សេតវិមានបានបញ្ជាក់កាលពីថ្ងៃសៅរ៍ថា ក្រុមមេធាវីរបស់ប្រធានាធិបតីសហរដ្ឋអាមេរិកលោក Joe Biden បានរកឃើញឯកសារសម្ងាត់បន្ថែមទៀតនៅផ្ទះរបស់លោកក្នុងទីក្រុង Wilmington រដ្ឋ Delaware។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AP។
មេធាវីប្រចាំសេតវិមានលោក Richard Sauber បានបញ្ជាក់នៅក្នុងសេចក្ដីថ្លែងការណ៍មួយថា ឯកសារសម្ងាត់ដែលសរុបមានចំនួន ៦ ទំព័រត្រូវបានរកឃើញក្នុងអំឡុងពេលនៃការធ្វើប្រតិបត្តិការស្វែងរកនៅបណ្ណាល័យឯកជនរបស់លោក Biden។ សេតវិមានបានឱ្យដឹងកាលពីពេលមុនថា មានឯកសារតែមួយទំព័រតែប៉ុណ្ណោះដែលត្រូវបានរកឃើញនៅទីនោះ។
ការរកឃើញចុងក្រោយបំផុតនេះគឺជាការរកឃើញបន្ថែមទៀតពីលើឯកសារដែលត្រូវបានរកឃើញកាលពីខែធ្នូនៅកន្លែងដាក់រថយន្តរបស់លោក Biden និងកាលពីខែវិច្ឆិកានៅការិយាល័យពីមុនរបស់លោកក្នុងមជ្ឈមណ្ឌល Penn Biden ក្នុងរដ្ឋធានីវ៉ាស៊ីនតោន។
ការទុកដាក់មិនបានត្រឹមត្រូវនូវឯកសារសម្ងាត់និងឯកសារផ្លូវការដែលបានមកពីរដ្ឋបាលរបស់អតីតប្រធានាធិបតីសហរដ្ឋអាមេរិកលោក Barack Obama កំពុងស្ថិតក្រោមការស៊ើបអង្កេតរបស់អតីតរដ្ឋអាជ្ញាសហរដ្ឋអាមេរិកលោក Robert Hur ដែលត្រូវបានតែងតាំងជារដ្ឋអាជ្ញាពិសេសកាលពីថ្ងៃព្រហស្បតិ៍ដោយរដ្ឋមន្ត្រីក្រសួងយុត្តិធម៌លោក Merrick Garland។
លោក Sauber បានបញ្ជាក់នៅក្នុងសេចក្ដីថ្លែងការណ៍មួយកាលពីថ្ងៃសៅរ៍ថា ក្រុមមេធាវីផ្ទាល់ខ្លួនរបស់លោក Biden ដែលមិនបានឆ្លងកាត់ការស៊ើបអង្កេតប្រវត្តិរូប បានឈប់ធ្វើការស្វែងរកឯកសារសម្ងាត់បន្តទៀតបន្ទាប់ពីបានរកឃើញឯកសារសម្ងាត់មួយទំព័រដំបូងកាលពីល្ងាចថ្ងៃពុធ។
លោក Sauber បានរកឃើញឯកសារសម្ងាត់ដែលនៅសេសសល់បន្ថែមទៀតកាលពីថ្ងៃព្រហស្បតិ៍ ក្នុងអំឡុងពេលដែលលោកសម្របសម្រួលការស្វែងរកឯកសារទាំងនេះដែលធ្វើឡើងដោយក្រសួងយុត្តិធម៌។
លោក Sauber ថ្លែងថា៖ «ខណៈពេលដែលខ្ញុំកំពុងផ្ទេរវាទៅឱ្យក្រុមមន្ត្រីក្រសួងយុត្ដិធម៌ដែលអមដំណើរជាមួយនឹងខ្ញុំ ឯកសារចំនួន ៥ ទំព័របន្ថែមទៀតដែលដាក់ស្លាកថាជាឯកសារសម្ងាត់ត្រូវបានរកឃើញក្នុងចំណោមនោះ ដែលធ្វើឱ្យឯកសារសម្ងាត់សរុបដែលយើងបានរកឃើញមានចំនួន ៦ ទំព័រ»។
លោកបានបន្ថែមថា៖ «ក្រុមមន្ត្រីក្រសួងយុត្តិធម៌ដែលមកជាមួយខ្ញុំបានយកឯកសារទាំងនោះភ្លាមៗ»។
លោក Sauber បាននិយាយកាលពីពេលមុនថា សេតវិមានមាន «ទំនុកចិត្តថា ការត្រួតពិនិត្យយ៉ាងហ្មត់ចត់នឹងបង្ហាញថាឯកសារទាំងនេះត្រូវបានទុកដាក់មិនបានត្រឹមត្រូវដោយអចេតនា ហើយលោកប្រធានាធិបតីនិងក្រុមមេធាវីរបស់លោកបានចាត់វិធានការភ្លាមៗបន្ទាប់ពីបានរកឃើញកំហុសនេះ»។
ការលើកឡើងរបស់លោក Sauber នេះមិនបានពន្យល់នោះទេអំពីមូលហេតុដែលសេតវិមានបានរង់ចាំអស់រយៈពេល ២ ថ្ងៃមុននឹងផ្ដល់តួលេខចុងក្រោយអំពីចំនួននៃឯកសារសម្ងាត់ដែលបានរកឃើញ។ សេតវិមានបានប្រឈមនឹងការស៊ើបអង្កេតរួចទៅហើយចំពោះការរង់ចាំអស់រយៈពេលជាង ២ ខែមុននឹងទទួលស្គាល់ថាបានរកឃើញឯកសារសម្ងាត់ដំបូងនៅការិយាល័យរបស់លោក Biden។
លោក Sauber បានបញ្ជាក់ជាថ្មីកាលពីថ្ងៃសៅរ៍ថា សេតវិមាននឹងសហការជាមួយនឹងក្រុមការងារស៊ើបអង្កេតរបស់លោក Hur៕
លោក Eric Tucker អ្នកសរសេរអត្ថបទសារព័ត៌មានរបស់ទីភ្នាក់ងារព័ត៌មាន AP រួមចំណែកនៅក្នុងសេចក្ដីរាយការណ៍នេះ។
ប្រែសម្រួលដោយអ្នកស្រី ហុង ចិន្ដា
