រដ្ឋសភាឯកបក្សរបស់កម្ពុជា នៅថ្ងៃអង្គារនេះ បានស្នើសុំក្រសួងសុខាភិបាល ធ្វើតេស្តរកមើលវីរុសកូរ៉ូណាដែលបង្កជាជំងឺកូវីដ១៩ ក្នុងចំណោមសមាជិកសភាជាង១០០នាក់រួមទាំងលោក ហ៊ុន ម៉ានី កូនប្រុសពៅរបស់លោកនាយករដ្ឋមន្ត្រី ហ៊ុន សែន និងដែលបច្ចុប្បន្នជាប្រធានគណៈកម្មការទី៧នៃ រដ្ឋសភាផងដែរ។ នេះបើយោងតាមលិខិតរបស់អគ្គលេខាធិការនៃរដ្ឋសភាផ្ញើជូនលោក ម៉ម ប៊ុនហេង រដ្ឋមន្ត្រីក្រសួងសុខាភិបាល។
លិខិតរបស់លោក ឡេង ប៉េងឡុងចុះថ្ងៃទី៣០ ខែវិច្ឆិកាបានបញ្ជាក់ថា៖ «យោងតាមសំណូមពរតំណាងរាស្ត្រទាំងអស់ សំណូមពរក្រសួងសុខាភិបាលរៀបចំឲ្យមានការធ្វើតេស្តកូវីដ១៩នៅវិមានរដ្ឋសភានៅពេលឆាប់ៗខាងមុខ»។
ការស្នើរបស់រដ្ឋសភានេះ ធ្វើឡើងក្រោយពីអ្នកតំណាងរាស្ត្រម្នាក់គឺលោក ឡូយ សូផាត អនុប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា បានជាប់ពាក់ព័ន្ធផ្ទាល់ជាមួយលោក ឆែម សាវុធ អគ្គនាយកពន្ធនាគារដែលត្រូវបានធ្វើតេស្តឃើញមានវិជ្ជមានកូវីដ១៩។
នៅថ្ងៃទី២៥ ខែវិច្ឆិកា លោក ឡូយ សូផាត បានចូលរួមសម័យប្រជុំពេញអង្គដែលមានអ្នកចូលរួមចំនួន១១៦នាក់ ព្រមទាំងមន្ត្រីរដ្ឋសភានិងតំណាងរដ្ឋាភិបាលមួយចំនួនផងដែរ។
បញ្ជីឈ្មោះឥស្សរជននិងមន្ត្រីដែលរដ្ឋសភាចាត់ទុកថាមានហានិភ័យមធ្យមក្នុងការឆ្លងកូវីដ១៩នេះរួមមានប្រធានរដ្ឋសភាលោក ហេង សំរិន លោក ជាម យៀប លោក ឈាង វុន និងលោក ហ៊ុន ណេង ដែលជាបងប្រុសរបស់លោកនាយករដ្ឋមន្ត្រី ហ៊ុន សែន ផងដែរ។
ក្រសួងសុខាភិបាលបានរកឃើញអ្នកឆ្លងវីរុស១៧នាក់ក្នុងនោះមានទារកអាយុ៧ខែម្នាក់ពាក់ព័ន្ធនឹងការឆ្លងក្នុងសហគមន៍ដែលត្រូវបានរកឃើញជាលើកដំបូងកាលពីថ្ងៃទី២៨ ខែវិច្ឆិកានេះ៕
