ម្តាយរបស់លោកKenji Gotoអ្នកកាសែតជនជាតិជប៉ុន ដែលត្រូវបានក្រុមជ្រុលនិយមរដ្ឋអ៊ីស្លាមចាប់ខ្លួន បានធ្វើការអង្វរករនៅថ្ងៃពុធនេះឲ្យដោះលែងលោក ខណៈពេលកំណត់ការប្រហារជីវិតលោកបានខិតចូលកាន់តែជិត។
លោកស្រី Junko Ishido ម្តាយរបស់លោក Goto បានអានសេចក្តីថ្លែងការណ៍នៅសន្និសីទសារព័ត៌មាននៅថ្ងៃពុធនេះ ដោយអង្វរករដល់លោកនាយករដ្ឋមន្រ្តី Shinzo Abe ឲ្យធ្វើអ្វីៗតាមអំណាចរបស់លោក ដើម្បីឲ្យកូនប្រុសរបស់លោកស្រី បានទទួលការដោះលែង។ លោកស្រីបានមានប្រសាសន៍ថា កូនប្រុសរបស់លោកស្រីមិនមែនជាសត្រូវរបស់អ៊ីស្លាមទេ។
ក្រុមសកម្មជនប្រយុទ្ធរដ្ឋអ៊ីស្លាមបានគំរាមសម្លាប់ចំណាប់ខ្មាំងបរទេសទាំង២នៅថ្ងៃពុធនេះ ប្រសិនបើការទាមទារដោះដូរអ្នកទោសម្នាក់មិនត្រូវបានបំពេញតាម នេះបើយោងតាមសារវីដេអូដែលចុះផ្សាយតាមប្រព័ន្ធអ៊ីនធើណិតដែលគេសន្មត់ថាជារបស់ក្រុមនោះ។
សេចក្តីថ្លែងការណ៍កាលពីថ្ងៃអង្គារបាននិយាយឡើងវិញពីសំណើដែលឲ្យរដ្ឋាភិបាលទីក្រុង Amman ដោះលែង Sajida al-Rishawi ជាស្រ្តីដែលអាជ្ញាធរប្រទេសហ្សកដានីបានចាប់ខ្លួន ចាប់តាំងស្រ្តីរូបនោះបានចូលរួមនៅក្នុងការវាយប្រហារឆ្នាំ២០០៥ដែលបានសម្លាប់មនុស្ស៦០នាក់នៅក្នុងរាជធានី។
ចំណាប់ខ្មាំងដែលមានលោក Kenji Gotoអ្នកកាសែតជនជាតិជប៉ុននិងលោក Mu’ath al-Keseasebeh អ្នកបើកបរជនជាតិហ្សកដានីត្រូវបានគេជឿជាក់ថា ស្ថិតនៅក្នុងការឃុំឃាំងរបស់ក្រុមរដ្ឋអ៊ីស្លាម។
ប្រទេសជប៉ុនបានស្នើសុំការជួយពីប្រទេសហ្សកដានី ដើម្បីឲ្យលោក Goto បានទទួលការដោះលែង៕
