លោក ហង្ស វិទូ ប្រធានក្រុមអ្នកវិភាគវ័យក្មេង កំពុងរៀបចំបោះពុម្ពផ្សាយសៀវភៅដែលមានចំណងជើងថា «ទស្សនៈសង្គម និងនយោបាយរបស់លោក គឹម សុខ» ចំនួន៥.០០០ក្បាល នាពេលខាងមុខ។ សៀវភៅនេះនឹងដាក់លក់នៅតាមបណ្ណាគារ តូបលក់សៀវភៅ និងអង្គការមួយចំនួន នៅពេលឆាប់ៗខាងមុខ។
លោក គឹម សុខ អ្នកវិភាគសង្គមកំពុងត្រូវបានឃុំខ្លួនក្រោមបទ«ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបរិហាកេរ្តិ៍ជាសាធារណៈ» កាលពីខែកុម្ភៈ តាមពាក្យបណ្ដឹងរបស់លោកនាយករដ្ឋមន្ត្រី ហ៊ុន សែន។ លោក គឹម សុខ ប្រឈមនឹងការជាប់ពន្ធនាគារពី៦ខែដល់២ឆ្នាំ។
លោក ហង្ស វិទូ ថ្លែងប្រាប់ VOA ថា សៀវភៅថ្មីនេះ សង្កត់ធ្ងន់ទៅលើ គំនិតគិតជាតិ១០០ទស្សនៈ របស់លោក គឹម សុខ ដែលភាគច្រើនលើកទឹកចិត្តឲ្យពលរដ្ឋកម្ពុជាមានសាមគ្គីភាព និងមានភាពឈ្លាសវៃ ចៀសវាងការចាញ់បោកអ្នកនយោបាយជាដើម។
លោក ហង្ស វិទូ ថ្លែងថា៖
«កន្លងមក គឺយើងមានតែ ឧទាហរណ៍ថា មានអ្នកណាល្បី ពូកែ យើងគ្រាន់តែសរសេរប្រវត្តិគាត់ តិចតួច ប៉ុន្តែគំនិត ទស្សនៈវិស័យរបស់គាត់ ទាក់ទងនឹងជាតិ យ៉ាងម៉េចៗខ្លះ គឺមិនទាន់មានអ្នកណាសរសេរ ឬកត់ត្រាទុកទេ»។
លោក ហង្ស វិទូ ឲ្យដឹងបន្តទៀតថា ការបោះពុម្ពសៀវភៅនេះបានទទួលការយល់ព្រមពីលោក គឹម សុខ តាមរយៈមេធាវីរបស់លោក ព្រមទាំងទទួលបានការអនុញ្ញាតស្របច្បាប់ពីបណ្ណាល័យជាតិរួចហើយ។ ហើយលោកគ្រោងនឹងបោះពុម្ព និងដាក់លក់សៀវភៅនេះនៅតាមបណ្ណាគារ តូបលក់សៀវភៅ និងអង្គការមួយចំនួន នាពេលឆាប់ៗខាងមុខ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងប្រាប់ VOA ថា ការបោះពុម្ពសៀវភៅនេះ គឺជាការសម្រេចចិត្តរបស់អ្នករៀបរៀង ហើយលោកថា ក្នុងករណីដែលបណ្ណាល័យជាតិ បានអនុញ្ញាតឲ្យបោះពុម្ពហើយនោះ មានន័យថា សៀវភៅនេះពុំមានអ្វីឆ្គាំឆ្គងនោះទេ។
លោកបន្តយ៉ាងដូច្នេះ៖
«គាត់បោះម៉េច បោះទៅ ជាការយល់ឃើញរបស់គាត់។ បើគេនិយាយអីមានជេររដ្ឋាភិបាលអី អាហ្នឹងគេមិនឲ្យចេញផ្សាយទេ។ បើគេត្រួតពិនិត្យរួចហើយៗ យើងអត់មានអីជំទាស់ទេ»។
យ៉ាងណាក៏ដោយ លោក មាស នី អ្នកឃ្លាំមើលការវិវឌ្ឍសង្គម យល់ថា ការបោះពុម្ពសៀវភៅដើម្បីលើកទឹកចិត្តបុគ្គលណាមួយនៅក្នុងសង្គម ជាការប្រសើរហើយ។ ក៏ប៉ុន្តែ លោកថា ការបោះពុម្ពសៀវភៅគប្បីធ្វើឡើងក្នុងកាលៈទេសៈមួយដែលសមស្រប។
លោកថ្លែងថា៖
«តែសំខាន់នៅត្រង់ថា សំណួរថាតើការសរសេរបែបហ្នឹងក្នុងកាលៈទេសៈបែបហ្នឹង តើវាសមស្របដែរទេ។ ពេលខ្លះ ការសរសេរពីវីរភាពរបស់លោក កឹម សុខ ច្រើនពេក នៅពេលដែលគាត់ជាប់នៅក្នុងពន្ធនាគារ វាអាចធ្វើឲ្យកាន់តែមានការស្មុគស្មាញដល់ករណីផ្លូវច្បាប់របស់គាត់ ហើយស្ថានភាពនយោបាយបច្ចុប្បន្ន វាមានកើតរឿងជាច្រើន ជួយកាលវាអាចបង្កើតសម្ពាធនយោបាយផ្សេងទៀតដល់លោក គឹម សុខ»។
លោក មាស នី បន្ថែមទៀតថា៖
«ហើយពេលខ្លះបើសិនជាយើងលើកតម្លៃមនុស្សម្នាក់ខុសពេល វាអាចធ្វើឲ្យតម្លៃនេះ មិនទទួលបានដូចយើងចង់ទេ។ វាបែរជាទទួលបានផ្ទុយពីនេះទៅវិញ»។
ក្នុងសៀវភៅថ្មីនេះ លោក ហង្ស វិទូ បានលើកឡើងពីទស្សនៈនយោបាយសំខាន់ចំនួនមួយរបស់លោក គឹម សុខ នៅក្នុងន័យដើមដូច្នេះថា៖
«ទោះបីជាខ្ញុំមានរឿងអ្វីក៏ដោយ វាគ្រាន់តែជាការបាត់បង់វត្តមានរបស់ខ្ញុំមួយរយៈ ឬបាត់បង់ខ្ញុំតែម្នាក់ប៉ុណ្ណោះ។ តែបើបងប្អូនឈាមខ្មែរទាំងឡាយ ទាំងប្រជារាស្រ្តធម្មតា ទាំងអ្នកនយោបាយជាតិប្រជាធិបតេយ្យយល់ពីតម្លៃ នៃការរួមកម្លាំងតស៊ូឲ្យរឹងមាំទាំងអស់គ្នាដោយស្មោះ ស្មារតីមិនបោះបង់ ហើយឆ្ពោះទៅកាន់ការផ្លាស់ប្តូរមួយ នោះជីវិតជាតិយើងនៅតែរស់។ ហើយបើសិនជាបាត់បង់រូបខ្ញុំមែន វាគ្មានអ្វីគួរឲ្យសោកស្តាយឡើយ»៕
