ភ្ជាប់​ទៅ​គេហទំព័រ​ទាក់ទង

រាត្រី​ជួបជុំ​ជាតិ​នាំ​អ្នក​ជិត​ខាង​ឲ្យ​រួម​គ្នា​ប្រយុទ្ធ​ប្រឆាំង​នឹង​ឧក្រិដ្ឋកម្ម

  • Deborah Block

ក្មេងប្រុសម្នាក់ចាប់ដៃជាមួយ​នឹង​មន្រ្តីប៉ូលិស​លោក Anthony Patalena ក្នុង​ក្រុង Fairfax Country រដ្ឋ Virginia កាល​ពី​ថ្ងៃ​ទី០២ ខែសីហា ឆ្នាំ​២០១៦។

លំនៅ​ដ្ឋាន​របស់​សហគមន៍​នៅ​ក្នុង​ក្រុង Fairfax ​នៃ ​រដ្ឋ ​ Virginia ​នៅ​ជាយ​រដ្ឋធានី​វ៉ាស៊ីនតោន​ឌីស៊ី​ ក្មេង​ប្រុស​តូច​ម្នាក់​​ដើរ​ដោយ​អឹនអៀន​ទៅ​ជិត​មន្ត្រី​ប៉ូលិស ​Anthony ​Patalena ​និង​បាន​ត្រដាង​ដៃ​របស់​ខ្លួន។ «សូម​អរគុណ​ដែល​បាន​ជួយ​ពួក​យើង» ក្មេង​ប្រុស​នោះ​បាន​និយាយ​ខណៈ​ពេល​ដែល​មន្រ្តី​ប៉ូលិស​ចាប់​​ដៃ​របស់​ខ្លួន​ហើយ​ញញឹម។

នៅ​ទី​នេះ​ នៅ​ឯ​សង្កាត់​ដែល​ត្រូវ​បាន​គេ​ហៅ​ថា​ Grove ក្នុងឧទ្យាន​ ​Huntley ​Meadows ​អ្នក​ស្រុក​បាន​ប្រមូល​ផ្តុំ​គ្នា​ដើម្បី​ពិសា​ការ៉េមនៅ​ខាង​មុខ​ផ្ទះ​ដែល​មាន​អាង​ហែល​ទឹក​មួយ​ ហើយ​និង​ដើម្បីស្គាល់​គ្នាអោយ​បាន​ច្បាស់​និង​ជួយ​រក្សា​សុវត្ថិភាព​នៅ​ក្នុង​តំបន់​រស់​នៅ។

រាត្រីជួប​ជុំជាតិ​គឺ​ជា​ ព្រឹត្តិការណ៍​ប្រចាំ​ឆ្នាំ​នៅ​ក្នុង​តំបន់​មួយ​ចំនួន​ក្នុង​សហរដ្ឋអាមេរិក​នៅ​ថ្ងៃ​អង្គារ​សប្តាហ៍​ទី​មួយនៃ​ខែ​សីហា​ដើម្បី​ជួយ​ទប់​ស្កាត់​ឧក្រិដ្ឋកម្ម​នានា។

នៅ​ទូទាំង​សហរដ្ឋអាមេរិក​ ប្រជាជនរាប់​សែន​នាក់​នៅ​ក្នុងសហគមន៍រាប់​ពាន់​បានប្រមូល​ផ្តុំ​គ្នា​ដើម្បី​ប្រារព្ធ​ពិធី​ជប់​លាង​តាម​តំបន់​រស់​នៅ​ ​ការ​ចំអិន​អាហារ​ទទួលទាន​ជួបជុំ​ក្រៅ​ផ្ទះ និង​ព្រឹត្តិការណ៍​ផ្សេង​ទៀត​ ដើម្បី​លើក​កម្ពស់ការ​សហការ​គ្នារវាង​ប្រជា​ជន​តាម​តំបន់​រស់​នៅ​នានា ​និង​នគរបាល។

ប៉ូលិស​ឈាង​ចូល​ជា​ញឹកញយ​ដើម្បី​ចូល​រួម​ដូច​ជា មន្រ្តីប៉ូលិស​លោក Anthony Patalena និងលោក Tyler Timberlake ដែល​អ្នក​ទាំង​ពីរ​នេះ​ដើរ​ល្បាត​សង្កាត់​ដោយ​ការ​ជិះ​កង់។

