គណបក្សប្រឆាំងធំរបស់កោះតៃវ៉ាន់ បានជ្រើសរើសប្រធានថ្មីដែលមានទស្សនៈបែបកំណែទម្រង់។ ការណ៍នេះបញ្ជាក់ឱ្យឃើញថាគណបក្សនេះ នឹងពិចារណាឡើងវិញចំពោះការគាំទ្ររបស់ខ្លួនដែលមានតាំងពីយូរទៅលើទំនាក់ទំនងឱ្យកាន់តែស្និទ្ធជាមួយនឹងចិន។
លោក Chiang Chi-chen ដែលជាប្រធានថ្មីនៃគណបក្សជាតិនិយមដែលមានឈ្មោះថាគណបក្ស Kuomintang ឬហៅកាត់(KMT) គឺជាអ្នកតំណាងរាស្រ្តវ័យ៤៨ឆ្នាំម្នាក់ ដែលធ្លាប់បានសន្យាកាលពីពេលយុទ្ធនាការឃោសនាថា លោកនឹងមានចំណាត់ការម៉ឺងមាត់កាន់តែខ្លាំងប្រឆាំងនឹងឥទ្ធិពលរដ្ឋាភិបាលក្រុងប៉េកាំង។
គណបក្ស KMT ចាញ់ប្រៀបគណបក្សDemocratic Progressive Party (DPP) យ៉ាងគំហុកទាំងការបោះឆ្នោតជ្រើសរើសប្រធានាធិបតី ទាំងជ្រើសរើសតំណាងរាស្រ្ត កាលពីខែមករា ពីព្រោះភាគច្រើនទំនងដោយសារគណបក្សនេះគាំទ្រជំហរចិន។ បន្ទាប់ពីការបោះឆ្នោត សមាជិកគណបក្សដែលមានវ័យក្មេងៗជាច្រើនរូបក្នុងជួរគណបក្សដែលមានអាយុកាលជាង១០០ឆ្នាំនេះ បានរុញច្រានគណបក្ស KMT ឱ្យជ្រើសរើសផ្លូវថ្មី ដែលទំនងមកពីការបរាជ័យក្នុងការទាមទាមពីរដ្ឋាភិបាលក្រុងប៉េកាំងនូវការគ្រប់គ្រងស្វយ័តលើដែនដីកោះនេះ។
ពុំមានការអបអរសាទរអ្វីពីលោកប្រធានាធិបតី Xiឡើយ
មេដឹកនាំគណបក្សកុម្មុយនីស្ត តែងតែព្យាយាមរក្សាទំនាក់ទំនងជិតស្និទ្ធជាមួយគណបក្ស KMT របស់កោះតៃវ៉ាន់នេះ ប៉ុន្តែក៏មានសញ្ញាថាអ្វីៗអាចនឹងមានការប្រែប្រួលដែរ។
នៅក្នុងរូបភាពមិនអើពើមួយ ដំបូងឡើយរដ្ឋាភិបាលក្រុងប៉េកាំងមិនដែលផ្ញើសារអបអរសាទរដល់គណបក្ស KMT ទេ ប៉ុន្តែលើកនេះបែរជាផ្ញើសារមកបន្ទាប់ពីគណបក្សនេះជ្រើសរើសប្រធានបក្សថ្មី។ កាលពីអតីតកាល គណបក្ស KMT តែងតែទទួលសារព្រមានពីប្រធានាធិបតីចិន ក្នុងនាមលោកជាប្រធានគណបក្សកុម្មុយនីស្តចិន (CCP)។
កាលពីថ្ងៃទី៧ ខែមីនា ការិយាល័យកិច្ចការតៃវ៉ាន់របស់ចិន ក្នុងពេលដែលទទួលស្គាល់ការជ្រើសរើសលោក Chiang ជាប្រធានបក្ស ចិនក៏ក្រើនរំឭកដល់គណបក្ស KMT ថាការប្រឆាំងនឹងការទាមទារឯករាជ្យភាពរបស់កោះតៃវ៉ាន់ គឺជាតម្រូវការជាមូលដ្ឋាននៃគណបក្សទាំងពីរ។
រដ្ឋាភិបាលចិនដីគោក រំពឹងថាគណបក្ស Kuomintang ដែលដឹកនាំដោយប្រធានថ្មី លោកChiang Chi-chen នឹងប្រឹងប្រែងបន្ថែមទៀតនៅក្នុងការរក្សាសន្តិភាព និងស្ថិរភាពក្នុងដែនកោះតៃវ៉ាន់ទាំងមូល។ នេះបើតាមការលើកឡើងរបស់លោក Zhu Fenglian អ្នកនាំពាក្យផ្នែករដ្ឋបាលចំណុះក្រុមប្រឹក្សារដ្ឋប្រចាំរដ្ឋធានីប៉េកាំង។
កិច្ចព្រមព្រៀងឆ្នាំ១៩៩២
ក្រុមអ្នកវិភាគជឿថា ការណ៍ដែលគណបក្សកុម្មុនីស្តចិន (CCP) មិនផ្ញើសារអបអរសាទរដល់លោក Chiang គឺអាចទាក់ទងនឹងជំហររបស់លោកនៅក្នុង"កិច្ចព្រមព្រៀងឆ្នាំ១៩៩២"។ ខ្លឹមសារដែលមានចែងនៅក្នុងកិច្ចព្រមព្រៀងឆ្នាំ១៩៩២ រវាងក្រុមប្រេសិតទីក្រុងប៉េកាំង និងកោះតៃវ៉ាន់ បានយល់ព្រមថាបញ្ហាកោះតៃវ៉ាន់គឺជារឿង "ចិនតែមួយ"។
