គណៈកម្មការទន្លេមេគង្គនឹងរៀបចំការពិភាក្សាជាសារធារណៈជាមួយនឹងស្ថាប័នពាក់ព័ន្ធមួយចំនួននៅខែក្រោយ ក្នុងក្រុងផាកសេ (Pakse) ប្រទេសឡាវ ដើម្បីទទួលបាននូវការផ្តល់យោបល់តបទៅវិញអំពីគម្រោងសាងសង់ទំនប់វារីអគ្គីសនីដនសាហុង (Don Sahong) ក្នុងប្រទេសឡាវ។ នេះបើយោងតាមសេចក្តីប្រកាស ព័ត៌មានមួយកាលពីថ្ងៃអង្គារ។
ក្រុមប្រទេសក្នុងអាងទន្លេមេគង្គដូចជា ថៃ កម្ពុជា និងវៀតណាមបានជំទាស់ទៅនឹងការសាងសង់ទំនប់នេះ ដោយសារថាទំនប់នេះត្រូវសង់ឆ្លងកាត់ទន្លេមេគង្គ ហើយត្រូវបានគេចាត់ទុកថានឹងប៉ះពាល់ដល់ចរាចរមច្ឆាជាតិនិងបរិស្ថានជាដើម។
ការបើកវេទិការនៅថ្ងៃទី១២ខែធ្នូ ឆ្នាំ២០១៤នេះ គឺនឹងត្រូវគេរំពឹងទុកថានឹងមានការអញ្ចើញឲ្យសង្គមស៊ីវិល ស្ថាប័នស្រាវជ្រាវ អង្គការក្រៅរដ្ឋាភិបាលនិងអង្គការអន្តរជាតិនានាបានចូលរួមពិគ្រោះយោបល់ផងដែរ។
រាល់យោបល់ដែលបានផ្តល់មកនឹងបញ្ជូនទៅកាន់គណៈកម្មាធិការចម្រុះនៃគណ:កម្មការទន្លេមេគង្គដែលជាស្ថាប័នគ្រប់គ្រង មានសមាភាពជាមន្ត្រី ជាន់ខ្ពស់មកពីប្រទេសសមាជិកទន្លេមេគង្គ។ ហើយគេនឹងរៀបចំទស្សនកិច្ច ទៅកាន់ទីតាំងវារីអគ្គីសនីនិងតំបន់ជិតៗនោះ តែនេះជាជម្រើសសម្រាប់ស្ថាប័ននានា ដែលចង់ទៅទស្សនកិច្ចនៅថ្ងៃទី១១ ខែធ្នូ។ ការពិភាក្សានេះនឹងទទួលសំនួរ និងអនុសាសន៍តាមប្រព័ន្ធកុំព្យូទ័រផងដែរ។