លោក Timberlake ​និយាយ​ថា ​លោក​គិត​ថា​ រាត្រី​ជួបជុំ​ជាតិ​គឺ​អស្ចារ្យ​ណាស់​ដោយ​សារ​តែ​ លោកអាច​ជួយ​ប្រជាជន​ដែល​មាន​ការ​ព្រួយ​បារម្ភ​ពី​សុវត្ថិភាព​របស់​ពួក​គេ​ហើយ​វា​ « ធ្វើ​ឲ្យ​យើង​រៀន​ពី​គ្នា​ជាមួយ​នឹង​កុមារ»។ លោក Patalena យល់​ស្រប​នៅ​ពេល​ដែល​គាត់​ប្រគល់​ផ្លាក​សម្គាល់​ដែល​មាន​បិត​ក្រដាស​ពណ៌​ប្រាក់​នៅ​លើ​ពាក្យ «មន្ត្រី​ថ្នាក់​ក្រោម» ឲ្យ​ទៅ​កុមារ​ពាក់។

មន្រ្តី​ប៉ូលិស​លោក Anthony Patalena និង​លោក Tyler Timberlake និយាយ​ជាមួយ​នឹង​ប្រជាជន​ម្នាក់​អំឡុងពេល​រាត្រីជួបជុំជាតិ​ក្នុង​ក្រុង Fairfax Country រដ្ឋ Virginia កាល​ពី​ថ្ងៃ​ទី០២ ខែ​សីហា ឆ្នាំ​២០១៦។
មន្រ្តី​ប៉ូលិស​លោក Anthony Patalena និង​លោក Tyler Timberlake និយាយ​ជាមួយ​នឹង​ប្រជាជន​ម្នាក់​អំឡុងពេល​រាត្រីជួបជុំជាតិ​ក្នុង​ក្រុង Fairfax Country រដ្ឋ Virginia កាល​ពី​ថ្ងៃ​ទី០២ ខែ​សីហា ឆ្នាំ​២០១៦។

លោក ​Kenyatta ​Williams​ ដែល​កូន​ប្រុស​របស់​គាត់​បាន​ផ្លាក​និង​មាន​ឱកាស​អង្គុយ​នៅ​ពី​ក្រោយ​កង់​រថយន្ត​របស់​ប៉ូលិស​បាន​និយាយ​ថា​ នាង​ចូលចិត្ត​រាត្រី​ជួបជុំ​ជាតិត្រង់​ថា រាត្រី​នេះ ​«អនុញ្ញាត​ឲ្យ​កុមារ​បាន​និយាយ​ជាមួយ​ប៉ូលិស​ពី​ព្រោះ​ជា​ធម្មតា​ពួក​គេ​មិន​អាច​ធ្វើ​ដូច្នោះ​បាន​ទេ»។

លោក ​Matt​ Peskin ​ដែល​បាន​ផ្តួច​ផ្តើម​រាត្រី​ជួបជុំជាតិ​កាល​ពី​៤២​ឆ្នាំ​មុន​បាន​និយាយ​ថា៖ «ភាគ​ច្រើន​នៅ​ពេល​ដែល​នរណា​ម្នាក់​ជួប​ជាមួយ​មន្រ្តី​ប៉ូលិស​ គឺ​វា​ស្ថិត​នៅ​ក្រោម​កាលៈទេសៈ​អវិជ្ជមាន​ដូច​ជា​ចោរ​លួច ​អគ្គិភ័យ​ ឬ​រឿង​ចរាចរណ៍។ អ្នក​កំពុង​ជួប​ប្រជុំ​មន្រ្តី​ក្រោម​កាលៈទេសៈវិជ្ជមាន​ហើយ​ទំនាក់​ទំនង​នេះ​គឺ​ មាន​សារៈ​សំខាន់​ខ្លាំង​ណាស់​ក្នុង​ការ​ទប់ស្កាត់​បទ​ល្មើស​និង​រក្សា​សុវត្ថិភាព​ក្នុង​តំបន់​។

