ភ្ជាប់​ទៅ​គេហទំព័រ​ទាក់ទង

រដ្ឋមន្ត្រី​ការបរទេស​ប្រាក់​ សុខុន​ជួប​ទូត​បរទេស​នៅ​កម្ពុជា


ជំនួប​រវាង​លោក​ ប្រាក់​ សុខុន​ និង​មន្ត្រី​ទូត​ទាំង​​២៩​រូបនា​ទីក្រុង​ភ្នំពេញ​នេះ​​​ កើតមានឡើង​​តែបី​ថ្ងៃ​ប៉ុណ្ណោះ​​ បន្ទាប់​ពី​តុលាការ​ក្រុង​ភ្នំពេញ​​​សម្រេច​ចោទប្រកាន់​​និង​ឃុំ​ខ្លួន​មន្ត្រី​​​អាដហុក​បួន​រូប​ និង​អគ្គ​លេខា​ធិការ​រង​គ.ជ.ប​​​មួយ​រូប។

លោក​ ប្រាក់ សុខុន​ រដ្ឋមន្ត្រី​ការ​បរទេស​កម្ពុជា​ថ្មី​ នៅ​ថ្ងៃ​ព្រហស្បតិ៍​នេះ​ បាន​កោះ​ប្រជុំ​ជាមួយ​មន្ត្រី​អង្គទូត​ចំនួន​២៩​រូប​ប្រចាំ​នៅ​កម្ពុជា​ជា​លើក​ដំបូង​ ដើម្បី​ធ្វើ​ការ​ណែនាំ​គ្នា​ទៅ​វិញ​ទៅ​វិញ​មក​ បន្ទាប់​ពីលោក ​បាន​ឡើង​កាន់​តួនាទី​នេះ​ អស់​រយៈពេល​មួយ​ខែ​កន្លង​មក។​

ការ​កោះ​ប្រជុំ​នៅ​ថ្ងៃ​នេះ​ កើត​មាន​ឡើង​នៅ​ស្រប​ពេល​ដែល​ស្ថានភាព​នយោបាយ​កម្ពុជា​កំពុង​មាន​ភាព​តានតឹង​ ដោយ​ស្ថាប័ន​តុលាការ បាន​ចេញ​ដីកា​កោះ​ហៅ​តំណាងរាស្ត្រ​បក្ស​ប្រឆាំង​ជាបន្តបន្ទាប់​ ឲ្យ​ចូល​បំភ្លឺ​បណ្តឹង​បរិហារកេរ្តិ៍​ និង​រឿងរ៉ាវ​ស្នេហា​លួច​លាក់​ដែល​គេ​សង្ស័យ​ថា​ ជា​របស់​លោក​ កឹម សុខា​ ប្រធាន​ស្តី​ទី​គណបក្ស​សង្គ្រោះ​ជាតិ។​ ការប្រជុំ​នៅ​រសៀល​ថ្ងៃ​ព្រហស្បតិ៍​ ដដែល​នេះ​ ក៏​មិន​បាន​ផ្តោត​លើ​ការ​ឃុំ​ខ្លួន​មន្ត្រី​សិទ្ធិ​មនុស្ស​សមាគម​អាដហុក​ និង​មន្ត្រី​អង្គការ​សហប្រជាជាតិ​ ព្រមទាំង​ មន្ត្រី​នៃ​គណៈកម្មាធិការ​ជាតិ​រៀបចំ​ការ​បោះ​ឆ្នោត​(គ.ជ.ប)។​

លោក​ ជុំ​ សុន្ទរី​ អ្នក​នាំ​ពាក្យក្រសួង​ការបរទេស​កម្ពុជា​ បាន​ប្រាប់អ្នក​សារព័ត៌មាន​ ដែល​បាន​ចោទ​សួរ​អំពី​សភាព​ការណ៍នយោបាយ​កម្ពុជា​ចុងក្រោយ​ថា​ ការ​ប្រជុំ​មិនបាន​លើកឡើង​ពាក់​ព័ន្ធ​នឹង​សកម្ម​ភាព​ចាប់​ឃុំ​ខ្លួន​មន្ត្រី​សិទ្ធិ​មនុស្ស​ និង​មន្ត្រី​ គ.ជ.ប.​ ក៏ដូចជា​ការ​ចេញ​ដីកា​កោះហៅ​តំណាងរាស្ត្រ​បក្ស​ប្រឆាំង​នោះ​ទេ។​

