ក្រុមបុគ្គលិកផ្នែកជំនួយមនុស្សធម៌មិនគួរប្រថុយជីវិតចូលទៅផ្តល់ជំនួយក្នុង តំបន់ Ghouta នៃប្រទេសស៊ីរីទេ។ នេះជាការអះអាងរបស់នាយកអង្គការកាកកបាទក្រហមអន្តរជាតិប្រចាំតំបន់មជ្ឈឹមបូព៌ា ដែលបានថ្លែងបន្ទាប់ពីការវាយ ប្រហារយ៉ាងខ្លាំងកើតឡើង ហើយបានបង្អាក់ដល់កិច្ចប្រឹងប្រែងដើម្បីផ្តល់ ជំនួយមនុស្សធម៌ជូនដល់ពលរដ្ឋដែលត្រូវហ៊ុំព័ទ្ធក្នុងតំបន់នោះ។
លោក Robert Mardini បានថ្លែងថាក្រុមរបស់លោកត្រូវគេនាំត្រឡប់ មកក្រោយ វិញដោយសារការវាយប្រយុទ្ធគ្នាបានផ្ទុះឡើង បើទោះជាមានការធានាពីគូភាគី វិវាទទាំងសងខាងថាឲ្យមានការនាំយកជំនួយមនុស្សធម៌ចូលទៅទីក្រុងឌូម៉ា និងតំបន់ Ghouta ភាគខាងជើងក្តី។
តែអង្គការកាកបាទក្រហមអន្តរជាតិបានដឹកជញ្ជូនស្បៀងអាហារនិង គ្រឿងផ្គត់ផ្គង់ផ្សេងទៀតជូនទៅដល់ពលរដ្ឋចំនួន១២០០០នាក់បានសម្រេចក្នុងអំឡុងពេលមានការវាយប្រហារបានឈប់សម្រាក។
លោក Robert Mardini បានថ្លែងថា វាជារឿងសំខាន់ណាស់ ដែលការធានាត្រូវ បានគោរព ព្រោះមានតម្រូវការជំនួយយ៉ាងខ្លាំងក្នុងតំបន់នេះ។ មកដល់ថ្ងៃសៅរ៍នេះកងទ័ពស៊ីរីបន្តវាយប្រហារក្នុងភាគខាងជើងតំបន់ Ghouta៕
