ក្រុមអ្នកឃ្លាំមើលស្ថានការណ៍អន្តរជាតិបញ្ចេញទស្សនៈចម្រុះគ្នាទាក់ទងនឹងអត្ថាធិប្បាយរបស់លោកនាយករដ្ឋមន្ត្រីហ៊ុន សែនលើបញ្ហាមជ្ឈឹមបូព៌ា និងការចំអកដល់យុទ្ធសាស្ត្រយោធារបស់លោកប្រធានាធិបតីស.រ.អា.បារ៉ាក់ អូបាម៉ាចំពោះបញ្ហាវាយប្រហារពួកឧទ្ទាមអ៊ីរ៉ាក់តាមរយៈទ័ពអាកាសថ្មីៗ។
លោកនាយករដ្ឋមន្ត្រីហ៊ុន សែនបានចំអកដល់លោកប្រធានាធិបតីស.រ.អា.បារ៉ាក់ អូបាម៉ាចំពោះបញ្ហាវាយប្រហារតាមអាកាសលើពួកឧទ្ទាមនៅអ៊ីរ៉ាក់ និងរិះគន់ជាទូទៅលើអន្តរាគមន៍លូកដៃពីបរទេស នាំឲ្យមានជម្លោះនិងសង្គ្រាមហែកហួរគ្នា មិនចេះចប់ ដូចនៅក្នុងប្រទេសមជ្ឈឹមបូព៌ាប្រទេស។ អត្ថាធិប្បាយរបស់លោកនាយករដ្ឋមន្ត្រីហ៊ុន សែនថ្លែងយ៉ាងដូច្នេះធ្វើឲ្យក្រុមអ្នកវិភាគនិងអ្នកតាមដានសភាពការណ៍អន្តរជាតិខ្លះធ្វើអត្ថាធិប្បាយផ្សេងៗគ្នា។ អ្នកខ្លះចាត់ទុកថា អត្ថាធិប្បាយរបស់លោកហ៊ុន សែនជាការដែលលោកចង់បង្ហាញថា លោកជាមេដឹកនាំអស្ចារ្យដែលអាចដោះស្រាយជម្លោះនយោបាយផ្ទៃក្នុងកម្ពុជាបានដោយមិនពឹងបរទេស។
លោកអ៊ូ ឫទ្ធី អ្នកឃ្លាំមើលស្ថានការណ៍កម្ពុជា និងអន្តរជាតិម្នាក់ក្នុងប្រទេសកម្ពុជាបានថ្លែងថា៖
«ខ្ញុំមើលទៅលោកនាយករដ្ឋមន្ត្រីហ៊ុន សែនគាត់ធ្វើការរិះគន់បញ្ឆិតបញ្ឆៀងទៅលើមហាអំណាចអាមេរិកដែលលូកដៃចូល ហើយទន្ទឹមនឹងហ្នឹង គាត់បានបង្ហាញពីស្នាដៃគាត់ថ្មីៗនេះ ដែលគាត់បានបញ្ចប់វិបត្តិនយោបាយជាមួយគណបក្សប្រឆាំងដោយគ្មានការជ្រៀតជ្រែកពីមហាអំណាច ឬក៏ប្រទេសដទៃចូលក្នុងរឿងហ្នឹង។ អញ្ចឹងគាត់ព្យាយាមពន្លេចថា ខ្មែរឥឡូវអាចដោះស្រាយបញ្ហាផ្ទៃក្នុងបានដោយខ្លួនឯង។ ហើយរឿងដែលខ្មែរដោះស្រាយបានដោយខ្លួនឯងគឺជារឿងមួយដែលឈ្នះៗទាំងអស់គ្នា។ វាមិនមានញ្ហាផ្ទៃក្នុងដូចមុន។ ផ្ទុយទៅវិញ ប្រទេសនៅអាស៊ីបូព៌ា មជ្ឈឹមបូព៌ាជាដើមមានបញ្ហារហូត មិនអាចចប់ទេ ដោយសារតែមានការលូកដៃពីមហាអំណាចជាពិសេសអាមេរិកាំងហ្នឹង»។