«នៅ​ក្នុង​កិច្ច​ប្រជុំ​នេះ​ បន្ទាប់​ពី​ការ​លើក​ឡើង​របស់​ឯកឧត្តម​ទេសរដ្ឋមន្ត្រី​ គឺ​ប្រធាន​បេសកកម្ម​ទាំង​អស់​ មាន​ចំនួន​២៩​ បេសកកម្ម​ ដែល​បាន​ចូលរួម​ក្នុង​នេះ​ គេ​បាន​ មាន​មតិ​ម្តង​ម្នាក់​ ហើយ​ក្នុង​នោះ​គឺ​ពុំ​មាន​ស្ថាន​បេសកកម្ម​ណាមួយ​ លើកឡើង​ពី​សភាពការណ៍​នយោបាយ​បច្ចុប្បន្ន​ នៅ​កម្ពុជា​ទេ។​ ដូច្នេះ​អត់​មាន​ អត់​មាន​ការ​លើកឡើង​ អត់​មាន​ការ​ពិភាក្សា​ ការ​ជជែក​គ្នា​ អំពី​សភាពការណ៍​នយោបាយ​បច្ចុប្បន្ន»។​

ជំនួប​រវាង​លោក​ ប្រាក់​ សុខុន​ និង​មន្ត្រី​ទូត​ទាំង​ ២៩​រូបនា​ទីក្រុង​ភ្នំពេញ​នេះ​ កើតមានឡើង​ តែបី​ថ្ងៃ​ប៉ុណ្ណោះ បន្ទាប់​ពី​តុលាការ​ក្រុង​ភ្នំពេញ​ បាន​សម្រេច​ចោទប្រកាន់​ និង​ឃុំ​ខ្លួន​មន្ត្រី​ស៊ើប​អង្កេត​ជាន់​ខ្ពស់​បួនរូប​ នៃ​សមាគម​ការ​ពារសិទ្ធិ​មនុស្ស​អាដហុក​ និង​អគ្គ​លេខា​ធិការ​រង​គ.ជ.ប​ ​មួយ​រូប​ ​ពាក់​ព័ន្ធសំណុំរឿង​សូកប៉ាន់ ​និង​សម​គំនិត​ ដែល​កើត​ចេញពីរឿង​រ៉ាវ​ស្នេហា​លួច​លាក់​ ដែល​គេ​នៅ​មាន​មន្ទិល​ថា​ អាច​ជា​របស់​លោក​ កឹម សុខា​ អនុប្រធាន​គណបក្ស​សង្គ្រោះ​ជាតិ។​ ​មន្ត្រី​អង្គការ​សហ​ប្រជាជាតិ​មួយ​រូប​ ក៏បាន​រង​ការ​ចោទប្រកាន់ និង​តាម​ចាប់​ខ្លួន​ក្នុង​សំណុំ​រឿង​ដដែល​នេះ​ដែរ។​

ការសម្រេច​ឃុំ​ខ្លួន​នេះ​ បាន​រង​ការរិះគន់​ខ្លាំង​ៗ​ ពីក្រុម​អង្គការ​សង្គម​ស៊ីវិល​ក្នុង​ស្រុក​ និង​ក្រៅ​ប្រទេស​ ដោយ​ពួកគេ​បាន​ហៅ​ការ​ចាប់​ឃុំ​ខ្លួន​នេះ​ មាន​ការ​ជាប់​ពាក់ព័ន្ធ​នឹង​នយោបាយ។ ការសម្រេច​ឃុំ​ខ្លួន​ធ្វើ​ឡើង​ដោយតុលាការ​ ដែល​បាន​កើត​ឡើង​កាល​ពី​ពេល​ថ្មីៗ​នេះ​ ក៏​មាន​ការ​ជាប់​ពាក់​ព័ន្ធ​ ជាមួយ​នឹង​ការ​អនុវត្ត​ច្បាប់​របស់​ អង្គភាព​ប្រឆាំង​អំពើ​ពុករលួយ​ ដែល​រង​ការ​រិះគន់​ពី​អង្គការ​សង្គម​ស៊ីវិល​ជាតិ​ និង​អន្តរជាតិ​ ថា កំពុង​គាប​សង្កត់​មន្ត្រី​ការពារ​សិទ្ធិ​មនុស្ស។

