ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

ការ​ស៊ើបអង្កេត​លើ​ករណី​ផ្ទុះ​នៅ​ទីក្រុង Nashville ឈាន​ទៅ​ដល់​ការ​ស៊ើបអង្កេត​លើ​ផ្ទះ​មួយ​ខ្នង​នៅ​ជាយក្រុង


ទិដ្ឋភាព​ក្រោយ​ហេតុការណ៍​ផ្ទុះ​រថយន្ដ​មួយ​គ្រឿង​នៅ​ទីក្រុង Nashville រដ្ឋ Tennessee ថ្ងៃទី២៥ ខែធ្នូ ឆ្នាំ២០២០។

ភ្នាក់ងារ​រដ្ឋាភិបាល​សហព័ន្ធ​សហរដ្ឋអាមេរិក​ដែល​ស៊ើបអង្កេត​ទៅ​លើ​ករណី​ផ្ទុះ​រថយន្ដ​មួយ​គ្រឿង​នៅ​ទីក្រុង Nashville រដ្ឋ Tennessee បាន​ឆែកឆេរ​ផ្ទះ​មួយ​ខ្នង​កម្ពស់​ពីរ​ជាន់​នៅ​ជាយ​ក្រុង កាល​ពី​ថ្ងៃ​សៅរ៍ ដើម្បី​ស្វែងរក​ភស្តុតាង​ពាក់ព័ន្ធ​នឹង​ហេតុការណ៍​ផ្ទុះ​នោះ។ ហេតុការណ៍​ផ្ទុះ​នោះ​បាន​ធ្វើ​ឲ្យ​មនុស្ស​ចំនួន ៣ នាក់​រងរបួស​នៅ​ចំ​ថ្ងៃ​បុណ្យ​ណូអែល នៅ​ក្នុង​ទីក្រុង Nashville ដែល​ជា​ក្រុង​តន្ត្រី​ស្រុកស្រែ​របស់​សហរដ្ឋអាមេរិក។

ភ្នាក់ងារ​សហព័ន្ធ​ក៏​បាន​ព្យាយាម​កំណត់​អត្តសញ្ញាណ​នៃ​កម្ទេចកម្ទី​ដែល​ទំនង​ជា​ផ្នែក​នៃ​រាងកាយ​មនុស្ស ដែល​ត្រូវ​បានគេ​រកឃើញ​នៅ​ជិត​កន្លែង​ផ្ទុះ​រថយន្ដ​នោះ​ផង​ដែរ។

រថយន្ដ​ដែល​បាន​ផ្ទុះ​នោះ មាន​កន្លែង​ស្នាក់នៅ​បាន​ដូចជា​ផ្ទះ​ចល័ត។ រថយន្ដ​នោះ​ត្រូវ​បាន​ចត​នៅ​តាម​ដងផ្លូវ​មួយ​នៅ​កណ្ដាល​ទីក្រុង Nashville ហើយ​រថយន្ដ​នោះ​បាន​ផ្ទុះ​កាល​ពី​ព្រឹក​ព្រហាម​ថ្ងៃ​សុក្រ។ ការ​ផ្ទុះ​នោះ​កើតឡើង​បន្ដិច​ក្រោយ​ពី​ប៉ូលិស​បាន​ឆ្លើយតប​ទៅ​នឹង​ការ​រាយការណ៍​មួយ​ដែល​ថា​មាន​ការ​បាញ់​កាំភ្លើង និង​បាន​ឮ​សារ​សំឡេង​ស្វ័យ​ប្រវត្តិ​មួយ​ចេញ​ពី​រថយន្ដ​នោះ​ថា​មាន​គ្រាប់​ផ្ទុះ។

ហេតុការណ៍​ផ្ទុះ​នោះ​បាន​បំផ្លាញ​រថយន្ដ​អស់​មួយ​ចំនួន បំផ្លិចបំផ្លាញ​អាជីវកម្ម​ជាង ៤០ កន្លែង និង​បន្សល់​ទុក​នូវ​កម្ទេចកម្ទី​បែកបាក់​នៃ​កញ្ចក់​បង្អួច​ពាសពេញ​ទីកន្លែង​នោះ​ផង​ដែរ។

