ក្រុមអ្នកស្ម័គ្រចិត្តថ្មីចំនួន ៦២ នាក់ដែលជាក្រុមទី១៣ របស់ទីភ្នាក់ងារសហរដ្ឋអាមេរិក Peace Corps Cambodia បានធ្វើសច្ចាប្រណិធានកាលពីព្រឹកថ្ងៃសុក្រនេះ មុនពេលធ្វើដំណើរទៅរស់នៅជាមួយសហគមន៍ខ្មែរតាមបណ្តាខេត្តនានាទូទាំងប្រទេសកម្ពុជា។
អ្នកស្ម័គ្រចិត្តអាមេរិកទាំងនេះនឹងត្រូវរស់នៅជាមួយប្រជាពលរដ្ឋកម្ពុជាចំនួន៦០គ្រួសារក្នុងរយៈពេលពីរឆ្នាំ។ ពួកគេនឹងត្រូវរស់នៅតាមភូមិនិងសហគមន៍នៃតំបន់ជនបទក្នុងខេត្តតាកែវ ខេត្តកំពង់ចាម កំពង់ស្ពឺ កំពត ព្រៃវែង និងស្វាយរៀងជាដើម។
ក្នុងរយៈពេលនៃការរស់នៅអ្នកស្ម័គ្រចិត្តវ័យក្មេងទាំងនេះត្រូវផ្លាស់ប្តូរចំណេះដឹងនិងវប្បធម៌របស់ពួកគេជាមួយគ្រួសារនិងសហគមន៍ដែលទទួលឲ្យពួកគេស្នាក់នៅ។
លោក Michael Newbill ភារធារីស្ថានទូតអាមេរិកប្រចាំកម្ពុជា បានថ្លែងពីសារៈសំខាន់នៃទំនាក់ទំនងរវាងសហរដ្ឋអាមេរិក និងកម្ពុជា ដែលបានផ្តល់ឱកាសឲ្យមានការចែករំលែក និងពង្រឹងទំនាក់ទំនងនៅតាមសហគមន៍នានាក្នុងប្រទេសកម្ពុជា។
«យើងបានចំណាយពេលជាច្រើននិយាយពីតម្លៃដែលទីភ្នាក់ងារ Peace Corps ផ្តល់ឲ្យប្រទេសកម្ពុជា និងការណ៍ដែលទំនាក់ទំនងនេះជាផ្តល់ផលប្រយោជន៍ដល់ភាគីទាំងសងខាង។ ខ្ញុំមានក្តីសប្បាយរីករាយដែលយើងអាចរក្សាការយោគយល់គ្នាបានប្រសើរជាមួយនឹងរដ្ឋាភិបាលអំពីការចែករំលែករបស់យើង និងហេតុផលដែលយើងធ្វើដូច្នេះ»។
ជនស្ម័គ្រចិត្តសញ្ជាតិអាមេរិកាំងទំាង ៦២នាក់មានបុរស ២៧នាក់ និងស្រ្តី ៣៥នាក់។ ពួកគេត្រូវបានបង្រៀនភាសាខ្មែរ រៀនពីបច្ចេកទេសផ្សេងៗ និងរៀនពីវប្បធម៌ យ៉ាងហោចណាស់រយៈពេល២ខែ មុននឹងពួកគេអាចធ្វើដំណើរទៅរស់នៅតាមគេហដ្ឋានដែលបានកំណត់ទុក។
លោក Austin Gelber អ្នកស្ម័គ្រចិត្ត Peace Corps មួយរូប ដែលទើបនឹងធ្វើសច្ចាប្រណិធាន បានប្រាប់ VOA ថា លោកមានអារម្មណ៍សប្បាយរីករាយ ដោយសារតែមានការទទួលស្វាគមន៍ពីសំណាក់សហគមន៍ និងរដ្ឋាភិបាលកម្ពុជា។
