ប្រធានាធិបតីសហរដ្ឋអាមេរិកលោក Donald Trump បាននិយាយថា លោកគ្មានចំណាប់អារម្មណ៍អំពីក្ដីរំពឹងនៃការពិភាក្សាជាមួយនឹងប្រទេសអ៊ីរ៉ង់នោះទេ បន្ទាប់ពីរយៈពេលពីរសប្ដាហ៍នៃការវាយប្រហារគ្នាទៅវិញទៅមក និងបន្ទាប់ពីលោកបានដាក់ទណ្ឌកម្មថ្មីលើសេដ្ឋកិច្ចអ៊ីរ៉ង់មក។
លោក Robert O'Brien ដែលជាទីប្រឹក្សាសន្តិសុខជាតិរបស់លោក បានបញ្ជាក់នៅក្នុងកម្មវិធី Face the Nation របស់ទូរទស្សន៍ CBS កាលពីព្រឹកថ្ងៃអាទិត្យម្សិលមិញថា ប្រទេសអ៊ីរ៉ង់កំពុងប្រឈមនឹងបញ្ហាជាច្រើន ហើយមន្ត្រីអាមេរិកាំងយល់ថា នេះជាឱកាសដើម្បីបន្ថែមការដាក់សម្ពាធខ្លាំងក្លាថែមទៀតលើថ្នាក់ដឹកនាំអ៊ីរ៉ង់ និងទុកឲ្យពួកគេគ្មានជម្រើសអ្វីក្រៅពីការចរចា។
លោក Trump បានបញ្ជាក់នៅលើ Twitter កាលពីល្ងាចថ្ងៃអាទិត្យម្សិលមិញថា៖ «តាមពិត ខ្ញុំមិនចាប់អារម្មណ៍អ្វីទាំងអស់ថាតើអ៊ីរ៉ង់ចង់ចរចា ឬក៏អត់នោះ។ វាអាស្រ័យលើពួកគេទាំងស្រុង ប៉ុន្តែត្រូវតែលុបបំបាត់អាវុធនុយក្លេអ៊ែរ និងកុំសម្លាប់ប្រជាពលរដ្ឋអ៊ីរ៉ង់ដែលធ្វើការតវ៉ា»។
ការតវ៉ាប្រឆាំងនឹងរដ្ឋាភិបាលអ៊ីរ៉ង់បានផ្ទុះឡើងម្ដងទៀតកាលពីយប់ថ្ងៃអាទិត្យម្សិលមិញនៅក្នុងប្រទេសអ៊ីរ៉ង់ ដែលជាថ្ងៃទីពីរនៃការធ្វើបាតុកម្មប្រឆាំងនឹងពួកយោធា។ ពួកយោធាអ៊ីរ៉ង់ដំបូងបានបដិសេធ ប៉ុន្តែក្រោយមកបានទទួលស្គាល់ថាខ្លួនបានច្រឡំបាញ់ទម្លាក់យន្តហោះដឹកអ្នកដំណើរមួយគ្រឿងរបស់ប្រទេសអ៊ុយក្រែនកាលពីសប្ដាហ៍មុន ដោយបានធ្វើឲ្យមនុស្សទាំង ១៧៦ នាក់ដែលជិះនៅលើយន្តហោះនោះស្លាប់។
ក្រុមអ្នកតវ៉ាមួយក្រុមបានស្រែកបន្ទោរនៅខាងក្រៅសាកលវិទ្យាល័យមួយកន្លែងក្នុងទីក្រុងតេហេរ៉ង់ថា៖ «ពួកគេកុហកថាសត្រូវរបស់ពួកយើងគឺសហរដ្ឋអាមេរិក។ តាមពិតសត្រូវរបស់ពួកយើងគឺនៅទី នេះផ្ទាល់តែម្ដង»៕
