នាយករដ្ឋមន្ត្រីអ៊ីស្រាអែលលោក Benjamin Netanyahu គ្រោងនឹងជួបជាមួយនឹងប្រធានាធិបតីអាមេរិកលោក Donald Trump នៅថ្ងៃចន្ទនេះ ហើយនឹងធ្វើដំណើរត្រឡប់ទៅប្រទេសអ៊ីស្រាអែលវិញភ្លាមៗ ដោយបង្រួមដំណើរទស្សនកិច្ចរបស់លោក ដោយសារតែមានស្ថានការណ៍វាយប្រហារដោយគ្រាប់រ៉ុក្កែតចេញពីតំបន់ Gaza Strip មកលើប្រទេសអ៊ីស្រាអែល។
លោក Netanyahu បានគ្រោងពិសាអាហារពេលល្ងាចនៅសេតវិមានប្រធានាធិបតីអាមេរិកនៅថ្ងៃអង្គារស្អែក និងបានគ្រោងថ្លែងសុន្ទរកថាទៅកាន់អង្គការគណៈកម្មាធិការកិច្ចការសាធារណៈអាមេរិកអ៊ីស្រាអែល (American Israel Public Affairs Committee) ដែលជាអង្គការបញ្ចុះបញ្ចូលគោលនយោបាយគាំទ្រជនជាតិជ្វីប។
លោកបានសន្យានៅក្នុងសេចក្ដីប្រកាសមួយដែលប្រកាសអំពីការផ្លាស់ប្ដូរគម្រោងទស្សនកិច្ចរបស់លោកនេះថា ប្រទេសអ៊ីស្រាអែលនឹងឆ្លើយតបដោយកម្លាំងចំពោះអ្វីដែលលោកហៅថាជា «ការវាយប្រហារឧក្រិដ្ឋកម្ម» លើប្រទេសអ៊ីស្រាអែល។
គ្រាប់រ៉ុក្កែតដែលបាញ់ចេញពីតំបន់ Gaza Strip នោះ បានធ្លាក់ចំផ្ទះមួយខ្នងនៅភាគកណ្ដាលប្រទេសអ៊ីស្រាអែល ស្ថិតនៅភាគឦសាននៃទីក្រុង Tel Aviv ដោយធ្វើឲ្យមនុស្ស ៧ នាក់រងរបួស។
យោធាអ៊ីស្រាអែលបានចោទប្រកាន់លើក្រុមសកម្មប្រយុទ្ធ Hamas ថាជាអ្នកធ្វើការវាយប្រហារនេះ។ យោធាអ៊ីស្រាអែលបានបញ្ជាក់ថា ខ្លួននឹងតបតវិញ ដោយការបញ្ជូនទាហានទៅកាន់ព្រំដែនតំបន់ Gaza។
ដំណើរទស្សនកិច្ចដ៏ខ្លីរបស់លោក Netanyahu ទៅកាន់សហរដ្ឋអាមេរិកនេះ បានធ្វើឡើងស្របពេលដែលលោកស្វែងរកការគាំទ្រផ្នែកនយោបាយនៅក្នុងការបោះឆ្នោតឡើងវិញដ៏តឹងតែងដែលគ្រោងនឹងធ្វើឡើងនៅថ្ងៃទី ៩ ខែមេសាខាងមុខ និងស្របពេលដែលលោក Trump គ្រោងនឹងទទួលស្គាល់ជាផ្លូវការនូវអធិបតេយ្យភាពរបស់អ៊ីស្រាអែលលើតំបន់ Golan Heights ដែលមានជម្លោះ៕
