ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មន្ត្រី​សិទ្ធិ​មនុស្ស​សម្តែង​ការ​មិន​ពេញ​ចិត្ត​នឹង​ការ​អនុវត្ត​កិច្ចព្រម​ព្រៀង​ក្រុង​ប៉ារីស


រូបភាព​ទិដ្ឋភាព​ទូទៅ​នៅ​សន្និសីទ​ស្តី​ពី​សន្តិភាព​​នៅ​កម្ពុជា​ដែល​ប្រព្រឹត្ត​ធ្វើ​នៅ​ទី​ក្រុង​ប៉ារីស​ប្រទេស​បារាំង​កាល​ពី​​ថ្ងៃ​ទី​២៣ ខែ​តុលា ឆ្នាំ​១៩៩១។ (AFP)
រូបភាព​ទិដ្ឋភាព​ទូទៅ​នៅ​សន្និសីទ​ស្តី​ពី​សន្តិភាព​​នៅ​កម្ពុជា​ដែល​ប្រព្រឹត្ត​ធ្វើ​នៅ​ទី​ក្រុង​ប៉ារីស​ប្រទេស​បារាំង​កាល​ពី​​ថ្ងៃ​ទី​២៣ ខែ​តុលា ឆ្នាំ​១៩៩១។ (AFP)

មន្ត្រី​សិទ្ធិ​មនុស្ស​ដ៏​លេច​ធ្លោ​មួយ​រូប​ក្នុង​ប្រទេស​កម្ពុជា​គឺ​លោក​ ធន សារ៉ាយ ប្រធាន​អង្គការ​សិទ្ធិ​មនុស្ស​អាដហុកបាន​ អះអាង​ថា ​ប្រទេស​កម្ពុជា​នៅ​មាន​បញ្ហា​ច្រើន​ដែល​តម្រូវ​ឲ្យ​មាន​ការ​អនុវត្ត​តាម​ កិច្ចព្រម​ព្រៀង​ទីក្រុង​បារីស​ ដែល​ភាគី​ទាំង​អស់​និង​ប្រទេស​ហត្ថលេខី​ចំនួន​១៨​ បាន​ចូលរួម​ចុះ​ហត្ថលេខា​កាល​ពី​២៣ឆ្នាំ​មុន​ដោយ​សន្យា​ថា​ នឹង​ជួយ​ដល់​កម្ពុជា។

សមិទ្ធិផល​កិច្ច​ព្រមព្រៀង​ក្រុង​ប៉ារីស
សូម​រង់ចាំ

No media source currently available

0:00 0:23:05 0:00
ទាញ​យក​ពី​តំណភ្ជាប់​ដើម

លោក​សារ៉ាយ​បាន​ថ្លែង​ដូច្នេះ​ក្នុង​កម្មវិធី​ហេឡូវីអូអេ​ក្នុង​ពេល​លោក​ចូល​រួម​ជា​ វាគ្មិន​កាលពី​យប់​ថ្ងៃ​ព្រហស្បតិ៍។​ លោក​ថា​ បញ្ហា​ទាំង​អស់​នោះ​រាប់​បញ្ចូល​ទាំង​ការ​បោះឆ្នោត​ដែល​គ្មាន​ជំនឿ​ ប្រព័ន្ធ​យុត្តិធម៌​នៅ​តែ​គ្មាន​ឯករាជ្យ ​សារព័ត៌មាន​ ជាតិ​ស្ថិត​ក្រោម​ឥទ្ធិពល​គណបក្ស​កាន់​អំណាច​ បញ្ហា​រំលោភ​បំពាន​ដី​ធ្លី ​អសមភាព​រវាង​អ្នកក្រ​និង​អ្នក​មាន​ជាដើម​ ដែល​លោក​បាន​បញ្ជាក់​ថា​ ប្រទេស​នានា​គេ​នឹង​យក​ចិត្ត​ទុក​ដាក់។