សម្រាប់រយៈពេល២០ឆ្នាំមកនេះ ភាពមិនច្បាស់លាស់នៃខ្លឹមសារឃ្លាបែបការទូតនេះ បានធ្វើឱ្យភាគីទាំងសងខាងផ្តើមផ្លាស់ប្តូរសេដ្ឋកិច្ច និងសង្គមជាមួយគ្នាប៉ុន្តែជៀសវាងការប៉ះទង្គិចលើអធិបតេយ្យភាពកោះតៃវ៉ាន់។ ការប្រឆាំងតវ៉ាលើប្រយោគនេះរបស់លោក Chiang ដែលបានសន្យាថាអាចនឹងលុបចោលនៅអំឡុងពេលយុទ្ធនាការឃោសនាបោះឆ្នោតរបស់ អាចបង្អាក់ផែនការរយៈពេលរាប់សិបឆ្នាំក្នុងការកសាងទំនាក់ទំនងជាមួយកោះតៃវ៉ាន់។
រដ្ឋាភិបាលក្រុងប៉េកាំងបដិសេធទំនាក់ទំនងជាមួយរាល់រដ្ឋាភិបាលកោះតៃវ៉ាន់ណាដែលមិនអនុវត្តតាមកិច្ចព្រមព្រៀងឆ្នាំ១៩៩២។ ចិនបានចាត់ទុកថាជាឫសគល់នៃភាពរង្គោះរង្គើរទំនាក់ទំនងដែលមានបញ្ហារវាងគ្នានឹងគ្នាក្រោមការដឹកនាំរបស់គណបក្ស Democratic Progressive Partyនាពេលបច្ចុប្បន្នដែលបដិសេធមិនទទួលស្គាល់កិច្ចព្រមព្រៀងនោះ។
វាពិបាកស្មានដែរថាតើរដ្ឋាភិបាលក្រុងប៉េកាំងនឹងមានចំណាត់ការអ្វីប្រសិនបើគណបក្ស KMT បោះបង់ចោលកិច្ចព្រមព្រៀងឆ្នាំ១៩៩២នេះ។ នេះបើតាមការវិភាគរបស់លោក Richard Bush អ្នកជំនាញជនជាតិអាមេរិកកាំងលើកិច្ចការចិននៃវិទ្យាស្ថាន Brookings ដែលជាស្ថាប័នសិក្សាស្រាវជ្រាវមួយ។
លោក Bush បន្តថា គណបក្ស KMT "ត្រូវចាំថារដ្ឋាភិបាលក្រុងប៉េកាំងតែងតែគិតថាកិច្ចព្រមព្រៀងឆ្នាំ១៩៩២ គឺជាមូលដ្ឋានគោលសម្រាប់បង្កបញ្ហាក្រៅផ្នែកនយោបាយ"។
អ្នកជំនាញជនជាតិអាមេរិកកាំងល្បីមួយរូបទៀតលើទំនាក់ទំនងចិន-កោះតៃវ៉ាន់ គឺលោក Bonnie Glaser ជានាយកនៃគម្រោង the China Power Project នៃមជ្ឈមណ្ឌលយុទ្ធសាស្រ្ត និងសិក្សាអន្តរជាតិ បានវិភាគថា គណបក្ស KMT ត្រូវតែដើរដោយប្រុងប្រយ័ត្ន ប្រសិនបើគណបក្សនេះ កែប្រែជំហររបស់ខ្លួនលើកិច្ចព្រមព្រៀងឆ្នាំ១៩៩២។
លោក Glaser បានបន្តថា៖ «គណបក្សនេះ គួរតែរិះរកជំហរថ្មីមួយដែលអាចទាក់ទាញប្រជាប្រិយភាពច្រើនពីប្រជាជនតៃវ៉ាន់ បើមិនដូច្នេះទេ គណបក្សនេះ នឹងគ្មានឱកាសឈ្នះការបោះឆ្នោតប្រធានាធិបតីសាជាថ្មីឡើយ»។
កំណែទម្រង់គណបក្ស
បន្ទាប់ពីចូលកាន់តំណែងជាផ្លូវការកាលពីថ្ងៃទី៩ ខែមីនា លោក Chiang ដែលជាប្រធានគណបក្សវ័យក្មេងបង្អស់ក្នុងប្រវត្តិគណបក្ស មិនបានលើកឡើងពីកិច្ចព្រមព្រៀងឆ្នាំ១៩៩២ទេ និងបានស្នើសុំឱ្យគណបក្សរិះរកគំនិតថ្មីៗវិញ។
លោក Chiang បាននិយាយក្នុងពេលឡើងកាន់តំណែងថា៖ «បរាជ័យពេលបោះឆ្នោតថ្នាក់ជាតិ ពិតជាសបញ្ជាក់ឱ្យឃើញថាគណបក្សយើងនៅក្រោយស្ថានការណ៍លើទិដ្ឋភាពជាច្រើន ដែលតម្រូវជាបន្ទាន់ឱ្យមានកំណែទម្រង់ និងនវានុវត្តន៍»។
វាមិនទាន់ច្បាស់នៅឡើយថាតើគណបក្សនេះ អាចផ្លាស់ប្តូរជំហរពឹងផ្អែកលើចិនរបស់ខ្លួនបានប៉ុនណា ក្រោមការដឹកនាំរបស់លោក Chiang ដែលទទួលបានសញ្ញាបត្របណ្ឌិតផ្នែកទំនាក់ទំនងអន្តរជាតិពីសាកលវិទ្យាល័យ University of South Carolina៕
ប្រែសម្រួលដោយ កោះ សុគន្ធី
