នេះជាលើកទី១ហើយដែលកងទ័ពជើងគោកសហរដ្ឋអាមេរិក មានសារមន្ទីររបស់ខ្លួន។
សារមន្ទីរជាតិនៃកងទ័ពជើងគោកអាមេរិក ត្រូវបានសម្ពោធបើកនៅថ្ងៃទី១១ ខែវិច្ឆិកា ឆ្នាំ២០២០ ដែលជាទិវាអតីតយុទ្ធជន ដែលមានទីតាំងស្ថិតនៅក្នុងអគារកងទ័ព Fort Belvoir ក្នុងរដ្ឋ Virginia។
កងទ័ពជើងគោកអាមេរិក គឺជាស្ថាប័នយោធាអាមេរិកតែមួយប៉ុណ្ណោះ ដែលមិនធ្លាប់មានសារមន្ទីរជាតិក្នុងពេលកន្លងមក។
ដោយមានចម្ងាយ៣២គីឡូម៉ែត្រពីរដ្ឋធានីវ៉ាស៊ីនតោន សារមន្ទីរជាតិនេះ បានចងក្រងនូវប្រវត្តិសាស្ត្រនៃកងទ័ពជើងគោកដែលមានអាយុច្រើនជាងគេបង្អស់របស់អាមេរិក ដែលបានចាប់ផ្តើមកាលពី២៤៥ឆ្នាំមុន ក្នុងឆ្នាំ១៧៧៥។
អគារសារមន្ទីរដែលមានកម្ពស់៥ជាន់ធំទូលាយនេះ បានដាក់តាំងបង្ហាញនូវរូបភាពប្រវត្តិសាស្រ្ត រួមជាមួយឯកសារ រូបថត ស្នាដៃសិល្បៈ និងរូបចម្លាក់ធំតូច ចំនួនរាប់ពាន់ផ្សេងៗទៀត។ សារមន្ទីរជាតិនេះ ក៏ដាក់តាំងបង្ហាញផងដែរ នូវរថក្រោះ Sherman ដែលត្រូវបានប្រើប្រាស់ក្នុងសង្គ្រាមលោកលើកទី២ ឧទ្ធម្ភាគចក្រក្នុងសង្គ្រាមវៀតណាម និងរថពាសដែក ពីសង្គ្រាមអ៊ីរ៉ាក់ក្នុងឆ្នាំ២០០៣ និងកែបខ្នងសេះដែលត្រូវបានប្រើប្រាស់ដោយកម្លាំងពិសេសកងទ័ពជើងគោកអាមេរិក ក្នុងតំបន់ភ្នំនៃប្រទេសអាហ្វហ្គានីស្ថានក្នុងសង្គ្រាមឆ្នាំ២០០១ ជាដើម។
សារមន្ទីរជាតិកងទ័ពជើងគោកនេះ ក៏ដាក់តាំងបង្ហាញផងដែរ នូវកងទ័ពអាមេរិក ដែលវាយប្រហារទៅលើឆ្នេរសមុទ្រ Normandy នៅថ្ងៃបើកការប្រយុទ្ធក្នុងសង្គ្រាមលោកលើកទី២ផងដែរ។ សម្ភារៈផ្សេងៗទៀតដែលត្រូវបានដាក់តាំង ក៏រួមមានផងដែរ នូវមួកដែក ដាវប្រយុទ្ធ មេដាយសរសើរ និងនាឡិកាដៃដែលត្រូវបានប្រទះឃើញក្នុងគំនរបាក់បែកនៃមន្ទីរបញ្ចកោណ ក្រោយការវាយប្រហារភេរវកម្មថ្ងៃទី១១ ខែកញ្ញា ឆ្នាំ២០០១។
អ្នកស្រី Tammy Call នាយិកាសារមន្ទីរជាតិកងទ័ពជើងគោក ថ្លែងប្រាប់វីអូអេថា ទោះបីការដាក់តាំងបង្ហាញជាច្រើន ផ្តោតលើសកម្មភាពសង្គ្រាមក្តី ក៏សារមន្ទីរមួយនេះ បានដាក់តាំងបង្ហាញពីសកម្មភាពប្រតិបត្តិការថែរក្សាសន្តិភាព និងបេសកកម្មមនុស្សធម៌នៅជុំវិញពិភពលោកផងដែរ។