ថ្លែងជាសាធារណៈប្រាប់ក្រុមនិស្សិតសាកលវិទ្យាល័យមួយក្នុងរាជធានីភ្នំពេញ កាលពីសប្តាហ៍មុន លោកនាយករដ្ឋមន្ត្រីហ៊ុន សែនបានអះអាងថា លោកនៅប្រកាន់ជំហរដាច់ខាតចំពោះការដោះស្រាយបញ្ហាជាតិដោយយន្តការខ្មែរនិងខ្មែរដែលអាចបញ្ចប់បញ្ហាដោយងាយ និងមានសន្តិភាព។
«ដូច្នេះវាជាការអត់ប្រយោជន៍ទេក្នុងការដើរទៅរកការអន្តរាគមន៍របស់បរទេសនោះក្នុងការដោះស្រាយបញ្ហាផ្ទៃក្នុង។ ឥឡូវចំណោទឃើញហើយនៅមជ្ឈឹមបូព៌ា រឿងបរទេស។ សភាពការណ៍នៅលីប៊ីយ៉ាងម៉េច។ នៅពេលមិនយូរប៉ុន្មាន អ៊ីរ៉ាក់នេះនាំគ្នាអបអរសាទរអំពីការដែលអូបាម៉ាឲ្យប្រើទ័ពអាកាសវ៉ៃ»។
លោកហ៊ុន សែនបានបន្ថែមថា៖
«ខ្ញុំមិនថា ឲ្យអូបាម៉ាទេ តែឯកឧត្តមអើយ ប្រើសង្គ្រាមនៅក្នុងសង្គ្រាមឥណ្ឌូចិននេះច្រើនណាស់ កងទ័ពអាកាសនោះ តែទីចុងបំផុត លន់ នល់នៅតែរលំ កងទ័ពអាមេរិក ដកចេញ រត់ទាំងទូត រត់ទាំងអី ចេញពីស្រុកខ្មែរ ចេញពីវៀតណាម ចេញពីឡាវអស់។បើទ័ពអាកាសទប់ស្កាត់បានទាំងអស់ មិនចាំបាច់បង្កើតជើងគោកមកធ្វើអីទេ ហើយត្រូវចាំអ្នកណាកាន់ជើងគោក អ្នកហ្នឹងខ្លាំង មិនមែនពួកអាកាសទេ។ អាកាសក្បាលមិនជាប់មេឃ ជើងមិនជាប់ដីទេ ចុះទាបគេបាញ់ នៅខ្ពស់ធ្វើអីគេមិនបាន។ ហើយប្រើអាកាសមកធ្វើការការពារថ្មើរជើង ទៅមិនរួចទេ»។
លោកគុជ ច័ន្ទលី អ្នកវិភាគមួយរូបមកពីរដ្ឋម៉ារីឡែន បានអះអាងថា ការវិលត្រឡប់ទៅកាន់ប្រទេសអ៊ីរ៉ាក់វិញនេះជាបេសកកម្មកាតព្វកិច្ចរបស់ស.រ.អា.ក្នុងនាមជាប្រទេសមហាអំណាចដែលការពារពលរដ្ឋអ៊ីរ៉ាក់ អ្នកសេ្នហាជាតិអ៊ីរ៉ាក់ ដែលស្រឡាញ់ប្រជាធិបតេយ្យ ហើយស.រ.អា.មិនអាចឈរឱបដៃមើលការជិះជាន់សង្កត់សង្កិត និងការកាប់សម្លាប់ពីក្រុមដែលកាន់លទ្ធិផ្តាច់ការ ធ្វើបាបពលរដ្ឋទេ។