ក្រោយ​ពី​តាមដាន​លើ​តម្រុយ​នានា​ចំនួន​ជាង ៥០០ មក ប៉ូលិស​មូលដ្ឋាន និង​ភ្នាក់ងារ​ការិយាល័យ​សហព័ន្ធ​ស៊ើបអង្កេត (FBI) និង​ការិយាល័យ​គ្រឿង​ស្រវឹង ថ្នាំជក់ អាវុធ និង​គ្រឿងផ្ទុះ (ATF) នៃ​ក្រសួង​យុត្តិធម៌​សហរដ្ឋ​អាមេរិក បាន​ចុះ​ឆែកឆេរ​ផ្ទះ​មួយ​ខ្នង​ដែល​ធ្វើ​ពី​ឥដ្ឋ​ពណ៌​ក្រហម​និង​មាន​កម្ពស់​ពីរ​ជាន់​នៅ​ផ្លូវ Bakertown នៅ​ក្រុង Antioch រដ្ឋ Tennessee ដែល​មាន​ចម្ងាយ ១៨ គីឡូម៉ែត្រ​ប៉ែក​អាគ្នេយ៍​ទីក្រុង Nashvilleដោយ​ផ្ដោត​យក​ចិត្ត​ទុកដាក់​ទៅ​លើ​ជាន់​ក្រោម​ដី​របស់​ផ្ទះ​នោះ។ នេះ​បើ​យោង​តាម​ការ​បញ្ជាក់​របស់​សាក្សី​ម្នាក់​ដែល​ថ្លែង​ប្រាប់​ទីភ្នាក់ងារ​ព័ត៌មាន Reuters។

កាល​ពី​ថ្ងៃ​សៅរ៍ អាជ្ញាធរ​បាន​បដិសេធ​មិន​ព្រម​បញ្ជាក់​ឈ្មោះ​របស់​មនុស្ស​ម្នាក់​ដែល​អាច​មាន​ការ​ពាក់ព័ន្ធ​នឹង​ហេតុការណ៍​ផ្ទុះ​នេះ​ទេ ប៉ុន្តែ​បណ្ដាញ​ព័ត៌មាន CBS News បាន​រាយការណ៍​ថា ការ​ស៊ើបអង្កេត​នោះ​ផ្ដោត​លើ​បុរស​ម្នាក់​វ័យ ៦៣ ឆ្នាំ​ដែល​បច្ចុប្បន្ន​នេះ​រស់នៅ​ផ្លូវ Bakertown។ នេះ​បើ​យោង​តាម​ទិន្នន័យ​សាធារណៈ។

បើ​យោង​តាម​ឯកសារ​មួយ​ច្បាប់​ដែល​ត្រូវ​បាន​គេ​បង្ហោះ​លើ​បណ្ដាញ​អ៊ីនធឺណិត កាលពី​ថ្ងៃ​ទី ២៥ ខែ​វិច្ឆិកា បុរស​ម្នាក់​នោះ​បាន​ចុះ​ហត្ថលេខា​ប្រគល់​ផ្ទះ​នោះ​ទៅ​ឲ្យ​ស្ត្រី​ម្នាក់​នៅ​ទីក្រុង Los Angeles រដ្ឋ California ដោយ​មិន​តម្រូវ​ឲ្យ​ស្ត្រី​ម្នាក់​នោះ​ចំណាយ​ថវិកា​អ្វី​ទាំងអស់។ ឯកសារ​នោះ​ត្រូវ​បាន​ចុះ​ហត្ថលេខា​ដោយ​បុរស​ម្នាក់​នោះ ប៉ុន្តែ​ស្ត្រី​ម្នាក់នោះ​មិន​បាន​ចុះ​ហត្ថលេខា​អ្វី​នោះ​ទេ។

រូបភាព​មើល​តាម​ដង​ផ្លូវ​តាម​អ៊ីនធឺណិត​របស់​ក្រុមហ៊ុន Google កាល​ពី​ឆ្នាំ ២០១៩ បង្ហាញ​ថា ផ្ទះ​នោះ​មាន​រថយន្ដ​បែប​ផ្ទះ​ចល័ត​មួយ​គ្រឿង​ពណ៌​ស ចត​នៅ​លើ​ផ្លូវ​ចត​រថយន្ដ​នៃ​ផ្ទះ​នោះ។ អ្នក​ជិត​ខាង​បាន​ប្រាប់​ទូរទស្សន៍ WKRN ដែល​ជា​ស្ថានីយ៍​ទូរទស្សន៍​ក្នុង​ស្រុក​ថា រថយន្ដ​នោះ​ត្រូវ​បាន​ចត​ចោល​នៅ​ទីនោះ​អស់​រយៈពេល​រាប់​ឆ្នាំ​មក​ហើយ ហើយ​ឥឡូវ​នេះ​រថយន្ដ​នោះ​បាន​បាត់​ហើយ៕

XS
SM
MD
LG