លោកPeskin ​ដែល​ជា​ស្ថាបនិក​និង​ជា​ប្រធាន​នៃ​សមាគមជាតិ​នៃ​ក្រុម​ឃ្លាំ​មើល​ទីក្រុង​ (National​ Association ​of​ Town ​Watch)​ បាន​និយាយ​ថា​ លោក​មាន​គំនិត​នេះ​នៅ​ពេល​ដែល​លោក​សរសេរ​ព្រឹត្តិប័ត្រ​ឃ្លាំ​មើល​សហគមន៍​របស់​គាត់។ ក្នុង​អំឡុង​ទសវត្សរ៍​ឆ្នាំ ៨០ លោក ​Peskin​ ពន្យល់​ថា​ បទ​ល្មើស​ក្នុងលំនៅ​ដ្ឋាន​បាន​កើន​ឡើង​ ជាពិសេស​ការ​គាស់​ផ្ទះ​ដោយសារ​តែ​មនុស្ស​ចាកចេញ​ពី​ផ្ទះ​ទៅ​ធ្វើ​ការ។ លោក​បាន​និយាយ​ថា​ ផ្នត់​គំនិត​នៅ​ពេល​នោះ​ គឺ​ឲ្យ​មនុស្ស​ចាក់​សោ​នៅ​ក្នុង​ផ្ទះ ​ជាជាង​រក​វិធី​ដើម្បី​ទប់​ស្កាត់​បទ​ល្មើស​ក្នុង​កិច្ច​សហការ​រួម​របស់​សហគមន៍» ។

រាត្រី​ជួបជុំ​ជាតិ​បាន​ចាប់​ផ្តើម​ដោយ​អ្នក​ជិត​ខាង​ចេញ​មក​បើក​ភ្លើង​រាន​ហាល​របស់​ពួក​គេ​ហើយ​អង្គុយ​នៅ​មុខ​ផ្ទះ​។

នាង​ Melissa Allen ដែល​បាន​ចូល​មក​ញ៉ាំ​ការ៉េម​ដើម្បី​ជួប​ជុំ​ជា​មួយ​ប្តី​និង​កូន​ប្រុស​តូច​ពីរ​នាក់​របស់​នាង​ចូល​ចិត្ត​ត្រង់​ថា​ «សហគមន៍​ជួបជុំគ្នា​ដើម្បី​ជួយ​ការពារគ្នា​ទៅ​វិញ​ទៅ​មក»​ ហើយ​ថា «​វា​ជា​វិធី​នៃ​ការ​បង្ហាញ​ដល់​កូន​របស់​នាង​ថា​ ពួកគេ​មិន​ចាំ​បាច់​ខ្លាច​ប៉ូលិស​នោះ​ទេ»។

លោក​ Gary​ Kosciusko​ បាន​បន្ថែម​ថា ​វាបានផ្ដល់​ឱកាស​ឲ្យលោក​និយាយ​ជាមួយ​ប៉ូលិស​អំពី​រូប​គំនូរលើ​ជញ្ជាំង​ផ្ទះ​របស់​ក្រុម​ក្មេង​ទំនើងនៅ​ក្បែរ​សហគមន៍​។ លោក​និយាយ​ថា «សង្ឃឹម​ថា​ យើង​អាច​លុបរូបនោះ​ចេញ ដូច្នេះ​វា​នឹង​បង្អាក់​សកម្មភាព​ក្រុម​ក្មេង​ទំនើង​នៅ​ក្នុង​តំបន់​នេះ»។

ស្ថានីយ​ប៉ូលិស​មួយ​ចំនួន​បាន​ចាត់​វិធានការ​បន្ថែម​ដើម្បី​ការពារ​មន្ត្រី​របស់​ខ្លួន​បន្ទាប់​ពី​មាន​ការ​បាញ់​ប្រហារ​របស់​ប៉ូលិស​នៅ​រដ្ឋ ​Louisiana រដ្ឋ ​Minnesota​ និង​រដ្ឋ Texas ។

លោក​ Robert ​Urps ​មន្រ្តី​ការពារ​ឧក្រិដ្ឋកម្ម​នៅ​ស្ថានីយ​ Mount ​Vernon​ ក្នុង​ក្រុង Fairfax Country ​បាន​ឲ្យ​ដឹង​ថា ​បើ​ទោះ​បី​ជា​លោក​មិន​គិត​ថា នឹង​មាន​អ្វី​កើត​ឡើង​ទាំង​សុវត្ថិភាព​ឬ​បទ​ល្មើស​ក្នុងសហគមន៍​ក៏​ដោយ​ មន្ត្រី​ប៉ូលិស​ចំនួន​ពីរ​រូប​ត្រូវ​បាន​គេ​ដាក់​នៅ​ក្នុង​រថយន្ត​ក្នុង​ពេល​រាត្រី​ជួបជុំជាតិ «ដើម្បី​សុវត្ថិភាព​របស់​ពួក​គេ»៕

ប្រែ​សម្រួល​ដោយ ​ផន​ បុប្ផា

XS
SM
MD
LG