លោក Austin Gelber អាយុ ២៥ឆ្នាំ ដែលនឹងបម្រើការជាគ្រូបង្រៀនអង់គ្លេសនៅខេត្តព្រៃវែង បានបន្តថា លោកសង្ឃឹមនឹងរៀនសូត្របន្ថែមពីកម្ពុជា និងស្គាល់ពីរបៀបរបបរបស់ក្រុមគ្រួសារដែលទទួលលោក។
«ខ្ញុំសង្ឃឹមថា មិនត្រឹមតែអាចចែករំលែកភាសាអង់គ្លេសរបស់ខ្ញុំជាមួយនឹងសិស្សប៉ុណ្ណោះទេ ប៉ុន្តែថែមទាំងជួយលោកគ្រូអ្នកគ្រូពង្រឹងជំនាញភាសាអង់គ្លេសរបស់ពួកគេ ក៏ដូចជាលើកកម្ពស់ជំនាញរបស់ពួកគេក្នុងការបង្រៀនក្នុងថា្នក់រៀនរបស់ខ្ញុំផងដែរ»។
លោក Brendan Stewart អាយុ ២៦ឆ្នាំ ជាអ្នកស្ម័គ្រចិត្តរបស់ទីភ្នាក់ងារ Peace Corps បានបម្រើការជាអ្នកស្ម័គ្រចិត្តជាគ្រូបង្រៀនភាសាអង់គ្លេសនៅវិទ្យាល័យក្នុងស្រុកព្រៃប្រសប់ ខេត្តក្រចេះ អស់រយៈពេល ២ឆ្នាំមកនេះ ហើយលោកកំពុងបន្តរយៈពេលមួយឆ្នាំទៀត។
«មានមូលហេតុមួយចំនួន។ ទីមួយ ខ្ញុំចូលចិត្តរស់នៅកម្ពុជាខ្លាំងមែនទែន។ ប្រជាជនកម្ពុជារួសរាយ ទទួលខ្ញុំ ជួយខ្ញុំខ្លាំងមែនទែន ពេលខ្ញុំធ្វើការនៅព្រៃប្រសប់។ ខ្ញុំស្រឡាញ់ជនជាតិខ្មែរ។ ខ្ញុំចង់បន្តធ្វើការជាមួយជនជាតិខ្មែរ»។
ភ្នាក់ងារ Peace Corps សហរដ្ឋអាមេរិក ត្រូវបានបង្កើតដោយលោកប្រធានាធិបតីសហរដ្ឋអាមេរិក John F. Kennedy កាលពីឆ្នាំ១៩៦១ ដើម្បីលើកកម្ពស់សន្តិភាព និងមិត្តភាពពិភពលោក។ ភ្នាក់ងារ Peace Corps បានមានវត្តមាននៅក្នុងប្រទេសកម្ពុជាអស់រយៈពេល១៣ឆ្នាំមកហើយ ហើយអ្នកស្ម័គ្រចិត្តដែលបានបំពេញការងារក្នុងប្រទេសកម្ពុជា មានចំនួនជាង ៦៤៣នាក់មកទល់ពេលនេះ។
លោក មាស គីមហេង អនុរដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ ថ្លែងថា៖ «កម្ពុជាឲ្យតម្លៃខ្ពស់ទៅលើការសហការ និងភាពជាដៃគូជាមួយនឹងទីភ្នាក់ងារ Peace Corps ដែលប្រកាន់ខ្ជាប់នូវសន្តិភាព និងមិត្តភាពដោយលោកប្រធានាធិបតី John F. Kennedy»។
មន្ត្រីរដ្ឋាភិបាលដដែលបានហៅការស្បថសច្ចាប្រណិធានរបស់ក្រុមអ្នកស្ម័គ្រចិត្តអាមេរិកនៅថ្ងៃនេះថាជាសក្ខីភាពនៃ«ការពង្រឹងទំនាក់ទំនងរវាងគ្នា ជំនឿទុកចិត្ត មិត្តភាព និងពង្រឹងទំនាក់ទំនងទ្វេភាគី»រវាងសហរដ្ឋអាមេរិក និងព្រះរាជាណាចក្រកម្ពុជា៕
