របាយការណ៍ថ្មីមួយរបស់សមាគមធាងត្នោតរកឃើញថា សហគមន៍ចំនួន ១១ ក្នុងរាជធានីភ្នំពេញ កំពុងជួបប្រទះបញ្ហាទាក់ទងនឹងសិទ្ធិដីធ្លី ការបណ្តេញចេញដោយអាជ្ញាធរ ហើយប្រជាពលរដ្ឋមួយចំនួនទទួលរងនូវវិបត្តិផ្លូវចិត្ត និងការបាត់បង់លំនៅដ្ឋាន។ កង្វះខាតការផ្តល់ព័ត៌មានដល់សហគមន៍ដីធ្លីក្នុងរាជធានីភ្នំពេញជាបញ្ហាមួយ ដែលត្រូវបានរកឃើញនៅក្នុងរបាយការណ៍ដែលសមាគមធាងត្នោតចេញផ្សាយនាថ្ងៃពុធនេះ។
សមាគមធាងត្នោតបានឱ្យដឹងនៅក្នុងសេចក្តីប្រកាសព័ត៌មានមួយថា របាយការណ៍នេះបានរកឃើញបញ្ហាសំខាន់ៗ ដែលសហគមន៍ទាំង ១១ ទីតាំងកំពុងជួបប្រទះ រួមមានបញ្ហាទាក់ទងនឹងសិទ្ធិដីធ្លី និងលំនៅឋាន បញ្ហាជីវភាព ប្រាក់ចំណូលធ្លាក់ចុះ ការបាក់ទឹកចិត្ត ការគំរាមកំហែងដោយអាជ្ញាធរ និងការចោទប្រកាន់ពីតុលាការ។
សេចក្តីប្រកាសព័ត៌មានបន្ថែមថា បញ្ហាទាំងនេះកើតមានឡើងដោយសារកង្វះការចែករំលែកព័ត៌មាន ឬមិនបានដាក់បញ្ចូលសហគមន៍ក្រីក្រទាំងនោះក្នុងដំណើរការពិភាក្សា និងស្វែងរកដំណោះស្រាយសម្រាប់កិច្ចការអភិវឌ្ឍន៍។
សមាគមធាងត្នោតបញ្ជាក់ថា៖ «ការណ៍នេះបណ្តាលឱ្យសហគមន៍ក្រីក្រទាំងនោះមិនទទួលបានឯកសារមួយចំនួន ដែលអាចគាំទ្រដល់ការកាន់កាប់ដីធ្លីរបស់ពួកគេ ហើយជាលទ្ធផល នៅពេលមានគម្រោងអភិវឌ្ឍន៍ពួកគេត្រូវបានតម្រូវឱ្យចាកចេញ ដើម្បីយកដីរបស់គេទៅឱ្យអ្នកផ្សេង ឬយកដីដែលពួកគេធ្លាប់កាន់កាប់ទៅអភិវឌ្ឍជាហេដ្ឋារចនាសម្ព័ន្ធផ្សេងៗ ដែលបង្កើតជាអំពើអយុត្តិធម៌សង្គម»។
បើតាមសមាគមធាងត្នោត សហគមន៍«គ្មានជម្រើសអ្វីក្រៅពីការរួបរួមគ្នា និងតស៊ូមតិ» ដើម្បីស្វែងរកអន្តរាគមន៍ពីរដ្ឋាភិបាល។
សហគមន៍ទាំង ១១ នោះ រួមមានសហគមន៍សំរោងត្បូង ស្ទឹងកំបុត បឹងឈូកមានជ័យទី ២ សាមគ្គីរុង រឿង និងសហគមន៍មួយចំនួនទៀតស្ថិតក្នុងខណ្ឌព្រែកព្នៅ ឬស្សីកែវ ច្បារអំពៅជាដើម។
ប្រធានកម្មវិធីសិទ្ធិក្នុងទីក្រុងនៃអង្គការសមាគមធាងត្នោត លោក ស៊ាង មួយឡៃ ប្រាប់វីអូអេនៅថ្ងៃពុធនេះថា ប្រជាពលរដ្ឋក្រីក្រក្នុងសហគមន៍ទាំង ១១ នោះ នៅតែបន្តជួបប្រទះបញ្ហាប្រឈមទាក់ទងទៅនឹងសិទ្ធិដីធ្លី ក៏ដូចជាការបណ្តេញចេញពីលំនៅឋានដែលពួកគេធ្លាប់រស់នៅ។ លោកបន្ថែមថា បញ្ហាដែលសហគមន៍ជួបប្រទះច្រើនជាងគេគឺពាក់ព័ន្ធនឹងដីធ្លីដែលមិនទាន់ទទួលបានប្លង់កម្មសិទ្ធិ ដូច្នេះពួកគេងាយប្រឈមនឹងការបណ្តេញចេញ ឬបង្ខំឱ្យចាកចេញ។
លោកថ្លែងថា៖ «នៅពេលដែលមានគម្រោងអភិវឌ្ឍន៍កើតឡើងគេតែងតែសួរថា អ្នកឯងមានប្លង់កម្មសិទ្ធិអត់? ប្រជាពលរដ្ឋគាត់អត់ ដល់អត់ជាទូទៅត្រូវបានចាត់ទុកថា គាត់រស់នៅហ្នឹងមិនទាន់មានលក្ខណៈជាកម្មសិទ្ធិ ហើយជាលទ្ធផល គាត់ក្លាយទៅជាជនរងគ្រោះដោយក្រោមការចាត់ទុកថា ជាអ្នកកាន់កាប់ខុសច្បាប់អ្វីជាដើម»។