«អ៊ីរ៉ាក់មានបញ្ហាផ្ទៃក្នុងរបស់ខ្លួន ហើយរបបផ្តាច់ការនិយម ដែលចង់ការពារក្រុមអ្នកធ្វើភេរវកម្មផ្សេងៗហ្នឹង កាន់តែរីកឥទ្ធិពល។ ដូច្នេះហើយភារកិច្ចរបស់អាមេរិកាំងគឺត្រូវតែត្រឡប់ទៅវិញ។ តែការត្រឡប់ទៅវិញនេះ ប្រធានាធិបតីយបារ៉ាក់អូបាម៉ាមិនអាចបញ្ជូនកងទ័ពអាមេរិកាំងឲ្យទៅច្បាំងនៅប្រទេសអ៊ីរ៉ាក់ដូចមុនបានទៀតទេ ព្រោះទើបនឹងដកចេញមក ហើយសន្យាថា នឹងដកឲ្យអស់នៅចុងឆ្នាំ២០១៤នេះផង។ ដូច្នេះហើយការត្រឡប់ទៅវិញនេះគឺត្រឡប់ត្រឹមបានតែកងទ័ពអាកាស និងទីប្រឹក្សាចម្បាំងអាមេរិកាំងប៉ុណ្ណោះ»។
លោកថ្លែងថា អត្ថាធិប្បាយរបស់លោកនាយករដ្ឋមន្ត្រីហ៊ុន សែនដែលមិនចង់ឲ្យបរទេសលូកលាន់ក្នុងកិច្ចការប្រទេសកម្ពុជា និងការខំបង្ហាញថា ការលូកដៃចូលរបស់ស.រ.អា.ទៅប្រទេសនានានាំឲ្យមានបញ្ហាមិនចេះចប់នោះ គឺដូចជាអត្ថាធិប្បាយរបស់មេដឹកនាំប្រទេសផ្តាច់ការមួយចំនួនដែលមិនចង់ឲ្យប្រទេសប្រកាន់ប្រជាធិបតេយ្យចូលទៅ ដោយមេដឹកនាំប្រទេសផ្តាច់ការទាំងនោះភ័យខ្លាចការរលាយគោលលទ្ធិរបស់គេ ហើយពលរដ្ឋស្គាល់សេរីភាព និងប្រជាធិបតេយ្យពិតប្រាកដ។ នេះជាការអះអាងរបស់លោកគុជ ច័ន្ទលីមកពីរដ្ឋម៉ារីឡែនស.រ.អា.។
«ព្រោះគេមិនចង់ឲ្យប្រទេសដែលលើកតម្កើងលទ្ធិប្រជាធិបតេយ្យ លើកតម្លៃមនុស្សហ្នឹងជ្រៀតជ្រែកចូលទៅក្នុងប្រទេសមួយដែលគេកំពុងតែបិទទ្វាវ៉ៃឆ្កែ បិតទ្វារដើម្បីធ្វើបាបប្រជាពលរដ្ឋ។ គេមិនចង់ឲ្យប្រទេសដែលស្រឡាញ់ប្រជាធិបតេយ្យ ស្រឡាញ់សិទ្ធិមនុស្សហ្នឹងជ្រៀតជ្រែក ទៅឃាត់ឃាំងគេទេ។ រឿងនេះខ្ញុំអាចយល់បាននូវប្រសាសន៍សម្តេចតេជោហ៊ុន សែននៃប្រទេសខ្មែរយើងហ្នឹង។ ហើយប្រទេសផ្តាច់ការនិយមទាំងឡាយ ទាំងអស់ហ្នឹង តាំងពីប្រទេសអ៊ីរ៉ាក់ជំនាន់សាដាម ហូសេន តាំងពីប្រទេសលីប៊ីជំនាន់ ហ្កាដាហ្វីក្តី សុទ្ធតែដូចគ្នាអញ្ចឹងឯង មិនចង់ឲ្យប្រទេសស្រឡាញ់លទ្ធិប្រជាធិបតេយ្យហ្នឹង យកចិត្តទុកដាក់នឹងសុខទុក្ខប្រជាពលរដ្ឋរបស់ខ្លួនទេ ព្រោះខ្លួនអាចធ្វើអ្វីបានតាមចិត្តនៅក្នុងប្រទេសរបស់ខ្លួនហ្នឹង»។
