ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ឆ្មាំ​ការពារ​បដិវត្តន៍​អ៊ីរ៉ង់​ទទួល​ខុស​ត្រូវ​ចំពោះ​ការ​ធ្លាក់​យន្ត​ហោះ​អ៊ុយក្រែន


រូបឯកសារ៖ សន្តិសុខ​អ៊ីរ៉ង់​បង្ហាញ​យន្ត​ហោះ​ស៊ើប​ការណ៍​ U.S. RQ-170 នៅ​ពេល​លោក​និយាយ​ជាមួយ​លោក​ Amirali Hajizadeh ​មេ​បញ្ជាការ​ដែន​អាកាស​របស់​ឆ្មាំ​ការពារ​បដិវត្តិន៍​អ៊ីរ៉ង់។
រូបឯកសារ៖ សន្តិសុខ​អ៊ីរ៉ង់​បង្ហាញ​យន្ត​ហោះ​ស៊ើប​ការណ៍​ U.S. RQ-170 នៅ​ពេល​លោក​និយាយ​ជាមួយ​លោក​ Amirali Hajizadeh ​មេ​បញ្ជាការ​ដែន​អាកាស​របស់​ឆ្មាំ​ការពារ​បដិវត្តិន៍​អ៊ីរ៉ង់។

ឆ្មាំ​ការពារ​បដិវត្តន៍​អ៊ីរ៉ង់​សារភាព​ថា ​ខ្លួន​បាន​បាញ់​ទម្លាក់​យន្ត​ហោះ​ដឹក​អ្នក​ដំណើរ​របស់​អ៊ុយក្រែន​ដោយ​ចៃដន្យ​កាល​ពី​ដើម​សប្តាហ៍​នេះ។

លោក​ Amirali Hajizadeh ​មេ​បញ្ជាការ​ដែន​អាកាស​របស់​ឆ្មាំ​ការពារ​បដិវត្តិន៍​អ៊ីរ៉ង់ ​បាន​និយាយ​តាម​ទូរទស្សន៍​រដ្ឋ​កាល​ពី​ថ្ងៃ​សៅរ៍​ថា «ខ្ញុំ​ទទួល​ខុស​ត្រូវ​ទាំង​ស្រុង ​ហើយ​ខ្ញុំ ​នឹង​គោរព​ទៅ​តាម​ការសម្រេច»។ លោក​និយាយ​ទៀត​ថា ​លោកប្រាថ្នា​ថា ​លោក​ចង់ស្លាប់​នៅ​ពេល​ដែល​លោក​បាន​ដឹង​អំពី​ជោគ​វាសនា​របស់​យន្ត​ហោះនោះ។

លោក​ Hajizadeh បាន​និយាយ​ទៀត​ថា​ «នៅ​យប់​នោះ យើង​មានការប្រុង​ប្រៀប​ដើម្បី​ធ្វើ​សង្គ្រាម»។ លោក​និយាយ​បន្ត​ទៀត​ថា ឆ្មាំ​ការពារ​បដិវត្តន៍​បានសុំ​ឲ្យ​លប់​ចោល​ជើង​យន្តហោះ​ពាណិជ្ជកម្ម ក៏ប៉ុន្តែ ​សំណើរ​នោះ​មិន​ត្រូវបាន​គេ​ធ្វើ​តាម។

កាលពី​ព្រឹក​ថ្ងៃ​សៅរ៍ លោក​ប្រធានាធិបតី​នៃ​ប្រទេស​អ៊ុយក្រែន បាន​អំពាវនាវ​ឲ្យ​មាន​ចម្លើយ​សារភាព​ពេញ​លេញ​អំពី​កំហុសនៃ​ការ​ធ្លាក់​យន្តហោះ​ដែល​បាន​សម្លាប់​មនុស្ស ១៧៦​នាក់​នៅ​លើ​យន្តហោះ​នោះ។

លោក​ប្រធានា​ធិបតី ​Volodymyr Zelenskiy ​នៃ​ប្រទេស​អ៊ុយក្រែន និយាយ​ថា​លោក​ក៏​ចង់ឲ្យ​មាន ​«ការបើក​ការស៊ើប​អង្កេត​ឲ្យបាន​ពេញលេញ​និងជាចំហរ ​នាំពួក​អ្នក​ទទួល​ខុសត្រូវ​នៃការ​បាញ់​ទម្លាក់​យន្តហោះនោះ​ឡើង​តុលាការ ​ប្រគល់​សាក​សព​របស់​អ្នក​ស្លាប់ ​សង​ជំងឺ​ចិត្ត ​សុំទោស​ជា​ផ្លូវការ​តាមរយៈ​បណ្តាញ​ការទូត»។

លោក​ Zelenskiy​ និយាយ​ក្រោយ​មក​ថា អ៊ីរ៉ង់ ​បាន​ផ្តល់​រូបថត វីដេអូ​និង​ឧប្បករណ៍​ផ្សេង​ទៀត​ល្មម​គ្រប់គ្រាន់​ពី​ការ​ធ្លាក់នោះ ដើម្បី​មើល​ឃើញ​ថា ​ការ​ស៊ើបអង្កេត ​នឹង​ត្រូវ​ធ្វើ​ឡើង​ភ្លាម​ៗ​ជា​បន្ទាន់។

នាយករដ្ឋ​មន្រ្តី​ប្រទេស​កាណាដា​លោក​ Justin Trudeau ​បាន​ទាមទារ​ឲ្យ​មាន​តម្លាភាពនិង​យុត្តិធម៌​សម្រាប់​ក្រុម​គ្រួសារ​និង​អ្នក​ជាទី​ស្រឡាញ់​របស់​ជន​រង​គ្រោះ។ ​អ្នក​ដំណើរ​ភាគ​ច្រើន​ជា​ន​ជាតិកាណាដា​ដើម​កំណើត​អ៊ីរ៉ង់។​ ការណ៍​នេះ ​ជា​សោកនាដកម្ម​ជាតិ​មួយ ​ហើយ​ពលរដ្ឋ​កាណា​ដាទាំងអស់​កំពុង​កាន់ទក្ខ​ជាមួយ​គ្នា៕

XS
SM
MD
LG