បន្ទាប់ពីមានការលួចចូលក្នុងគេហទំព័រផ្សព្វផ្សាយបញ្ជីឈ្មោះអ្នកបោះឆ្នោត គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសពីការសហការជាមួយស្ថាប័នមានសមត្ថកិច្ចដើម្បីតាមចាប់ជនដែលប្រព្រឹត្ត ល្មើសមកអនុវត្តទោសតាមច្បាប់។ អ្នកឃ្លាំមើលការបោះឆ្នោតលើកឡើងថា សមត្ថកិច្ចគួរពន្លឿនការតាមចាប់អ្នកដែលលួច Hack ចូលក្នុងគេហទំព័រនោះ ដើម្បីទំនុកចិត្តអ្នកបោះឆ្នោត។
គណៈកម្មាធិការជាតិរៀបចំការបោះឆ្នោត កំពុងសហការជាមួយក្រសួងមហាផ្ទៃ និងអ្នកជំនាញ ដើម្បីស្វែងរកអ្នកដែលលួចចូល ឬហៅថា Hacker ដែលបានចូល Hack គេហទំព័ររបស់ខ្លួន។ នេះបើតាមការឲ្យដឹងពីអ្នកនាំពាក្យ គ.ជ.ប ។
គេហទំព័រ www.voterlist.org.kh ជាគេហទំព័រដែលមានបង្ហោះបញ្ជីឈ្មោះអ្នកបោះឆ្នោតជិត៨លាននាក់ សម្រាប់ឲ្យប្រជាពលរដ្ឋដែលបានចុះឈ្មោះបោះឆ្នោត ស្វែងរកឈ្មោះរបស់ពួកគេលើគេហទំព័រនោះ។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) ប្រាប់ VOA នៅថ្ងៃពុធនេះថា នៅដើមឆ្នាំ២០១៧នេះ គេហទំព័ររបស់គ.ជ.ប. ដែលបង្ហោះបញ្ជីឈ្មោះអ្នកបោះឆ្នោតនេះត្រូវបានគេលួច Hack ចំនួន២ដងរួចមកហើយ។ លោកបន្តថា អ្នកដែល Hack នោះអាចមានបំណងបំផ្លាញបញ្ជីឈ្មោះអ្នកបោះឆ្នោត ដើម្បីរំខានដល់ការបោះឆ្នោត ធ្វើឲ្យពលរដ្ឋបាត់ទំនុកចិត្តមកលើ គ.ជ.ប។
លោក ហង្ស ពុទ្ធា បន្ថែមថា បើទោះបីជាការ Hack នោះមិនធ្វើឲ្យប៉ះពាល់ដល់ទិន្នន័យក្នុងគេហទំព័រនោះក៏ដោយ ក៏ (គ.ជ.ប) កំពុងសហការជាមួយក្រសួងមហាផ្ទៃ និងអ្នកជំនាញ តាមចាប់អ្នក Hack ដើម្បីរក្សាបរិយាកាសមុនការបោះឆ្នោតឲ្យប្រព្រឹត្តទៅដោយរលូន។
លោកបញ្ជាក់ប្រាប់ VOA ថា៖
«គ.ជ.ប មានការសហការជាមួយស្ថាប័នពាក់ព័ន្ធ ពិសេសស្ថាប័នដែលធ្វើការងារលើផ្នែកសន្តិសុខខាងផ្នែកបច្ចេកវិទ្យា។ ចំពោះចំណាត់ការបែបណានោះ មិនទាន់មានការសម្រេចទេ។ ប៉ុន្តែបញ្ហាសំខាន់ គឺ (គ.ជ.ប) ខ្លួនឯងហ្នឹងរៀបចំការការពារ និងមានភាពប្រុងប្រយ័ត្នបន្ថែមទៀត ទៅលើអ្វីដែលជាសមត្ថកិច្ចរបស់ខ្លួន»។
លោក ហង្ស ពុទ្ធា សុំមិនប្រាប់ពីតម្រុយរបស់អ្នកដែល Hack នោះទេ ដោយលោកអះអាងថា សមត្ថកិច្ចកំពុងស៊ើបអង្កេត។ ប៉ុន្តែកន្លងមកលោកធ្លាប់ប្រាប់ថា អ្នកដែល Hack នោះត្រូវបានគេដឹងថា កំពុងរស់នៅក្រៅប្រទេស។