បើតាមលោក ស៊ាង មួយឡៃ បញ្ហាមួយទៀតដែលប្រជាពលរដ្ឋជួបប្រទេះ គឺការមិនទទួលបានព័ត៌មាន ឬបញ្ចូលក្រុមសហគមន៍ទៅក្នុងការសម្រេចចិត្តនៅក្នុងគម្រោងអភិវឌ្ឍន៍។ លោកបន្ថែមថា រដ្ឋាភិបាលគួរតែពន្លឿនការចេញប្លង់កម្មសិទ្ធិ ហើយគួររកដំណោះស្រាយសមស្របសម្រាប់អ្នករងគ្រោះ។
អ្នកស្រី សឿន ស្រីសុត អាយុ ៣៧ ឆ្នាំ តំណាងសហគមន៍សំរោងត្បូង ក្នុងខណ្ខព្រែកព្នៅ ប្រាប់វីអូអេនៅថ្ងៃពុធនេះថា អ្នកស្រីរួមទាំងគ្រួសារចំនួន ៥ ទៀត ត្រូវបានរងការបណ្តេញចេញពីលំនៅឋានរបស់ពួកគេ តាំងពីឆ្នាំ ២០១៩ ដោយហេតុថា ផ្ទះរបស់ពួកគេសាងសង់លើដីរដ្ឋ ប៉ះចំណីផ្លូវ និងមូលហេតុផ្សេងៗទៀត។ អ្នកស្រីថា ប្រជាពលរដ្ឋត្រូវបានគំរាមកំហែងពីសំណាក់អាជ្ញាធរផងដែរ។
អ្នកស្រីថ្លែងថា៖ «គាត់(អាជ្ញាធរ)ប្រើពាក្យគំរាមកំហែងថានឹងចុះមកចាក់ដីលើដីលំនៅឋានរបស់ពួកខ្ញុំកំពុងតែនៅឬក៏ប្រើកងកម្លាំងរុះរើ ប្រសិនបើពួកខ្ញុំតតាំងឬក៏រើបម្រាសណាមួយជាមួយពួកគាត់ ពួកគាត់នឹងប្រើវិធីផ្លូវច្បាប់ទៅលើពួកខ្ញុំដែលជាប្រជាពលរដ្ឋដែលការពារដីលំនៅឋានខ្លួនឯងសោះ បែរជារងការគំរាមកំហែងខ្លាំង ហើយពួកខ្ញុំកាន់តែរើ កាន់តែគេជាន់»។
អ្នកស្រីបន្ថែមថា អ្នកស្រីបានរស់នៅក្នុងសហគមន៍សំរោងត្បូងអស់រយៈពេល ២០ ឆ្នាំមកហើយ មុននឹងមានការបណ្តេញចេញកាលពីឆ្នាំ ២០១៩។
ចំណែកលោក អ៊ី តារា ប្រជាពលរដ្ឋសហគមន៍បឹងឈូកមានជ័យថ្មី ២ ប្រាប់វីអូអេថា ប្រជាពលរដ្ឋទាំងអស់ក្នុងសហគមន៍របស់លោកនៅមិនទាន់ទទួលបានប្លង់កម្មសិទ្ធិដីធ្លី ដូច្នេះវាបង្កជាក្តីបារម្ភមួយសម្រាប់រូបលោកនិងប្រជាពលរដ្ឋផ្សេងទៀត។
លោកថ្លែងថា៖ «យើងវាអត់មានបណ្ណកម្មសិទ្ធិស្របច្បាប់ ត្រូវប្រឈម ត្រូវគេចង់ដោះដូរយើងទៅណាមកណាហ្នឹងស្រេចលើគេ។ បើយើងមានប្លង់ទៅវាស្រួល»។
វីអូអេមិនអាចសុំការអត្ថាធិប្បាយពីលោក ធីម សំអាន អភិបាលខណ្ឌព្រែកព្នៅ និងលោក ម៉ូវ ម៉ានិត អភិបាលខណ្ឌសែនសុខ បាននៅឡើយទេ។
លោក កើត ឆែ អភិបាលរងរាជធានីភ្នំពេញបានបដិសេធមិនអត្ថាធិប្បាយ ដោយឲ្យអ្នកសារព័ត៌មានទាក់ទងទៅសមាគមធាងត្នោតវិញ។
លោកបញ្ជាក់ថា៖ «អត់ទេសួរខាងគាត់ ព្រោះគាត់មិនមានធ្វើកិច្ចការហ្នឹងជាមួយសាលារាជធានីភ្នំពេញ។ គាត់ធ្វើដោយឯកតោភាគី (ប៉ះពាល់តែម្ខាង) វាយតម្លៃដោយឯកតោភាគី អ៊ីចឹងបើសិនបើក្មួយចង់សួរខាងយើងខ្ញុំ ទាល់តែឯកសារធ្វើការជាមួយខាងយើងខ្ញុំបានធ្វើការកើត»។
បើតាមសេចក្តីប្រកាសព័ត៌មាន សមាគមធាងត្នោតបានស្នើដល់រដ្ឋាភិបាលត្រូវចុះបញ្ជីដីឱ្យបានរួចរាល់មុននឹងអះអាងថា ប្រពលរដ្ឋក្រីក្ររស់នៅលើដីរដ្ឋ និងត្រូវមានតម្លាភាពក្នុងការកំណត់ដីសាធារណៈរបស់រដ្ឋ ដោយមានការចូលរួមពិគ្រោះយោបល់យ៉ាងពិតប្រាកដពីប្រជាពលរដ្ឋដែលពាក់ព័ន្ធ៕
វេទិកាបញ្ចេញមតិ