិនបើប្រជាពលរដ្ឋមិនពេញចិត្តនឹងការដឹកនាំរបស់លោក។
លោកជិន សុខង៉េងបញ្ជាក់ថា៖
«ក្នុងនាមក្រុមប្រឹក្សា ឬចៅសង្កាត់ជាប់ឆ្នោតដោយប្រជាពលរដ្ឋ ត្រូវបម្រើប្រជាពលរដ្ឋ អត់មាននិយាយអំពីចៅសង្កាត់ ឬក្រុមប្រឹក្សាមកពីគណបក្សសង្គ្រោះជាតិ ឬមកពីគណបក្សគេម្ខាងទៀតទេ។ សរុបសេចក្តីមក គឺយើងចង់បង្កើតវប្បធម៌ឲ្យអ្នកដឹកនាំក្រោយ ចេះរៀបចំខ្លួន នៅពេលដែលខ្លួនជាប់ជាតំណាងប្រជាពលរដ្ឋ កុំយកគណបក្សជាធំ គឺយើងយកប្រជាពលរដ្ឋជាធំ។ នេះហើយគឺគោលដៅរបស់យើងក្នុងការរៀបចំលទ្ធិប្រជាធិបតេយ្យពិតប្រាកដ ផ្តល់អំណាចពិតប្រាកដដល់ប្រជាពលរដ្ឋ»។
លទ្ធផលបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ជាផ្លូវការ កាលពីចុងខែមិថុនាបង្ហាញថា គណបក្សប្រជាជនកម្ពុជារបស់លោកនាយករដ្ឋមន្រ្តីហ៊ុន សែនទទួលបានការគាំទ្រចំនួនជាង៣,៥លានសំឡេង។ ចំណែកគណបក្សសង្គ្រោះជាតិទទួលបានការគាំទ្រចំនួនជាង៣លានសំឡេងនៃចំនួនអ្នកទៅបោះឆ្នោតសុរបជាង៧លាននាក់។ តួលេខនេះបង្ហាញថា សំឡេងគាំទ្រគណបក្សប្រជាជនកម្ពុជា ដែលគ្រប់គ្រងប្រទេសកម្ពុជាជាង៣០ឆ្នាំមកនេះ មានចំនួនច្រើនជាងគណបក្សប្រឆាំងតែជាង៥សែនសំឡេង ឬស្មើនឹងជាង៦ភាគរយតែប៉ុណ្ណោះ។
បើតាមលទ្ធផលឆ្នោតមេឃុំ-ចៅសង្កាត់ គណបក្សប្រជាជនកម្ពុជាថយចំនួន៤៣៦ឃុំ-សង្កាត់ បើធៀបនឹងការបោះឆ្នោតឆ្នាំ២០១២ ដែលទទួលបាន១,៥៩២ ឃុំ-សង្កាត់។ ចំណែកគណបក្សសង្គ្រោះជាតិកើនចំនួន៤៤៩ឃុំ-សង្កាត់ បើធៀបនឹងការបោះឆ្នោតក្នុងឆ្នាំ២០១២ ដែលនៅពេលនោះ គណបក្សប្រឆាំងនេះទទួលបានត្រឹមតែចំនួន៤០ឃុំ-សង្កាត់ប៉ុណ្ណោះ ដោយបូកបញ្ចូលគ្នារវាងគណបក្សសម រង្ស៊ី និងគណបក្សសិទ្ធិមនុស្ស៕
