បាតុករជាង១០០នាក់ត្រូវបានចោទប្រកាន់ក្រោមច្បាប់ប្រមាថព្រះមហាក្សត្រថៃចាប់តាំងពីខែកក្កដាឆ្នាំមុន នៅពេលការប្រមូលផ្តុំគ្នានៅទូទាំងប្រទេសបានចាប់ផ្តើមទាមទារឱ្យមានការកែទម្រង់របបរាជាធិបតេយ្យដែលមិនអាចប៉ះពាល់បាន។ នេះបើតាមមេធាវីតំណាងឱ្យសកម្មជននិងរបាយការណ៍របស់ទីភ្នាក់ងារព័ត៌មាន AFP កាលពីថ្ងៃអង្គារ។
ចលនាដែលដឹកនាំដោយយុវជនភាគច្រើនបានចាប់ផ្តើមកាលពីរដូវក្តៅឆ្នាំមុនដោយមិនពេញចិត្តរដ្ឋាភិបាលលោកនាយករដ្ឋមន្រ្តីថៃ Prayut Chan-O-Cha អតីតប្រមុខយោធាដែលបានឡើងកាន់អំណាចជាលើកដំបូងនៅក្នុងរដ្ឋប្រហារក្នុងឆ្នាំ២០១៤។
មួយឆ្នាំចាប់តាំងពីការប្រមូលផ្តុំនោះបានចាប់ផ្តើម បាតុករ១១០នាក់ត្រូវបានចោទប្រកាន់ក្រោមច្បាប់ប្រមាថព្រះមហាក្សត្រចំពោះតួនាទីរបស់ពួកគេនៅក្នុងចលនាដែលកំពុងទាមទារឱ្យលោក Prayut ចុះចេញពីតំណែងកែរដ្ឋធម្មនុញ្ញដែលសរសេរដោយយោធា និងកំណែទម្រង់អំណាចមហាក្សត្រ។ ការតវ៉ានៅតាមដងផ្លូវច្រើនបំផុតមានមនុស្សរាប់ម៉ឺននាក់។
មេដឹកនាំបាតុកម្មដ៏លេចធ្លោឈ្មោះ Parit Chiwarak ដែលជាទូទៅគេស្គាល់ថា Penguin មានកំណត់ត្រានៃការចោទប្រកាន់ប្រហែល២០ករណី ហើយអ្នកតវ៉ាយ៉ាងតិច៨ នាក់ផ្សេងទៀតដែលមានអាយុក្រោម១៨ឆ្នាំក៏ប្រឈមនឹងការចោទប្រកាន់ដែរ។ ប្រសិនបើរកឃើញថាមានពិរុទ្ធភាព ពួកគេប្រឈមនឹងការជាប់ពន្ធនាគារពី៣ទៅ១៥ឆ្នាំសម្រាប់បទចោទមួយ។
លោក Krisadang Nutcharut មេធាវីតំណាងឱ្យក្រុមបាតុករនិងមានប្រវត្តិទទួលក្តីប្រឆាំងបទប្រមាថព្រះមហាក្សត្រ បាននិយាយថា«វាជាច្បាប់ដាក់ទោសធ្ងន់ធ្ងរចំពោះការបរិហារកេរ្តិ៍ព្រះមហាក្សត្រ ប៉ុន្តែវាត្រូវតែសមហេតុផល»។
ការប្រើច្បាប់ប្រមាថព្រះមហាក្សត្រមានភាពយឺតយ៉ាវនៅមុនឆ្នាំ២០២០ ដែលលោក Prayut បាននិយាយថា ដោយសារ«សេចក្តីប្រោសប្រណីរបស់ព្រះមហាក្សត្រ»។
ប៉ុន្តែអ្នករិះគន់បាននិយាយជាយូរមកហើយថា ច្បាប់នេះត្រូវបានប្រើយ៉ាងទូលំទូលាយដើម្បីរារាំងការរិះគន់និងគូប្រជែងនយោបាយហើយការលុបបំបាត់ច្បាប់នេះគឺជាចំណុចដ៏សំខាន់នៃការទាមទាររបស់ចលនាយុវជន៕