«ខ្ញុំ​គិត​ថា ​ប្រទេស​ជា​ហត្ថលេខី​នេះ ​គេ​តាម​ឃ្លាំ​មើល​ដំណើរការ​វិវត្តន៍​ប្រទេស​ យើង​ជា​ហូរហែរ​ដូច​ជា​បញ្ហា​យើង​មាន​បញ្ហា​ថ្ងៃ៥ ​ថ្ងៃ​៦​ខែកក្កដា​ សហគមន៍​ អន្តរជាតិ​គេ​អត់​ព្រងើយ​កន្តើយ​ទេ។ គេ​បាន​ខិតខំ​មក​ចូលរួម​ជួយ​ស្តារ​ស្ថានភាព ​នេះ​ឡើង​វិញ​ដើម្បី​ឲ្យ​មាន​ដំណើរការ​ប្រក្រតី​ក្នុង​ការ​អនុវត្ត​ការ​បោះឆ្នោត​ប្រជាធិបតេយ្យ​ជា​ហូរហែរ​មក​ជា​បន្តបន្ទាប់។​ អញ្ចឹង​ប្រសិន​បើ​មាន​បញ្ហា​ដ៏​ធំ​ខ្លាំងក្លា​ដូច​ជា​មាន​ជម្លោះ​រវាង​ប្រទេស​ជិតខាង​យើង​រហូត​ដល់​បង្ក​អាវុធ​ដាក់​គ្នា ​អញ្ចឹង​ រឿង​បញ្ហា​ព្រំដែនអី​ រឿង​ហ្នឹង​គេ​អាច​រក​យន្តការ​អន្តរជាតិ​ហ្នឹង​គេ​ជួយ​បាន។ ហើយ​សន្និសីទ​ក្រុង​បារីស​នេះ​ រដ្ឋាភិបាល​បើ​មាន​បញ្ហា​អី​ធំ​អាច​មាន​សិទ្ធិ​ស្នើ​សុំ​ឲ្យ​សហ​ប្រធាន​ហ្នឹង​មាន​ការ​កោះប្រជុំ​ឡើង​វិញ»។

​លោក​ ធន សារ៉ាយ ប្រធាន​អង្គការ​សិទ្ធិ​មនុស្ស​អាដហុក
​លោក​ ធន សារ៉ាយ ប្រធាន​អង្គការ​សិទ្ធិ​មនុស្ស​អាដហុក

លោក​ទទួល​ស្គាល់​ថា​ មាន​បញ្ហា​វិជ្ជមាន​ជា​ច្រើន​ដែរ​កើត​ឡើង​ក្រោយ​កិច្ច​ព្រមព្រៀង​ក្រុង​បារីស​ដូច​ជា​មាន​មាន​ស្ថេរភាព​ មាន​សន្តិភាព​ អាច​រៀបចំ​ការ​បោះឆ្នោត​បាន​ក្នុង​ក្របខណ្ឌ​សេរីពហុបក្ស​ ដែល​ជា​កត្តា​មួយ​សំខាន់​សម្រាប់​ការ​ អភិវឌ្ឍ​ប្រទេសជាតិ​របស់​យើង ​សេដ្ឋកិច្ច​ រចនាសម្ព័ន្ធ​ ទោះបី​ជា​ដំណើរការ​ យឺតយ៉ាវ​ខ្លះ​ក្តី ​ប្រជា​ពលរដ្ឋ​មាន​ការ​យល់​ដឹង​ច្រើន​អំពី​សិទ្ធិមនុស្ស​និង​ប្រជាធិបតេយ្យ ​ដែល​ជា​ពិសេស​ប៉ុន្មាន​ឆ្នាំ​ចុង​ក្រោយ​នេះ​លោក​ថា ​ប្រជាពលរដ្ឋ​យើង​មាន​សេចក្តី​ក្លាហាន​ហ៊ាន​ទាមទារ​តវ៉ា​ការពារ​សិទ្ធិ​សេរីភាព​ ការពារ​ផល ប្រយោជន៍​របស់​ខ្លួន ​សង្គមស៊ីវិល​ក៏​មាន​ការ​រីក​ចម្រើន​ដែរ។

