ភ្ជាប់​ទៅ​គេហទំព័រ​ទាក់ទង

កម្ពុជា បង្ហាញ​ប្រតិកម្ម​ចម្រុះ​ទៅ​លើ​សេចក្ដី​ព្រាង​ច្បាប់​ថវិកា​របស់​​​ព្រឹទ្ធសភាសហរដ្ឋ​អាមេរិក


រូបឯកសារ៖ ​អ្នកបោះឆ្នោត​មួយ​រូប​នៅ​ក្នុង​មណ្ឌល​បោះឆ្នោត​សាលាបឋមសិក្សា​ព្រះនរោត្តម​​​នៅ​រាជធានី​ភ្នំពេញ​ចូល​រួម​បោះឆ្នោត​ជ្រើស​រើស​​ក្រុមប្រឹក្សា​រាជធានី​ខេត្ត ក្រុង ស្រុក ខណ្ឌ អាណត្តិ​ទី២ កាល​ពី​ថ្ងៃ​​ព្រឹក​ថ្ងៃ​អាទិត្យ​ទី​១៨ ខែ​ឧសភា ឆ្នាំ​២០១៤។ (ស៊ុយ ហ៊ាមខេមរា/VOA)

មន្ត្រី​រដ្ឋាភិបាល​ និង​ក្រុម​អង្គការ​សង្គម​ស៊ីវិល​កាល​ពី​ថ្ងៃ​អាទិត្យ​ បាន​ផ្ដល់​មតិខុសៗគ្នា​ ចំពោះ​ការ​ត្រៀម​ផ្ដល់​ជំនួយ​ថវិកា​ជិត​៨០លាន​ដុល្លារ​របស់​សហរដ្ឋ​អាមេរិក​មក​ដល់​រាជរដ្ឋាភិបាល​កម្ពុជា។

ជំនួយ​ថវិកា​ជិត​៨០​លាន​ដុល្លារ​ គឺ​ស្ថិត​នៅ​ក្នុង​សេចក្ដី​ព្រាង​ច្បាប់​ថវិកា​មួយ​ ដែល​គ្រោង​ទឹក​ប្រាក់​សរុប​ជាង​ ៥២​ពាន់​លាន​ដុល្លារ​ សម្រាប់​ចំណាយ​ទៅ​លើ​កិច្ច​ប្រតិបត្តិការ​ទាំង​ក្នុង​ និង​ក្រៅ​ប្រទេស​របស់​សហរដ្ឋអាមេរិក​ រួមមាន​ ការ​ពង្រឹង​ចំណង​ទាក់​ទង​ជាមួយ​ប្រទេស​ជា​សម្ព័ន្ធមិត្ត​ ការ​ប្រយុទ្ធ​ប្រឆាំង​នឹង​សកម្មភាព​ក្រុម​ភេរវកម្ម​ ការ​ពង្រឹង​វិស័យ​សុខាភិបាល​ពិភពលោក និង​ការ​ពង្រឹង​ប្រជាធិបតេយ្យ។

ប៉ុន្តែ សំណើ​ថវិកា​សម្រាប់​ប្រទេស​កម្ពុជា​នេះ ក៏​ភ្ជាប់​មក​ជាមួយ​នូវ​លក្ខខណ្ឌ​ផង​ដែរ ពោល​គឺ​កម្ពុជា​នឹង​ទទួល​បាន​ជំនួយ​នេះ ​លុះត្រាតែ «រដ្ឋាភិបាល​នៃ​ប្រទេស​កម្ពុជា​បញ្ឈប់​អំពើ​ហិង្សា និង​ការ​យាយី​អង្គការ​សង្គម​ស៊ីវិល ​និង​គណបក្ស​ប្រឆាំង​ក្នុង​ប្រទេស​កម្ពុជា»។

លោក​ ផៃ​ ស៊ីផាន​ អ្នក​នាំ​ពាក្យ​នៃ​ទីស្ដីការ​គណៈរដ្ឋមន្ត្រី​ បាន​ប្រាប់​VOAកាល​ពី​ថ្ងៃ​អាទិត្យ​ថា​ លោក​មិន​យល់ថា​តើ​សហរដ្ឋ​អាមេរិក បានធ្វើ​ការ​វាស់​ស្ទង់​យ៉ាង​ណា​ ចំពោះ​ការ​អនុវត្ត​លទ្ធិប្រជាធិបតេយ្យ​ នៅ​ប្រទេស​កម្ពុជា។

ទាក់​ទិន​លក្ខខណ្ឌ​ដែល​ភ្ជាប់​នឹង​ជំនួយ​ដែល​ព្រឹទ្ធ​សភា​អាមេរិក​គ្រោង​ផ្តល់​ដល់​កម្ពុជា​នោះ​ លោក​ ផៃ​ សុផាន​ បាន​ថ្លែង​បញ្ជាក់​យ៉ាង​ដូច្នេះ​ថា៖​