បើយោងតាមតួលេខរបស់អ.ស.ប.ផ្នែកជនភៀសខ្លួនបានឲ្យដឹងថា ពលរដ្ឋអ៊ីរ៉ាក់និងស៊ីរី និងលីប៊ីជាច្រើនម៉ឺននាក់បានស្លាប់ដោយអំពើហិង្សា ហើយពលរដ្ឋជាច្រើនលាននាក់កំពុងរត់គេចខ្លួនពីផ្ទះសម្បែងរបស់ពួកគេ ចាប់តាំងពីមានការដួលរលំរបបមេដឹកនាំ ដែលកាន់អំណាចផ្តាច់ការយូរ និងសង្គ្រាមស៊ីវិលមិនទាន់បញ្ចប់នេះ។
ដើម្បីទប់ស្កាត់ការរីករាលដាលរបស់ពួកភេរវករអៃស៊ីល(ISIL)ក្នុងប្រទេសអ៊ីរ៉ាក់ដែលកំពុងហ៊ុំព័ន្ធប្រជាពលរដ្ឋភាគតិចអ៊ីរ៉ាក់ យេស៊ីឌី (Yezidi) និងពលរដ្ឋជនជាតិភាគតិចផ្សេងៗទៀតក្នុងតំបន់ភ្នំភាគខាងជើងប្រទេសអ៊ីរ៉ាក់នោះ លោកប្រធានាធិបតីស.រ.អា. បារ៉ាក់ អូបាម៉ាបញ្ជាឲ្យមានការវាយប្រហារតាមអាកាសកាលពីថ្ងៃទី៧ខែសីហា។
«ថ្ងៃនេះខ្ញុំបានអនុញ្ញាតឲ្យមានប្រតិបត្តិការចំនួនពីរក្នុងប្រទេសអ៊ីរ៉ាក់គឺការវាយ ប្រហារតាមអាកាសចំគោលដៅដើម្បីការពារបុគ្គលិកអាមេរិកាំង ហើយនឹងកិច្ចប្រឹងប្រែងជួយផ្នែកមនុស្សធម៌ដើម្បីជួយពលរដ្ឋអ៊ីរ៉ាក់រាប់ពាន់គ្រួសារដែលកំពុងជាប់គាំងនៅក្នុងតំបន់ភ្នំ ដោយគ្មានម្ហូបអាហារនិងទឹកទទួលទាន ដែលអាចស្លាប់នៅទីនោះ»។
ការជួយនេះគឺផ្អែកតាមការស្នើសុំរបស់មេដឹកនាំអ៊ីរ៉ាក់ផងដែរ ដែលលោកបញ្ជាក់ ថា ស.រ.អា.មិនអាចនៅស្ងៀមបានទេ ជាពិសេសត្រូវតែរារាំងអំពើប្រល័យពូជសាសន៍។
«នៅពេលយើងប្រឈមមុខនឹងស្ថានការណ៍ដូចដែលយើងជួបនៅតំបន់ភ្នំ ដែលពលរដ្ឋស្លូតត្រង់អាចរងអំពើហិង្សា សាហាវយង់ឃ្នង ហើយពេលយើងមានកាតព្វកិច្ចក្នុងការជួយរឿងនេះ ដោយមានការស្នើសុំពីរដ្ឋាភិបាលអ៊ីរ៉ាក់ ហើយនឹងនៅពេលដែលយើងមានសមត្ថភាពដ៏ពិសេសក្នុងការជួយបញ្ជៀសអំពើសម្លាប់រង្គាល ពេលនេះខ្ញុំជឿថា ស.រ.អា.មិនអាចបិទភ្នែកបានទេ។ យើងអាចធ្វើសកម្មភាពយ៉ាងប្រុងប្រយ័ត្ននិងប្រកបដោយការទទួលខុសត្រូវដើម្បីរារាំងអំពើប្រល័យពូជសាសន៍ដ៏មានសក្តានុពលនោះ។ រឿងនេះហើយដែលយើងកំពុងចាត់វិធានការនៅតំបន់ភ្នំនេះ»។