កាល​ពីថ្ងៃ​ច័ន្ទ​កន្លងទៅ​ អង្គការ​តម្លាភាព​អន្តរជាតិ​ បាន​ចេញ​សេចក្តី​ថ្លែង​ការណ៍ អំពាវនាវ​ឲ្យ​អាជ្ញាធរ​កម្ពុជា​បញ្ឈប់​នូវ​ការ​យាយី​ទៅ​លើ​សង្គម​ស៊ីវិល។​ លោក​ស្រី​ អេលេណា​ ប៉ានហ្វី​ឡូវ៉ា​ (Elena Panfilova) ​អនុប្រធាន​ក្រុម​ប្រឹក្សា​ភិបាល​របស់​អង្គការ​តម្លាភាព​អន្តរ​ជាតិត្រូវ​បាន​ថ្លែង​នៅ​ក្នុង​សេចក្តី​ថ្លែងការណ៍​នោះ​ថា​ អង្គភាព​ប្រឆាំង​អំពើ​ពុករលួយ​មិន​គួរ​អនុវត្ត​តួនាទី​ខ្លួន ​ដើម្បី​យាយី​ និង​ព្យាយាម​បំបិទ​សំឡេង​សកម្មជន​សង្គម​ស៊ីវិល​ឡើយ​។

កាលពីថ្ងៃ​អង្គារ​កន្លង​ទៅនេះ​ដែរ​ ​អង្គការ​ឃ្លាំ​មើល​សិទ្ធិមនុស្ស​ Human Rights Watch​ បាន​ចេញ សេក្តីថ្លែងការណ៍ ស្នើ​ឲ្យ​រដ្ឋាភិបាល​បញ្ឈប់​យុទ្ធនាការ​កាត់​បន្ថយ​ការ​ឃ្លាំមើល​សិទ្ធិ​ក្នុង​ប្រទេស​កម្ពុជា​។​ សេចក្តី​ថ្លែង​ការណ៍​ដដែល​នេះ​ សង្កត់ធ្ងន់​ថា​ ការ​យក​មក​កាត់​ទោស​ ដែល​មាន​ការ​ជាប់​ទាក់​ទង​នឹងនយោបាយ​ បាន​គំរាម​កំហែង​ដល់​រាល់​កិច្ចការ​សិទ្ធិ​មនុស្ស​។

យ៉ាងណាក៏ដោយ​ លោក​ ជុំ សុន្ទរី​ អ្នកនាំពាក្យ​ក្រសួង​ការបទេស​ បញ្ជាក់​ប្រាប់​ អ្នក​សារព័ត៌មាន​ បន្ទាប់​ពី​ជំនួប​របស់​លោក​ ប្រាក់​ សុខុន​ និង​មន្ត្រី​អង្គទូត​ទាំងនោះ​ថា​ ការ​ប្រជុំ​នៅ​ថ្ងៃ​ព្រហស្បតិ៍​នេះ​ ក៏​ពុំបាន​និយាយ​ដល់​ដំណើរ​ការ​លទ្ធិប្រជាធិបតេយ្យ​ និង​ការ​គោរព​សិទ្ធិមនុស្ស​កម្ពុជា​ផង​ដែរ។​

លោក​ថា​ ការ​ប្រជុំ​នេះ​ ផ្តោត​ជា​សំខាន់​លើ​ការ​បន្ត​ធ្វើ​កិច្ច​សហ​ប្រតិបតិ្តការទូទៅ​រវាង​ប្រទេស​ និង​ប្រទេស​ និង​ការ​ស្វែងយល់​ពី​គ្នា​ទៅ​វិញ​ទៅ​មក៕

XS
SM
MD
LG