«តើ​ពួក​អ្នក​ជាប់​គុក​ប៉ុន្មាន​ ជាប់​ដោយសារ​រឿង​អី?​ អង្គ​ហេតុ​អី​ថា​អង្គច្បាប់​យ៉ាង​ម៉េច​ មិន​មើល​អា​ហ្នឹង ឬ​ឲ្យ​តែ​គណបក្ស​ប្រឆាំង​ សង្គម​ស៊ីវិល គឺ​នៅ​តែ​ក្រៅ​ច្បាប់​ នៅ​ពីលើ​ច្បាប់​រហូត​យ៉ាង​ម៉េច?​ ជជែក​គ្នា​ ឲ្យ​ពិត​ប្រាកដ​មើល!​ តើ​ពួក​ហ្នឹង​ជាប់​គុក​ដោយ​សារ​អី?​ នែ៎​ មូលហេតុ​អី? អង្គហេតុ​អី?​ តើ​ហេតុ​ម៉េច​ បាន​គេ​យក​ច្បាប់​ហ្នឹង​យក​ម​ក​ គេ​ធ្វើ​ការ​វិនិច្ឆ័យ? អ្នក​ណា​មាន​អំណាច​លើ​ការ​វិនិច្ឆ័យ?​ លើអំណាច​វិនិច្ឆ័យ​ នៅ​លើ​មាត់​របស់​ពួក​អ្នក​សហរដ្ឋ​អាមេរិក​ ឬ​ច្បាប់​អនុញ្ញាត​ឲ្យ​ចៅក្រម​ ឬ​ព្រះ​រាជ​អាជ្ញាហ្នឹង​ អ្នក​ដាក់​ទោស​ទណ្ឌ?»។

លោក​ សុខ​ ឥសាន្ត ជា​អ្នកនាំពាក្យ​គណបក្ស​ប្រជាជន​កម្ពុជា​ និង​ជា​អ្នក​តំណាងរាស្ត្រ​គណបក្ស​គ្រប់​គ្រង​ប្រទេស​ បាន​មាន​ប្រសាសន៍​ប្រាប់​ VOA​ ថា​ រាជរដ្ឋាភិបាល​កម្ពុជា​ ស្វាគមន៍​ចំពោះ​ការ​ផ្ដល់​ជំនួយ​ថវិកា​ពី​សហរដ្ឋ​អាមេរិក។

លោក​អះអាង​ថា​ រាជរដ្ឋាភិបាល​កម្ពុជា​ មិន​បាន​ញាំញី​ទៅ​លើ​គណបក្ស​ប្រឆាំង​នោះ​ទេ។

លោក​បន្ថែម​ថា​ ការ​ផ្ដល់​ឬ​មិន​ផ្ដល់​ឲ្យ​ជំនួយ​នេះ​ គឺ​អាស្រ័យ​លើ​ការ​សន្និដ្ឋាន របស់​សហរដ្ឋ​អាមេរិក​ចំពោះ​ដំណើរការ​ពង្រឹង​លទ្ធិប្រជាធិបតេយ្យ​ និង​សិទ្ធិ​មនុស្ស​នៅ​កម្ពុជា។

«សូម​ជម្រាប​ជូន​ថា​ រាជរដ្ឋាភិបាល​ ក៏​ដូច​ជា​គណបក្ស​ប្រជាជន ​មិនបាន​យាយី​ទៅ​លើ​គណបក្ស​ប្រឆាំង​ទេ​បាទ។​ អីចឹង​ទេ​ បញ្ហា​ដែល​កើត​ឡើង​កន្លង​ទៅ​នេះ​ មិន​មែន​ជា​ការ​យាយី​ទេ​ តែ​ជា​លទ្ធផល​នៃ​ការ​ប្រព្រឹត្ត​ល្មើស​ច្បាប់​របស់​សាមីជន​ នៅ​ក្នុង​ជួរ​គណបក្ស​សង្គ្រោះ​ជាតិ»។

ថវិកា​ជិត​៨០លាន​ដុល្លារ​ដែល​ព្រឹទ្ធសភា​សហរដ្ឋ​អាមេរិក​ព្រាង​សម្រាប់​ផ្ដល់​ជូន​កម្ពុជា​ នឹង​ផ្ដោត​ទៅ​លើ​ការ​អភិវឌ្ឍ​ប្រទេស​នេះ ​ក្នុង​វិស័យ​មួយ​ចំនួន​ដូច​ជា វិស័យ​សុខាភិបាល សេដ្ឋកិច្ច ប្រឆាំង​ភេរវកម្ម ការ​ដោះ​មីន​និង​គ្រាប់​មិន​ទាន់​ផ្ទុះ ហើយ​និង​ដំណើរការ​កាត់ទោស​អតីត​មេដឹកនាំ​ខ្មែរក្រហម​ក្នុង​ប្រទេស​កម្ពុជា។