លោក ខៀវ សុភ័គ អ្នកនាំពាក្យក្រសួងមហាផ្ទៃប្រាប់ VOA ថា សមត្ថកិច្ចត្រៀមខ្លួនក្នុងការស្វែងរកអ្នកដែល Hack គេហទំព័ររបស់ គ.ជ.ប ដើម្បីយកមកផ្តន្ទាទោសតាមច្បាប់ នៅពេលទទួលបានបណ្តឹងពី (គ.ជ.ប)។
ថ្មីៗនេះមានការបង្ហោះតាមបណ្តាញអ៊ីនធឺណិតដែលនិយាយពីសមត្ថភាពរបស់ Hacker ក្នុងការលួចចូលទៅលុប ឬបំផ្លាញទិន្នន័យបោះឆ្នោតតាមវិធីសាស្រ្តផ្សេងៗ ដោយមានបង្ហាញពីរូបភាពនៃការ Hack ចូលក្នុងគេហទំព័ររបស់ (គ.ជ.ប) ផងដែរ។ ទោះជាយ៉ាងណា លោក ហង្ស ពុទ្ធា បានច្រានចោលព័ត៌មាន និងរូបភាពទាំងនោះ ថាជាការមិនពិត។
លោក យឿង សុធារ៉ា មន្រ្តីច្បាប់ និងអង្កេត នៃអង្គការឃ្លាំមើលការបោះឆ្នោតនៅកម្ពុជា ហៅកាត់ថា ខុមហ្រ្វែល ប្រាប់ VOA ថា ដោយសារការបោះឆ្នោតនៅកម្ពុជាធ្វើឡើងតាមបែបបុរាណ មិនមែនតាមអ៊ីនធឺណិតដូចប្រទេសជឿនលឿនមួយចំនួន ដូច្នេះលោកថា ការលួច Hack ចូលគេហទំព័ររបស់ គ.ជ.ប នឹងមិនធ្វើឲ្យប៉ះពាល់ដល់លទ្ធផលនៃការបោះឆ្នោតនោះទេ។
លោក យឿង សុធារ៉ា បន្ថែមថា បើទោះជាការ Hack នេះមិនធ្វើឲ្យប៉ះពាល់ដល់ការបោះឆ្នោត ប៉ុន្តែលោកថា ទង្វើនេះជាអំពើខុសច្បាប់ដែលសមត្ថកិច្ចត្រូវតែស្វែងរកជនបង្កមកផ្តន្ទាទោស ដើម្បីធានាដល់ទំនុកចិត្តរបស់ប្រជាពលរដ្ឋសម្រាប់ការបោះឆ្នោតក្នុងពេលខាងមុខ។
លោកបញ្ជាក់ថា៖
«វាជាអំពើល្មើសច្បាប់ ដូច្នេះសមត្ថកិច្ចត្រូវតែចាត់វិធានការតាមផ្លូវច្បាប់។ អានេះជាកិច្ចការរំខានដល់ការងាររបស់ (គ.ជ.ប) ហើយម្យ៉ាង ទៀតក៏ធ្វើឲ្យសាធារណជន មានការភាន់ច្រឡំដែរ នៅពេលដែលមានសារអីមួយថាជាសេចក្តីសម្រេចរបស់ (គ.ជ.ប ) គាត់ដាក់ Post (បង្ហោះ) ក្នុងវេបសាយហ្នឹងទៅ ធ្វើឲ្យអ្នកសារព័ត៌មានយកទៅចុះផ្សាយ។ សាធារណជនមើលទៅមានការភាន់ច្រឡំ។វាធ្វើឲ្យប៉ះពាល់ដល់កិច្ចការ ឬក៏កិត្តិយសរបស់ (គ.ជ.ប) ដែរ»។
ការបោះឆ្នោតជ្រើសរើសក្រុមប្រឹក្សាឃុំសង្កាត់នឹងត្រូវធ្វើឡើងនៅថ្ងៃទី៤ ខែមិថុនា ឆ្នាំ២០១៧ ខាងមុខនេះ ដោយមានអ្នកចុះឈ្មោះបោះឆ្នោតសរុបជិត៨លាននាក់។ ចំណែកការបោះឆ្នោតថ្នាក់ជាតិនឹងត្រូវធ្វើឡើងនៅពាក់កណ្តាលឆ្នាំ ២០១៨ ស្របពេលដែលមជ្ឈដ្ឋានជាតិ និងអន្តរជាតិមួយចំនួនបារម្ភពីបរិយាកាសនៃការបោះឆ្នោត ខណៈពេលដែលគណបក្សប្រឆាំងកំពុងប្រឈមនឹងបញ្ហាក្បាលម៉ាស៊ីនដឹកនាំ៕
