នៅថ្ងៃអង្គារនេះ សាធារណជនបានសម្តែងការគោរពដល់ព្រះសពរបស់ព្រះមហាក្សត្រិយានី Elizabeth ទី ២ របស់ចក្រភពអង់គ្លេសនៅព្រះវិហារ St. Giles ក្នុងទីក្រុង Edinburgh ដោយមនុស្សជាច្រើនបានរង់ចាំពេញមួយយប់សម្រាប់ឱកាសចុងក្រោយក្នុងការដើរកាត់មឈូសរបស់ព្រះអង្គមុនពេលត្រូវដង្ហែទៅកាន់ទីក្រុងឡុងដ៍។
ម្ចាស់ក្សត្រី Anne ដែលជាបុត្រីរបស់ព្រះមហាក្សត្រិយានី នឹងយាងអមមឈូសរបស់ព្រះអង្គនៅលើយន្តហោះក្នុងដំណើរដង្ហែព្រះសពព្រះអង្គទៅកាន់ទីក្រុងឡុងដ៍នៅថ្ងៃអង្គារនេះ។
ព្រះសពរបស់ព្រះមហាក្សត្រិយានីនឹងត្រូវដង្ហែទៅកាន់ព្រះបរមរាជវាំង Buckingham ជាមុនសិន មុននឹងត្រូវផ្ទេរតាមក្បួនដង្ហែសាធារណៈដែលដឹកនាំដោយព្រះមហាក្សត្រ Charles ទី ៣ ទៅកាន់សាល Westminster ដែលសាងសង់តាំងពីសតវត្សរ៍ទី ១១ ដែលជាកន្លែងដែលព្រះសពរបស់ព្រះអង្គនឹងត្រូវតម្កល់ជាផ្លូវរដ្ឋរយៈពេល ៤ ថ្ងៃ។
សាល Westminster នេះនឹងបើក ២៣ ម៉ោងក្នុងមួយថ្ងៃសម្រាប់ភ្ញៀវចូលមកគោរពព្រះសពរបស់ព្រះអង្គ ហើយនឹងមានការយាមល្បាតពីទាហានមកពីព្រះបរមរាជវាំង។ មនុស្សរាប់ម៉ឺននាក់ត្រូវគេរំពឹងថានឹងធ្វើដំណើរទៅកាន់សាលនេះដើម្បីសម្តែងការគោរពរបស់ពួកគេ។
ព្រះមហាក្សត្រិយានី Elizabeth ទី ២ បានសោយទិវង្គតកាលពីថ្ងៃព្រហស្បតិ៍សប្ដាហ៍មុននៅឯព្រះរាជដំណាក់ Balmoral ក្នុងតំបន់ខ្ពង់រាបស្កុតលែន ដែលជាកន្លែងដែលព្រះអង្គសព្វព្រះរាជហឫទ័យខ្លាំងបំផុត។
ព្រះមហាក្សត្រ Charles និងម្ចាស់ក្សត្រី Anne ព្រះអង្គម្ចាស់ Andrew និងព្រះអង្គម្ចាស់ Edward ដែលជាព្រះអនុជ បានគោរពវិញ្ញាណក្ខន្ធរបស់ព្រះមាតាយ៉ាងស្ងៀមស្ងាត់កាលពីថ្ងៃចន្ទក្នុងព្រះវិហារ St. Giles ដោយឱនព្រះកេសនៅពេលព្រះអង្គទាំង ៤ អង្គឈរនៅជ្រុងទាំងបួននៃមឈូសរបស់ព្រះមាតា។
ព្រះសពរបស់ព្រះមហាក្សត្រិយានីត្រូវបានដង្ហែទៅកាន់ព្រះវិហារ St. Giles តាមក្បួនដង្ហែដ៏ឱឡារិកមួយតាមដងផ្លូវនៃទីក្រុង Edinburgh ដែលជាកន្លែងដែលមនុស្សរាប់ពាន់នាក់បានចេញមកគោរពវិញ្ញាណក្ខន្ធរបស់ព្រះអង្គ។
បន្ទាប់ពីក្បួនដង្ហែបានទៅដល់ព្រះវិហារ St. Giles សមាជិកនៃរាជវង្សានុវង្សរួមជាមួយនឹងថ្នាក់ដឹកនាំនយោបាយបានចូលរួមនៅក្នុងព្រះរាជពិធីថ្វាយបង្គំមួយនៅខាងក្នុងព្រះវិហារដើម្បីថ្វាយដល់ព្រះសពរបស់ព្រះមហាក្សត្រិយានី។
ព្រះគ្រូ Calum MacLeod បានថ្លែងថា៖ «យើងប្រមូលផ្តុំគ្នាដើម្បីឱ្យប្រទេសស្កុតលែនថ្វាយបង្គំលាព្រះមហាក្សត្រិយានីរបស់យើង ដែលបានបូជាព្រះកាយបម្រើជាតិនិងពិភពលោក។ ការសព្វព្រះរាជហឫទ័យរបស់ព្រះអង្គចំពោះស្កុតលែនគឺពិតជាអស្ចារ្យគួរឱ្យគោរព»៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន Associated Press និងទីភ្នាក់ងារព័ត៌មាន Reuters។
សាធារណជនចូលគោរពព្រះសពព្រះមហាក្សត្រិយានី Elizabeth ទី ២ ក្នុងព្រះវិហារ St. Giles
ទីក្រុងឡុងដ៍ —
