រដ្ឋាភិបាលដែលមានការបែងចែងបានត្រឡប់ចូលសភាអាមេរិកវិញកាលពីថ្ងៃព្រហស្បតិ៍ជាមួយនឹងការស្បថចូលគ្រប់គ្រងសភាថ្មី។
គណបក្សសាធារណរដ្ឋបានគ្រប់គ្រងទាំងសេតវិមាន ព្រឹទ្ធសភា និងរដ្ឋសភាអស់រយៈពេលពីរឆ្នាំ ឥឡូវនេះគណបក្សប្រជាធិបតេយ្យបានក្លាយជាក្រុមសំឡេងភាគច្រើននៅក្នុងសភាតំណាងរាស្រ្ត។ នេះគឺជាលទ្ធផលដែលទទួលបានពីការបោះឆ្នោតពាក់កណ្តាលអាណត្តិប្រធានាធិបតីកាលពីខែវិច្ឆកាឆ្នាំ២០១៨ ដោយគណបក្សប្រជាធិបតេយ្យបានកើនអាសនៈដល់ទៅ២៣៥អាសនៈនៅក្នុងរដ្ឋសភាដែលមានអាសនៈសរុបចំនួន៤៣៥អាសនៈ។
គណបក្សសាធារណរដ្ឋបានកើន២អាសនៈនៅក្នុងព្រឹទ្ធសភា ដោយកាន់កាប់អាសនៈសរុបចំនួន៥៣អាសនៈទល់នឹង៤៧អាសនៈគ្រប់គ្រងដោយគណបក្សប្រជាធិបតេយ្យ។
លោកស្រី Nancy Pelosi សមាជិកសភាតំណាងរាស្រ្តប្រចាំរដ្ឋកាលីហ្វ័រញ៉ាបានជាប់ឆ្នោតជាប្រធានសភាតំណាងរាស្រ្តម្តងទៀតដូចកាលពីលោកស្រីធ្វើជាប្រធានសភាតំណាងរាស្រ្តកាលពីឆ្នាំ២០០៧ដល់ឆ្នាំ២០១១។ លោកស្រីគឺជាស្រ្តីតែម្នាក់គត់ដែលកាន់តំណែងជាប្រធានសភាតំណាងរាស្រ្ត និងជាស្រ្តីតែម្នាក់គត់មួយដែលចូលកាន់តំណែងជាប្រធានសភាតំណាងរាស្ត្រឡើងវិញបន្ទាប់ពីគណបក្សលោកស្រីបានចាញ់ឆ្នោតនិងបន្ទាប់មកបានកើនសំឡេងភាគច្រើននៅក្នុងសភាឡើងវិញ។
ពួកគណបក្សប្រជាធិបតេយ្យមួយចំនួនចង់បានថ្នាក់ដឹកនាំថ្មីៗនៅក្នុងគណបក្ស ហើយលោកស្រី Pelosiបានយល់ព្រមថានឹងកាន់តំណែងជាប្រធានរដ្ឋសភាមិនលើសពី៤ឆ្នាំនោះទេ។ សភាតំណាងរាស្រ្តថ្មីនេះមានសមាជិកចម្រុះជាតិសាសន៍ច្រើនបំផុតនៅក្នុងប្រវត្តិសាស្រ្តអាមេរិក ដែលក្នុងនោះលោកស្រី Alexandria Ocasio-Corte មកពីរដ្ឋញូវយ៉ក គឺជាស្ត្រីវ័យក្មេងជាងគេបំផុតដែលជាប់ឆ្នោតធ្វើជាសមាជិកសភា។
លោកស្រី Rashida Tlaib មកពីរដ្ឋ Michigan និងលោកស្រី Ilhan Omar មកពីរដ្ឋមីនីសូតាគឺជាស្រ្តីកាន់សាសនាឥស្លាមលើកដំបូងដែលបានជាប់ឆ្នោត។ លោកស្រី Deb Haalandមកពីរដ្ឋ New Mexico និងលោកស្រី Sharice Davids មកពីរដ្ឋ Kansas គឺជាស្រ្តីជនជាតិដើមអាមេរិកាំងជាប់ឆ្នោតជាសមាជិកសភា ហើយសមាជិកសភា១០នាក់ផ្សេងទៀតក៏បានបើកចំហរពីអត្តសញ្ញាណរបស់ពួកគេថាជាពួកស្រឡាញ់ភេទដូចគ្នាផងដែរ៕
