អង្គការអូតង់និយាយថា ក្រុមជ្រុលនិយមអាចឆ្លងកាត់សមុទ្រម៉េឌីទែរ៉ាណេតាមទូករត់ពន្ធរបស់ជនចំណាកស្រុកដើម្បីមកដល់បណ្តាប្រទេសក្នុងសហគមន៍អឺរ៉ុប។
ថ្លែងទៅកាន់ក្រុមអ្នកយកព័ត៌មាននៅក្នុងទីក្រុងព្រុចសែល (Brussels) កាលពីថ្ងៃព្រហស្បតិ៍ ឧត្តមសេនីយ៍កងទ័ពអាកាសសហរដ្ឋអាមេរិក Philip Breedlove ដែលជាមេបញ្ជាការកងទ័ពរបស់អង្គការអូតង់ដែរនោះបាននិយាយថា សម្ព័ន្ធមិត្ត សង្ស័យថា សមាជិកក្រុមឧក្រិដ្ឋកម្មមានការរៀបចំនិងសមាសភាពរបស់ក្រុមជ្រុលនិយមអាចស្ថិតនៅក្នុងចំណោមជនភៀសខ្លួនស្របច្បាប់ដែលកំពុងព្យាយាមគេចចេញពីការប្រយុទ្ធនិងភាពក្រីក្រនៅក្នុងតំបន់មជ្ឈឹមបូព៌ាប្រទេសនិងតំបន់អាហ្វ្រិកខាងជើង។
លោកឧត្តមសេនីយ៍និយាយថា «យើងមិនដឹងថាមានអ្វីនៅក្នុងចំណោមជនចំណាកស្រុកទាំងនោះដែលកំពុងឆ្លងកាត់សមុទ្រមីឌែទែរ៉ាណេដោយចាកចេញពីតំបន់អាហ្វ្រិកខាងជើងចូលក្នុងប្រទេសនានានៅអឺរ៉ុបនោះទេ។ ហើយ យើងមានការព្រួយកង្វល់អំពីចលនាទាំងអស់នេះ។ មនុស្សខ្លះក្នុងចំណោមមនុស្សទាំងអស់នោះជាជនភៀសខ្លួនស្របច្បាប់មកពីទីកន្លែងដែលគ្មានការគ្រប់គ្រង មនុស្សខ្លះទៀតត្រូវបានយើងជឿជាក់ថា ជាឧក្រិដ្ឋកម្មមានការរៀបចំ ហើយអាចមានសមាសភាពក្រុមជ្រុលនិយមខ្លះក្នុងចំណោមពួកគេ ហើយនេះជាបញ្ហាដែលយើងចាំបាច់ត្រូវដោះស្រាយ»។
សហភាពអឺរ៉ុបបានយល់ព្រមឲ្យមានបេសកម្មនាវាកាលពីថ្ងៃច័ន្ទដើម្បីសំដៅលើក្រុមជនអន្ធពាលដែលរត់ពន្ធជនចំណាកស្រុកមកពីប្រទេសលីប៊ី។
រដ្ឋមន្រ្តីការបរទេសអ៊ីតាលី Paolo Gentiloni ដែលប្រទេសរបស់លោកកំពុងទទួលចំនួនជនចំណាកស្រុកដ៏ច្រើនបំផុតបានស្នើថា អង្គការអូតង់អាចរួមវិភាគទានដល់កិច្ចប្រតិបត្តិការរបស់សហភាពអឺរ៉ុបដោយកែប្រែបេសកកម្មនាវាប្រឆាំងភេរវកម្មដែលខ្លួនមាននៅក្នុងសមុទ្រមីឌែទែរ៉ាណេនោះ៕