ស.រ.អា. ថ្មីៗនេះដែរ បានសម្រេចចិត្តបញ្ជូនទីប្រឹក្សាយោធា១៣០នាក់ទៅកាន់ ប្រទេសអ៊ីរ៉ាក់ដើម្បីជួយដល់កងទ័ពអ៊ីរ៉ាក់ប្រយុទ្ធប្រឆាំងនឹងពួកឧទ្ទាមដែលចេះតែពង្រីកការវាយលុក និងកាន់កាប់ទឹកដីធំទៅៗ រួមទាំងនៅភាគពាយព្យប្រទេសនោះ។
លោកព្រហ្ម សៅរ៍នរ៉ា អ្នកតាមដានសភាពការណ៍ក្នុងប្រទេសអ៊ីរ៉ាក់រស់នៅក្នុងរដ្ឋ វីជីនៀ ស.រ.អា. បានអះអាងថា ជំនួយមនុស្សធម៌របស់អាមេរិកាំងប្រឆាំងនឹងពួកអៃស៊ីលនោះបានធ្វើឲ្យពលរដ្ឋអ៊ីរ៉ាក់ដែលគេព័ទ្ធជាប់នោះ បានរួចខ្លួន និងទទួលម្ហូបអាហារ។ លោកបានអះអាងថា បញ្ហាអ៊ីរ៉ាក់ និងកម្ពុជាជារឿងផ្សេងគ្នា មិនមែនជាស្ថានការណ៍ដូចគ្នា ដែលងាយដោះស្រាយ ដូចបញ្ហានយោបាយខ្មែរ ដែលលោកនាយករដ្ឋមន្ត្រីហ៊ុន សែនបានបញ្ជាក់នោះទេ។
«រឿងអ៊ីរ៉ាក់ជារឿងរបស់ជាតិសាសន៍ចំនួនបី មានសាសនាខុសគ្នា។ នេះគឺជារឿងមួយ។ រឿងស៊ីរីក៏ជារឿងពួកឧទ្ទាមអៃស៊ីលចូលមក ចង់មកគ្រប់គ្រង។ ដូច្នេះការដោះស្រាយដែលគាត់មានប្រសាសន៍ហ្នឹង វាអត់ចូលនៅក្នុងរឿងខ្មែរនោះទេ។ រឿងអស់ហ្នឹង វាសុទ្ធតែជារឿងប្លែកៗ ខុសគ្នា បានជារឿងហ្នឹងវាមិនចប់»។
លោកសោរ៍នរ៉ាបានអះអាងថា បញ្ហាខ្មែរដោះស្រាយមិនចប់គឺដោយសារលោកចោទប្រកាន់ថា វៀតណាមនៅលូកដៃចូលក្នុងបញ្ហាផ្ទៃក្នុងខ្មែរ។
«ការដែលជាប់គាំងនៅក្នុងរឿងស្រុកខ្មែរហ្នឹងគឺដោយសារតែមានគំនាបពីពួក វៀតណាមហ្នឹង។ គេគាបមកលើគណបក្សប្រជាជនកម្ពុជា។ គេធ្វើស្អីៗ សព្វគ្រប់ហ្នឹង។ ពួកគណបក្សប្រជាជនកម្ពុជា លោក ហ៊ុន សែនហ្នឹងធ្វើតាមតែបញ្ជារបស់គេទេ»។
លោកពុំបានផ្តល់អត្ថាធិប្បាយលម្អិតថា វៀតណាមពាក់ព័ន្ធនឹងបញ្ហាខ្មែរយ៉ាងណាទេ។ ក្រុមមន្ត្រីខ្មែរ រួមទាំងលោកនាយករដ្ឋមន្ត្រីហ៊ុន សែនធ្លាប់វាយប្រហារទៅលើអ្នករិះគន់ដែលថា លោកជាអាយ៉ងរបស់វៀតណាម ដោយលោកអះអាងថា កម្ពុជាជាប្រទេសមានអធិបតេយ្យភាព។
