បន្ទាប់ពីបានបង្ហាញនូវសាមគ្គីភាពប្រឆាំងនឹងភាពគឃ្លើនណាមួយរបស់ប្រទេសរុស្ស៊ីលើប្រទេសអ៊ុយក្រែនមក រដ្ឋមន្ត្រីការបរទេសនៃបណ្ដាប្រទេសដែលជាសមាជិកអង្គការអូតង់ (NATO) នឹងបិទបញ្ចប់កិច្ចប្រជុំរយៈពេលពីរថ្ងៃរបស់ពួកគេនៅក្នុងប្រទេសឡេតូនីនៅថ្ងៃពុធនេះ ដោយផ្តោតលើស្ថានការណ៍នៅក្នុងប្រទេសអ៊ុយក្រែន ហ្សកហ្ស៊ី និងអាហ្វហ្គានីស្ថាន។
ដោយលើកឡើងអំពីការចល័តកងទ័ពរបស់រុស្ស៊ីនៅជិតព្រំដែនជាមួយប្រទេសអ៊ុយក្រែន អគ្គលេខាធិការអង្គការអូតង់លោក Jens Stoltenberg បានប្រាប់ក្រុមអ្នកសារព័ត៌មានកាលពីថ្ងៃអង្គារម្សិលមិញថា៖ «ពុំមានភាពច្បាស់លាស់ណាមួយអំពីចេតនាពិតប្រាកដរបស់ប្រទេសរុស្ស៊ីនៅឡើយទេ [ជុំវិញរឿងនេះ]»។
លោក Stoltenberg បានបន្ថែមថា៖ «វាមិនសំខាន់នោះទេថា តើការលុកលុយរបស់ប្រទេសរុស្ស៊ីមានចំនួន ២០% ឬ ៨០% នោះ។ [អ្វីដែលសំខាន់] គឺយើងចាំបាច់ត្រូវត្រៀមខ្លួនសម្រាប់ស្ថានការណ៍ដ៏អាក្រក់បំផុតណាមួយដែលអាចកើតឡើង»។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បានព្រមានប្រទេសរុស្ស៊ីថា៖ «ភាពគឃ្លើនជាថ្មីណាមួយ [របស់រុស្ស៊ី] នឹងធ្វើឱ្យរុស្ស៊ីទទួលរងនូវផលវិបាកធ្ងន់ធ្ងរ»។
ប្រធានាធិបតីរុស្ស៊ីលោក Vladimir Putin បានព្រមានតបវិញកាលពីថ្ងៃអង្គារថា យោធារបស់រុស្ស៊ី អាចបង្ខំចិត្តឆ្លើយតបចំពោះការពង្រីកហេដ្ឋារចនាសម្ព័ន្ធយោធាក្នុងប្រទេសអ៊ុយក្រែន ដែលដឹកនាំដោយបស្ចិមប្រទេស ប្រសិនបើអង្គការអូតង់ឆ្លងហួស «បន្ទាត់ក្រហម»៕
លោក Alex Yanevskyy ចូលរួមចំណែកនៅក្នុងសេចក្តីរាយការណ៍នេះ ហើយនឹងព័ត៌មានខ្លះនៅក្នុងសេចក្ដីរាយការណ៍នេះ ត្រូវបានដកស្រង់ពីទីភ្នាក់ងារព័ត៌មាន Associated Press និងទីភ្នាក់ងារព័ត៌មាន Reuters។
