«ការតាមដានមីក្រុប» គឺជាការពិសោធន៍មួយចំនួន ដែលនៅក្នុងនោះ សំណាកត្រូវបានយកដោយអវកាសយានិកនៅក្នុងស្ថានីយអវកាសអន្តរជាតិ ហើយត្រូវយកមកធ្វើការសិក្សាស្រាវជ្រាវនៅលើផែនដី។
ការពិសោធន៍ទាំងនេះ បង្ហាញថា មីក្រុបដែលរស់នៅលើផ្ទៃវត្ថុនានានៅក្នុងស្ថានីយអវកាស មានលក្ខណៈដូចគ្នាទាំងស្រុងទៅនឹងមីក្រុបនៅលើស្បែករបស់អវកាសយានិក ដែលពួកអ្នកវិទ្យាសាស្ត្រអាចដឹងបានថា ពេលណាអវកាសយានិកថ្មីណាម្នាក់បានមកដល់ និងបានចាកចេញពីស្ថានីយនោះដោយគ្រាន់តែពិនិត្យមើលលើមីក្រុបដែលបានបន្សល់ទុកនៅទីនោះតែប៉ុណ្ណោះ។
ការរកឃើញនេះបង្ហាញឱ្យឃើញអំពីសារៈសំខាន់នៃការតាមឃ្លាំមើលមីក្រុបចំពោះការការពារសុខភាពអវកាសយានិកនៅក្នុងស្ថានីយអវកាសអន្តរជាតិ និងនៅក្នុងគម្រោងដែនអវកាសរយៈពេលវែងផ្សេងទៀតនៅពេលអានាគត។
ក៏ប៉ុន្តែ ការសិក្សាស្រាវជ្រាវនេះក៏អាចឲ្យយើងស្វែងយល់អំពីបរិយាកាសបិទជិតនានានៅលើផែនដីដូចជាមន្ទីរពេទ្យជាដើម ដែលនៅទីនោះ ការស្វែងយល់អំពីវត្តមានរបស់មីក្រុប និងសរីរៈផ្សេងៗទៀតដែលអាចបង្កគ្រោះថ្នាក់បាន គឺមានសារៈសំខាន់ជាងពេលណាៗទាំងអស់។
អ្នកស្រី Crystal Jaing គឺជាអ្នកជីវសាស្ត្រនៃមន្ទីរពិសោធន៍ជាតិ Livermore។ អ្នកស្រីគឺជាអ្នកស្រាវជ្រាវចម្បងសម្រាប់ការសិក្សាស្រាវជ្រាវអំពីការតាមដានមីក្រុប។
អ្នកស្រីបាននិយាយថា ការស្វែងយល់អំពីថាតើអវកាសយានិកនៅក្នុងស្ថានីយអវកាស មានទំនាក់ទំនងបែបណាជាមួយនឹង «មីក្រុបនានា» គឺមានសារៈសំខាន់នៅក្នុងការបញ្ជៀសកុំឱ្យមានបញ្ហាដល់សុខភាពមនុស្សនៅក្នុងយានអវកាស នៅពេលហោះហើររយៈពេលយូរ ឬក៏ប្រហែលជានៅលើផែនដី ដូចជានៅតាមផ្ទះ ការធ្វើដំណើរសាធារណៈ ឬមន្ទីរពេទ្យជាដើម។
លទ្ធផលនៃការសិក្សាស្រាវជ្រាវនេះត្រូវបានបោះពុម្ពផ្សាយនៅក្នុងទស្សនាវដ្តី PLOS One កាលពីចុងខែមេសា៕
ប្រែសម្រួលដោយ ឈឹម សុមេធ
