ប្រធាននៃរដ្ឋបំបែកខ្លួនដែលបានប្រកាសដោយខ្លួនឯង ក្នុងតំបន់ Nagorno-Karabakh និយាយនៅថ្ងៃព្រហស្បតិ៍នេះថា ស្ថាប័នរបស់ខ្លួននឹងត្រូវរំលាយចោលលែងមានតទៅទៀតចាប់ពីចុងឆ្នាំនេះតទៅ ខណៈពេលដែលជនជាតិភាគតិចអាមេនីរាប់ពាន់នាក់ កំពុងរត់ពីតំបន់នេះចូលទៅក្នុងប្រទេសអាមេនី។
ក្រិតមួយដែលចេញដោយមេដឹកនាំក្រុមបំបែកខ្លួន លោក Samvel Shakhramanyan ត្រូវបានធ្វើឡើងក្រោយពីមានប្រតិបត្តិការវាយប្រហារកាលពីសប្តាហ៍មុន ដោយកងកម្លាំងប្រទេសអាស៊ែបៃហ្សង់ ដើម្បីយកតំបន់នេះមកគ្រប់គ្រងឡើងវិញ។
ក្រុមអាជ្ញាធរអាមេនីនិយាយថា ជនជាតិភាគតិចអាមេនីជាងពាក់កណ្តាលនៃចំនួន ១២០.០០០ នាក់ ដែលបានរស់នៅក្នុងតំបន់ Nagorno-Karabakh នោះ បានឆ្លងទៅប្រទេសអាមេនី ត្រឹមព្រឹកថ្ងៃព្រហស្បតិ៍នេះ។
ការចាកចេញយ៉ាងគំហុកនៃជនជាតិអាមេនីពីតំបន់នេះ បានចាប់ផ្តើមកាលពីថ្ងៃសុក្រ និងធ្វើឱ្យផ្លូវចូលទៅក្នុងប្រទេសអាមេនី មានរថយន្តកកស្ទះយ៉ាងខ្លាំង ដោយពួកគេបារម្ភខ្លាចមានការសងសឹក បើទោះបីមានការសន្យាពីខាងប្រទេសអាស៊ែបៃហ្សង់ ដើម្បីគោរពសិទ្ធិពលរដ្ឋអាមេនីក្នុងតំបន់នេះក្តី។
ក្រុមអាជ្ញាធរក្នុងប្រទេសអាស៊ែបៃហ្សង់កាលពីថ្ងៃព្រហស្បតិ៍បានចោទប្រកាន់អតីតមេដឹកនាំក្រុមបំបែកខ្លួន លោក Ruben Vardanyan ថា បានផ្តល់លុយសម្រាប់ធ្វើភេរវកម្មនិងការឆ្លងដែនខុសច្បាប់។
ការចោទប្រកាន់នេះកើតឡើងមួយថ្ងៃ បន្ទាប់ពីទីភ្នាក់ងារព្រំដែនរដ្ឋរបស់ប្រទេសអាស៊ែបៃហ្សង់ បានចាប់ខ្លួនលោក Vardanyan និងនាំទៅកាន់រដ្ឋធានីបាគូរបស់ប្រទេសនេះ។
លោក Vardanyan មានភាពជោគជ័យខ្លាំងក្នុងប្រទេសរុស្ស៊ី ដោយបានក្លាយជាម្ចាស់ធនាគារវិនិយោគដ៏ធំមួយ។ លោកបានផ្លាស់ទៅរស់នៅក្នុងតំបន់ Nagorno-Karabakh ក្នុងឆ្នាំ ២០២២ និងបានក្លាយជាប្រមុខរដ្ឋាភិបាលនៅទីនោះ រហូតដល់លោកបានចុះចេញពីតំណែងកាលពីដើមឆ្នាំ ២០២៣ នេះ។
តំបន់ Nagorno-Karabakh ស្ថិតក្នុងទឹកដីអាស៊ែបៃហ្សង់ ប៉ុន្តែនៅក្រោមការគ្រប់គ្រងរបស់ជនជាតិភាគតិចអាមេនីចាប់តាំងពីឆ្នាំ ១៩៩៤ មក រហូតដល់ផ្នែកខ្លះនៃតំបន់នេះ ត្រូវបានយកមកគ្រប់គ្រងឡើងវិញដោយប្រទេសអាស៊ែបៃហ្សង់ ក្នុងសង្គ្រាមមួយ កាលពីឆ្នាំ ២០២០៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានផ្ដល់ជូនដោយទីភ្នាក់ងារសារព័ត៌មាន AP និងទីភ្នាក់ងារសារព័ត៌មាន Reuters។
