ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ម្តាយ​យុវជន កាក់ សុវណ្ណច្ឆ័យ ទទូច​តុលាការ​ឲ្យ​ដោះលែង​កូនប្រុស​ដោយ​អះអាង​ថា កូន​នោះ​មាន​ជំងឺ​អូទីហ្សឹម


រូបឯកសារ៖ យុវជន កាក់ សុវណ្ណច្ឆ័យ អាយុ១៦ឆ្នាំ ត្រូវបានចាប់ខ្លួនកាលពីថ្ងៃទី២៤ ខែមិថុនា ឆ្នាំ២០២១។ (រូបផ្តល់ឲ្យដោយអ្នកស្រី ព្រំ ចាន់ថា ម្តាយរបស់យុវជន)

តុលាការ​ក្រុង​ភ្នំពេញ បានលើក​ពេល​ប្រកាស​សាលក្រម​ ដោយ​មិន​កំណត់កាល​បរិច្ឆេទ​ប្រកាស​ជា​ថ្មី​ជាក់​លាក់​ ចំពោះ​សំណុំ​រឿង​យុវជន​ជំទង់​ កាក់​ សុវណ្ណច្ឆ័យ ​អាយុ​១៦ឆ្នាំ​ ​ដែល​កំពុង​ជាប់​ឃុំ​ពីបទ​ញុះញង់​ និង​ប្រមាថ​មន្ត្រីរាជការ​សាធារណៈ​។ នេះ​បើ​យោង​តាម​អង្គការ​សិទ្ធិមនុស្ស​លីកាដូ និងម្តាយ​របស់​ក្មេងប្រុស​ដែល​អះអាង​ថា​ កូន​របស់​ខ្លួន​មាន​អូទីហ្សឹម ​ឬ​ជំងឺ​រវើរវាយ។​

យុវជន​ កាក់​ សុវណ្ណច្ឆ័យ​ គឺជា​កូន​ប្រុស​លោក កាក់ កុម្ភារ អតីត​មន្រ្តី​គណបក្ស​សង្រ្គោះជាតិ​ ត្រូវ​បាន​ចាប់​ខ្លួន​កាល​ពី​ថ្ងៃ​ទី២៤ ខែ​មិថុនា ហើយ​បញ្ជូន​ទៅ​តុលាការ ​ក្រោម​បទ​ចោទ «ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» និង​បទ«ប្រមាថ​អ្នក​រាជការ​សាធារណៈ​» បន្ទាប់​ពី​យុវជន​រូប​នេះ​ បាន​បង្ហោះ​សារ​រិះគន់​រដ្ឋាភិបាល​តាម​ប្រព័ន្ធ​តេឡេ​ក្រាម។

តុលាការ​ក្រុង​ភ្នំពេញ​ បាន​បញ្ជាក់​ថា​ ខ្លួន​ជាប់​រវល់​ ទើបសម្រេច​លើក​ពេល​ប្រកាស​សាលក្រម​ដែល​គ្រោង​ធ្វើ​កាល​ពី​ថ្ងៃ​ពុធ​ទី​១៣ ខែ​តុលា។ ​

ម្តាយ​របស់​យុវជន កាក់​ សុវណ្ណច្ឆ័យ​ គឺ​អ្នកស្រី ​ព្រំ ចាន់ថា​ បង្ហាញ​ការខក​ចិត្ត​ជា​ខ្លាំង​ ចំពោះ​ការ​លើក​ពេល​ប្រកាស​សាលក្រម​ដោយ​មិន​បាន​កំណត់​ពេល​វេលា​ច្បាស់​លាស់។ ​ អ្នកស្រី​មាន​ក្តី​បារម្ភ​ខ្លាំង​ណាស់​ដែរ​ចំពោះ​ស្ថាន​ភាព​សុខភាព​កូន​ប្រុស​ ដែលចាប់​ផ្តើម​មាន​អាការៈ​រមាស់​លើ​រាងកាយ​ ដោយសារ​កង្វះ​អនាម័យ​ក្នុង​ពន្ធនាគារ។

អ្នក​ស្រី​និយាយ​ថា​៖ «អ៊ីចឹងខ្ញុំ​សុំ​ឲ្យ​តុលាការ​ពន្លឿន [ការ​ប្រកាស​សាលក្រម]​ឲ្យ​លឿន​តិច​ទៅ ព្រោះអី​កូន​ខ្ញុំ​វា​ដុន​ដាប​ខ្លាំង​ហើយ​ ចង់ទម្លាក់​ការ​ចោទ ឬ​ក៏​ទម្លាក់​គាត់​ឲ្យ​នៅ​ក្រៅ​ឃុំ​ទៅ​ ដោយ​សារ​អី​ [ចង់]ឲ្យ​មក​រស់​នៅ​ក្រោម​ការ​គ្រប់​គ្រង​របស់​ខ្ញុំ​មក»។

បើ​ត្រូវ​បាន​រក​ឃើញ​ថា​មានទោស​ យុវជន​ជំទង់​ កាក់ សុវណ្ណច្ឆ័យ​ អាចប្រឈម​នឹង​ការ​ជាប់ពន្ធនាគារអតិបរមា​រហូត​ដល់​២ឆ្នាំ៕

XS
SM
MD
LG