អ្នកស្រី Call ដែលជាជនស៊ីវិលនិងជាអតីតយោធាមួយរូបនោះ បានគូសបញ្ជាក់ថា ការដាក់តាំងបង្ហាញដ៏សំខាន់មួយ ដែលមានឈ្មោះថា រឿងរ៉ាវរបស់យុទ្ធជន បានប្រាប់ពី «រឿងរ៉ាវរបស់បុគ្គលយោធានីមួយៗ» ដែលជាផ្នែកមួយនៃប្រវត្តិសាស្រ្តដ៏ទូលំទូលាយ ដែលធ្វើឲ្យយើងដក់ជាប់នូវអារម្មណ៍ផ្ទាល់ខ្លួនជាមួយនឹងការឆ្លុះបញ្ចាំងឲ្យឃើញ។
លោក Jack Querfeld នាយកកិច្ចការអន្តរជាតិផ្ទៃក្នុងនៃអង្គការ American Legion ក្នុងទីក្រុង Indianapolis រដ្ឋ Indiana លើកឡើងថា លោកមានការចាប់អារម្មណ៍ថា
រូបភាពនៃការប្រយុទ្ធក្នុងសមរភូមិជាច្រើន ដែលត្រូវបានដាក់តាំងបង្ហាញនោះ «បានបញ្ជាក់នូវរឿងរ៉ាវពិតៗ» ដោយមិនគ្រាន់តែនិយាយថាយើងបានប្រយុទ្ធនៅទីនេះនោះទេ។
លោក Ryan D. McCarthy លេខាធិការកងទ័ពជើងគោកអាមេរិក គូសបញ្ជាក់ថា៖ «សារមន្ទីរជាតិនេះ ជាកន្លែងដែលក្រុមគ្រួសារកងទ័ព អាចមកជួបជុំគ្នា ហើយអាចចែករំលែកនូវរឿងរ៉ាវរបស់ពួកគេផងដែរ»។
សារនេះមានសារៈសំខាន់ខ្លាំងណាស់សម្រាប់លោក B.J. Lawrence នាយកប្រតិបត្តិនៃការិយាល័យអតីតយុទ្ធជនក្នុងសង្គ្រាមបរទេសដែលមានស្នាក់ការក្នុងរដ្ឋធានីវ៉ាស៊ីងតោន។ លោកក៏ធ្លាប់ជាពលបាលត្រីក្នុងកងទ័ពជើងគោកអាមេរិកក្នុងប្រទេសកូរ៉េខាងត្បូង កាលពីដើមទសវត្ស១៩៨០ផងដែរ។
លោកនិយាយថា សារមន្ទីរជាតិនេះជាកន្លែងដ៏អស្ចារ្យមួយ ហើយខណៈពេលលោកកំពុងដើរមើលសារមន្ទីរនោះ លោកបានឃើញរូបភាពទាក់ទងនឹងសង្គ្រាមកូរ៉េ ដែលធ្វើឲ្យលោកមានអារម្មណ៍ក្តុកក្តួលជាខ្លាំង។
លោកនិយាយក្នុងសម្តីដើមថា៖ «ខ្ញុំបន្តធ្វើការតស៊ូមតិដើម្បីនាំទាហានអាមេរិក ដែលបានបាត់ខ្លួនក្នុងសង្គ្រាម ត្រឡប់មកផ្ទះវិញ»។
រីឯលោកQuerfeld និយាយក្នុងសម្តីដើមថា៖ «ខ្ញុំគិតថាសារមន្ទីរនេះ នឹងជួយដល់កុមារនាពេលបច្ចុប្បន្ន និងច្រើនជំនាន់ទៅមុខទៀត ឲ្យយល់ដឹងពីអ្វីដែលបុព្វបុរសយោធារបស់គេ បានឆ្លងកាត់កាលពីអតីតកាល»។
លោក Lawrence ថ្លែងបន្តថា «សារមន្ទីរជាតិនេះបា្រប់យើងថាតើវាមានសារៈសំខាន់ប៉ុណ្ណាក្នុងការបម្រើការងារជាយោធាសម្រាប់ប្រទេសរបស់យើង ហើយវាក៏បានជួយពន្យល់ផងដែរដល់ទស្សនៈយល់ឃើញ ដែលថាហេតុអ្វីបានជាពលរដ្ឋអាមេរិក រីករាយជាមួយនឹងសេរីភាពដែលគេទទួលបានសព្វថ្ងៃនេះ»៕
ប្រែសម្រួលដោយលោក ជ្រា វណ្ណារិទ្ធ