លោក សុខ ទូច សាកលវិទ្យាធិការសកលវិទ្យាល័យខេមរៈ និងជាអ្នកវិភាគមួយរូប បានអះអាងថា ការដោះស្រាយបញ្ហាកម្ពុជារវាងខ្មែរ និងខ្មែរគឺជារឿងដែលពិបាកធ្វើ ដោយសារទង្វើ និងពាក្យសម្តីរបស់អ្នកនយោបាយមានលក្ខណៈផ្ទុយគ្នា។ លោកបានកត់សម្គាល់ថា កម្មករ និងមន្ត្រីសហជីព និងមន្ត្រីសង្គមស៊ីវិល ដែលបានជាប់គុក២៣នាក់ ក្រោយការបង្ក្រាបផ្តាច់ផ្តិលជីវិតកាលពីដើមឆ្នាំដោយសារការទាមទារឲ្យមានការដំឡើងប្រាក់ខែពី៨០ទៅ១៦០ដុល្លារស.រ.អា.នោះ ត្រូវបានដោះលែងក្រោយពីបរទេសអន្តរាគមន៍ ក្រោយពីកម្ពុជាទទួលជំនួយពីបទេស និងប្រើផលិតផលបរទេស សូម្បីតែរបស់របរដូចជាបន្លែ និងរបស់របរតូចតាច។
«ប៉ុន្តែខ្មែរបំផ្លាញខ្មែរដើម្បីបរទេសច្រើនណាស់ កាប់ព្រៃឈើខ្មែរ លុបបឹង។ បឹងនៅភ្នំពេញលែងមានទៀតហើយ។ តើខ្មែរអាចដោះស្រាយបញ្ហាខ្មែរដោយនីតិវិធីបែបណា? ហើយខ្មែរមិនត្រូវការបរទេស មិនត្រូវការពឹង។ សព្វថ្ងៃហ្នឹងគឺដោយសារតែរឿងជំនួយ ពឹងបរទេសទាំងអស់។ ខ្មែរហូបផលិតផលបរទេសទាំងអស់។ យើងដឹងថា យើងរស់នៅក្នុងសាកលភាវូបនីយកម្ម យើងត្រូវការបរទេស ត្រូវការទំនាក់ទំនងនៅលើឆាកអន្តរជាតិ តែកន្លែងខ្លះវាហួសហេតុ»។
លោកបានអះអាងថា កម្ពុជាមិនទាន់អាចបញ្ឈប់ការពឹងពាក់បរទេសបានទេ ពេលនេះ តែក៏បានទទួលស្គាល់ដែរថា ការជ្រៀតជ្រែកពីបរទេស និងអំណាចមហាអំណាចលើប្រទេសមួយចំនួនក៏ធ្វើឲ្យប្រទេសទាំងនោះមានបញ្ហាមិនចេះចប់មែន។
លោកបានលើកយកការជ្រៀតជ្រែករបស់ស.រ.អា.ក្នុងការចូលរួមផ្តួលរំលំរបបសាដាំ ហូសេន (Saddam Hussein) នៅអ៊ីរ៉ាក់ និងម័រម៉ា ហ្កាដាហ្វ៊ី (Muammar Gaddafi) នៅ លីប៊ី។ លោកសុខ ទូចបានសង្កេតឃើញថា ប្រទេសទាំងនេះពិតជានៅមានបញ្ហាច្រើន ដែលមិនចេះចប់ មិនចេះហើយ ហើយបញ្ហាបានកើតឡើង ទាំងគ្រោះថ្នាក់ដល់ជីវិតជាប្រចាំ មានការបំផ្លាញហេដ្ឋារចនាសម្ព័ន្ធ និងការរំលំរលាយវប្បធម៌។
