ប្រធានាធិបតីសហរដ្ឋអាមេរិកលោក ដូណាល់ ត្រាំ បានអបអរសាទរការបង្ហាញខ្លួនរបស់លោក Robert Mueller អតីតរដ្ឋអាជ្ញាពិសេសកាលពីថ្ងៃពុធនៅខាងមុខគណៈកម្មាធិការ ២របស់សភាតំណាងរាស្រ្តថាជា «ថ្ងៃដ៏ល្អបំផុត» សម្រាប់រូបលោក និងសហការីខាងគណបក្សសាធារណរដ្ឋ។
លោកប្រធានាធិបតីបាននិយាយថា ការផ្តល់កសិណសាក្សីរបស់លោក Mueller បានបង្ហាញថា ការស៊ើបអង្កេតពីការជ្រៀតជ្រែករបស់រុស្ស៊ីក្នុងការបោះឆ្នោតប្រធានាធិបតីអាមេរិកឆ្នាំ ២០១៦ និងការចោទប្រកាន់ថា លោកត្រាំបានរារាំងដំណើរការយុត្តិធម៌ដោយព្យាយាមបង្អាក់ការស៊ើបអង្កេតជា «ការខ្ជះខ្ជាយពេលវេលា»។
លោកស្រី Nancy Pelosi បានប្រាប់អ្នកយកព័ត៌មានថា រដ្ឋបាលរបស់ប្រធានាធិបតីត្រាំអាចធ្វើឲ្យគ្រោះថ្នាក់សន្តិសុខជាតិរបស់យើងដោយការពង្រឹងអំណាចរបស់រុស្ស៊ី ហើយថា គណបក្សប្រជាធិបតេយ្យនឹងជំរុញឲ្យមានការស៊ើបអង្កេតប្រធានាធិបតីនិងដំណើរការដើម្បីប្តឹងប្រធានាធិបតីទម្លាក់ចេញពីដំណែង។
លោក Mueller បានប្រាប់សមាជិកសភាថា ការស៊ើបអង្កេតរបស់លោកមិនបានឲ្យប្រធានាធិបតីត្រាំរួចពីការចោទប្រកាន់រារាំងយុត្តិធម៌នោះទេ។
នៅពេលដែលការផ្តល់កសិណសាក្សី បានចាប់ផ្តើមប៉ុន្មានម៉ោងមក លោក Jerrold Nadler ប្រធានគណៈកម្មាធិការតុលាការរបស់សភាតំណាងរាស្រ្ត បានសួរលោករដ្ឋអាជ្ញា Mueller ថា «តើលោកឲ្យប្រធានាធិបតីត្រាំរួចពីការចោទប្រកាន់ឬទេ?»។
លោករដ្ឋអាជ្ញា Mueller បានឆ្លើយថា «មិនរួចទេ»។ ក្រោយមក លោក Mueller បាននិយាយបន្ថែមទៀតថា លោកប្រធានាធិបតីមិនអាចរួចពីការចោទប្រកាន់ចំពោះសកម្មភាពដែលលោកបានប្រព្រឹត្តនោះទេ។ ក្នុងសវនាការក្រោយមកទៀត លោក Mueller បន្តទៀតថា «ត្រូវតែចោទប្រកាន់» នៅពេលដែលសួរថាតើលោក ចោទប្រកាន់ប្រធានាធិបតីពីការប្រព្រឹត្តបទឧក្រិដ្ឋបន្ទាប់ពីលោកប្រធានាធិបតីត្រាំចាកចេញពីដំណែងនោះ៕
