បន្ទាប់ពីបានចរចាគ្នាដ៏តានតឹងមក មន្ត្រីសហរដ្ឋអាមេរិក និងមន្ត្រីកាណាដាបានប្រកាសកាលពីយប់ថ្ងៃអាទិត្យម្សិលមិញថា ពួកគេបានសម្រេចបាននូវកិច្ចព្រមព្រៀងពាណិជ្ជកម្មមួយ ដែលអនុញ្ញាតឲ្យមានកិច្ចព្រមព្រៀងត្រីភាគីកែសម្រួលឡើងវិញមួយជាមួយនឹងប្រទេសម៉ិកស៊ិក ដើម្បីជំនួសឲ្យកិច្ចព្រមព្រៀងពាណិជ្ជកម្មសេរីតំបន់អាមេរិកខាងជើងដែលហៅកាត់ថា NAFTA។
កិច្ចព្រមព្រៀងអាមេរិកម៉ិកស៊ិកកាណាដា ដែលហៅកាត់ថា USMCA នេះ គឺជាមូលដ្ឋានសម្រាប់ការធ្វើពាណិជ្ជកម្មប្រចាំឆ្នាំដែលមានទឹកប្រាក់ ១ លាន ២ សែនលានដុល្លារអាមេរិក។ គេរំពឹងថា កិច្ចព្រមព្រៀងនេះនឹងត្រូវចុះហត្ថលេខាដោយប្រធានាធិបតីអាមេរិកលោក Donald Trump និងសមភាគីរបស់លោកនៃប្រទេសកាណាដា និងម៉ិកស៊ិក នៅក្នុងរយៈពេល ៦០ ថ្ងៃខាងមុខនេះ។
មន្ត្រីជាន់ខ្ពស់អាមេរិកមួយរូបបានប្រាប់អ្នកសារព័ត៌មានថា៖ «យើងគិតថា កិច្ចព្រមព្រៀងនេះគឺអស្ចារ្យបំផុតសម្រាប់សហរដ្ឋអាមេរិក»។ មន្ត្រីរូបនោះបានបន្ថែមទៀតថា៖ «កិច្ចព្រមព្រៀងនេះគឺជាជោគជ័យដ៏អស្ចារ្យសម្រាប់លោកប្រធានាធិបតី Donald Trump»។
សភាអាមេរិកទំនងជានឹងពិភាក្សាលើកិច្ចព្រមព្រៀង USMCA នេះ នៅឆ្នាំក្រោយ។ ជោគវាសនានៃកិច្ចព្រមព្រៀងនេះគឺស្ថិតនៅលើដៃរបស់សមាជិកសភា ហើយគេនៅមិនច្បាស់ទេថាតើសភានឹងអនុម័តកិច្ចព្រមព្រៀងនេះឬក៏អត់ ដោយសារតែគណបក្សប្រជាធិបតេយ្យប្រហែលជានឹងដណ្ដើមការគ្រប់គ្រងរដ្ឋសភាមកវិញនៅក្នុងការបោះឆ្នោតសភាពាក់កណ្ដាលអាណត្តិប្រធានាធិបតីនៅខែវិច្ឆិកាខាងមុខនេះ។
លោក Robert Lighthizer អ្នកតំណាងពាណិជ្ជកម្មរបស់សហរដ្ឋអាមេរិក និងលោកស្រី Chrystia Freeland រដ្ឋមន្ត្រីការបរទេសកាណាដា បានបញ្ជាក់នៅក្នុងសេចក្ដីប្រកាសរួមគ្នាថា៖ «កិច្ចព្រមព្រៀង USMCA នេះនឹងផ្ដល់ឲ្យកម្មករ កសិករ ម្ចាស់កសិដ្ឋាន និងម្ចាស់អាជីវកម្មនានានូវកិច្ចព្រមព្រៀងពាណិជ្ជកម្មកម្រិតខ្ពស់មួយដែលនឹងឈានទៅដល់ការមានទីផ្សារសេរីជាងមុន ការធ្វើពាណិជ្ជកម្មមានយុត្តិធម៌ជាងមុន និងការរីកចម្រើនសេដ្ឋកិច្ចដ៏ខ្លាំងក្លានៅក្នុងតំបន់របស់យើង»៕