«អញ្ចឹងក្រោយពីការផ្តួលរំលំ យើងសិក្សាពីសាដាំ ហូសេន និងហ្កាដាហ្វ៊ី តើប្រជាជនអ៊ីរ៉ាក់ស្លាប់ប៉ុន្មាន? ហើយឥឡូវក្រោយពីការផ្តួលរំលំមួយថ្ងៃៗ ស្លាប់ប៉ុន្មាន? រឿងហ្នឹងហើយដែលយើងត្រូវសិក្សា ពីព្រោះវប្បធម៌ប្រជាធិបតេយ្យអាចដុះនៅស.រ.អា. តែប្រជាធិបតេយ្យមិនអាចដុះនៅអ៊ីរ៉ាក់បានទេ។ ទាំងអស់នេះ យើងត្រូវសិក្សា។ យើងអាចយកមកពិចារណា តែមិនអាចយកមកកូពីដាក់(ចម្លងតាម)បានទេ។ អញ្ចឹងអ្វីដែលអាមេរិកធ្វើ អាមេរិកបានបញ្ឆេះ ហើយក៏ចាប់ផ្តើម អត់បានបញ្ចប់រឿងនេះទេ។ ឥឡូវនេះបន្តឆេះមកទៀត។ អញ្ចឹងបើសិនយើងបញ្ឆេះវាហើយ យើងត្រូវតែបញ្ចប់ឲ្យផុតចុងផុតដើម។ ហើយបើមិនបញ្ចប់ទេ បង្ហូរឈាមកាន់តែខ្លាំងឡើង»។
ទោះជាយ៉ាងណាក៏ដោយ លោកនាយករដ្ឋមន្ត្រី ហ៊ុន សែន ដែលកាន់អំណាចជិត៣ទសវត្សរ៍ ហើយត្រូវគេទាមទាមឲ្យចុះចេញពីមុខតំណែងជាច្រើនលើកនោះ បានចាត់ទុកថា បញ្ហាបរទេសទាំងអស់ជាមេរៀនសម្រាប់កម្ពុជា៖
«អញ្ចឹងបានថា រឿងរ៉ាវខ្លះគឺសម្រាប់ប្រទេសដទៃហ្នឹងគឺជាមេរៀនមួយសម្រាប់យើងដែរ។ អតីតកាលរបស់យើង យើងក៏ត្រូវរៀន។ ពេលដែលមានការបែកបាក់ជាតិ យើងពិបាកណាស់ ឆ្លងកាត់នូវសោកនាដ្ឋកម្ម។ នាទសវត្សរ៍១៩៧០មានសង្គ្រាម បន្ទាប់ទៅ របបប្រល័យពូជសាសន៍ ទំរាំតែដល់នយោបាយឈ្នះៗ ត្រូវប្រើពេលជាប់២០ឆ្នាំ។ ឥឡូវផលវិបាករបស់វាមិនទាន់ចប់ផង»។
លោកនាយករដ្ឋមន្ត្រីហ៊ុន សែនបានថ្លែងយ៉ាងដូច្នេះ គឺភ្លាមៗក្រោយពេលគណបក្សប្រជាជនកម្ពុជារបស់លោក និងគណបក្សសង្គ្រោះជាតិរបស់លោកសម រង្ស៉ី និងលោកកឹម សុខាបានបញ្ចប់ពហិការមិនចូលរួមប្រជុំសភារយៈពេល១ឆ្នាំ ហើយបានបញ្ចប់ការគាំងដំណើរផ្នែកនយោបាយ ដែលមានអំពើហិង្សាកើតឡើងខ្លះៗ ម្តងជាពីរដងនោះ ហើយនឹងក្រោយពីមានកិច្ចព្រមព្រៀងរួមគ្នាពីគណបក្សទាំងពីរថា នឹងបម្រើប្រទេសជាតិរួមគ្នានោះ៕