«ខ្ញុំ​សូម​រំលឹក​ថា​ក្រោយ​សន្និសីទ​ក្រុង​ប៉ារីស​គឺ​សមាគម​យើង​បាន​ជួប​ការ​លំបាក​ ណាស់​ គឺ​ថា​ ការ​បង្កើត​ទីស្នាក់ការ​មួយ​នៅ​ក្នុង​ខេត្ត​មួយ​នោះ​ គេប្រើ​យោធា​ ប៉ូលិស​រហូត​ដល់​មាន​រថក្រោះ​មួយ​មក​សន្ធាប់​ឲ្យ​យើង​បិទ​ការិយាល័យ​វិញ។ ដូច្នេះ​បើ​យើង​ប្រៀបធៀប​មក​ដល់​ឥឡូវ​ យើង​ឃើញ​ថា មាន​អង្គការ​រាប់​ពាន់​ ដែល​បាន​ដំណើការ​ ហើយ​មាន​សកម្មភាព​គ្រប់​ផ្នែក​គ្រប់​វិស័យ»។

លោក​ យ៉ង់ គឹមអេង​ ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍​និង​សន្តិភាព​បាន​ថ្លែង​ថា​ កិច្ចព្រម​ព្រៀង​សន្តិភាព​បាន​ផ្តល់​សារៈសំខាន់​យ៉ាង​ច្រើន​ដល់​កម្ពុជា​ ដូច​ជា​បង្រួបបង្រួម​គ្រប់​ភាគី​ជម្លោះ​ខ្មែរ​ទាំង​បួន​ បញ្ចប់​សង្គ្រាម​ និង​មាន​សន្តិភាព​ ផ្លាស់ប្តូរ​របប​គ្រប់គ្រង​មក​ជា​ព្រះរាជាណាចក្រ​ព្រះមហាកក្សត្រ​សោយរាជ្យ​ មាន​រដ្ឋធម្មនុញ្ញ​មាន​លក្ខណៈ​ប្រជាធិបតេយ្យ ​មាន​ការ​អនុវត្ត​នៅ​ទី​ផ្សារ​សេរី ​មាន​ទំនាក់ទំនង​ការ​ទូត​ជាមួយ​នឹង​ប្រទេស​ផ្សេងៗ​លើ​ពិភពលោក​ មាន​លក្ខណៈ​ទូលំ​ទូលាយ។​ ក្នុង​នោះ​ដែរ​យើង​ឃើញ​ថា​ បទដ្ឋាន​សិទ្ធិ​មនុស្ស​និង​ប្រជាធិបតេយ្យ ​ជា​គោល​សំខាន់​ក្នុង​ការ​ដឹកនាំ​និង​ការ​អភិវឌ្ឍ​ប្រទេស។

តែ​លោក​ក៏​បាន​អះអាង​ដែរ​ថា​ បញ្ហា​នៅ​មិន​ទាន់​បាន​បំពេញ​តាម​កិច្ច​ព្រមព្រៀង​ ក្រុង​ប៉ារីស​ក៏​នៅ​មាន​មួយ​ចំនួន​ដែរ​ដែល​លោក​បាន​រៀប​រាប់​ត្រួសៗ​ថា៖

«រឿង​ដែល​នៅ​សេស​សល់​មិន​បាន​បំពេញ​គឺ​រឿង​ធានា​ការពារ​បូរណភាព​ទឹកដី​ ដែល​តាម​កិច្ចព្រម​ព្រៀង​ទី​ក្រុង​ប៉ារីស​ហ្នឹង​ យើង​ឃើញ​ថា​មាន​បញ្ហា​នៅ​ឡើយ​ ដែល​យើង​ត្រូវ​មាន​ការ​ដោះ​ស្រាយ​មិន​ទាន់​បាន​ចប់សព្វ​គ្រប់​ព្រំដែន​ ហើយ​នៅ​ មាន​ការ​មន្ទិល​នៅ​ក្នុង​បញ្ហា​មួយ​ចំនួន។ ​ទី២ ​យើង​ឃើញ​ថា ការ​រំលោភ​បំពាន​ សិទ្ធិ​របស់​ប្រជាពលរដ្ឋ​ហ្នឹង​មាន​សភាព​ខ្លាំងក្លា​ដែរ​ជា​ពិសេស​បញ្ហា​ការ​ទន្ទ្រាន​ យក​ដី​ប្រជាពលរដ្ឋ​ក្រីក្រ ​តូចតាច ​អ្នក​ដែល​ទន់ខ្សោយ​ហ្នឹង»៕

XS
SM
MD
LG