លោក​ អំ សំអាត​ ប្រធាន​បច្ចេកទេស​ស៊ើប​អង្កេត​នៃ​អង្គ​ការ​ការ​ពារ​សិទ្ធិ​មនុស្ស​លីកាដូ​ បាន​ថ្លែង​ថា​ ប្រទេស​កម្ពុជា​ ពិត​ជា​បាន​និង​កំពុង​ប្រឈម​នឹង​ការ​រំលោភ​សិទ្ធិ​មនុស្ស​ ដូចជា​ការ​ចាប់​ខ្លួន​មន្ត្រី​សិទ្ធិ​មនុស្ស​អាដហុក​ និង​មន្ត្រី​នៃ​គណៈកម្មាធិការ​ជាតិ​រៀប​ចំ​ការ​បោះ​ឆ្នោត។​

លោក​បញ្ជាក់​ថា​ ការ​លើកឡើង​របស់​ព្រឹទ្ធ​សភា​សហរដ្ឋអាមេរិក​គឺ​ស្រប​ទៅ​តាម​ស្ថានភាព​ជាក់​ស្ដែង​ដែល​កើតមាន​នៅ​កម្ពុជា។

«យើង​ឃើញ​ថា​ ស្ថាន​ភាព​នយោបាយ​មាន​សភាព​តាន​តឹង​ បាន​ន័យ​ថា​ កំពុងតែ​កម្ដៅ​នយោបាយ​កំពុង​តែ​ក្តៅ​គគុក​ ហើយ​ការ​គោរព​សិទ្ធិ​មនុស្ស​ក៏​ធ្លាក់​ចុះ។​ អីចឹង​ហើយ​ បាន​ជា​សហរដ្ឋ​អាមេរិក​ហ្នឹង​គេ​ប្រាប់​ថា​ បើ​សិន​ជា​កម្ពុជា​យើង​ ចង់​បាន​ជំនួយ​ អា​ហ្នឹង​ត្រូវ​តែ​មាន​ការ​កែ​លម្អ​ឡើង​វិញ​នូវ​ស្ថាន​ភាព​នៃ​ការ​រំលោភ​សិទ្ធិមនុស្ស​ ក៏ដូចជា​ ដោះស្រាយ​បញ្ហា​នយោបាយ​ហ្នឹង​ឲ្យ​ចុះ​កម្ដៅ​ឡើង​វិញ»។

លោក​បន្ថែម​ថា​ មន្ត្រីនៃ​រាជរដ្ឋាភិបាល​កម្ពុជា​ គួរ​យក​មតិ​រិះគន់​មាន​លក្ខណៈ​ស្ថាបនា​របស់​សង្គម​ស៊ីវិល​ និង​ស្ថាប័ន​ដទៃ​ទៅ​ពិចារណា​សម្រាប់​ការ​កែសម្រួល​នៃ​របៀប​លេង​នយោបាយ​ដែល​មិន​ចំណេញ​ដល់​ប្រជារាស្ត្រ​ ប៉ុន្តែ​ចំណេញ​តែ​ផល​ប្រយោជន៍​ផ្លូវ​នយោបាយ​មួយ​ដែល​មិន​អាច​ធ្វើ​ឲ្យប្រទេស​ដើរ​ទៅ​មុខ​ក្នុង​គន្លង​ប្រជាធិបតេយ្យ​មួយ​ពិតប្រាកដ​នោះ។​

ស្ថានភាព​តានតឹង​ផ្នែកនយោបាយ​ដែល​ចេះ​តែ​អូស​បន្លាយ​មក​នេះ​ ត្រូវ​អ្នក​សង្កេតការណ៍​បោះ​ឆ្នោត​នៅ​ប្រទេស​កម្ពុជា​ យល់​ថា​ អាច​ជា​ចលករ​នាំឲ្យ​ខូច​ដល់​ដំណើរការ​រៀបចំ​ការ​បោះឆ្នោត​ក្នុង​ប្រទេស​ ឬ​ក៏​បង្ក​ការ​ភ័យ​ខ្លាច​ដល់​អ្នក​បោះ​ឆ្នោត។

អ្នក​សង្កេតការណ៍​បោះ​ឆ្នោត​និយាយ​ថា​ ប្រសិន​បើ​ការ​បោះ​ឆ្នោត​មិន​ត្រូវ​បាន​ធ្វើឡើង​ដោយ​ត្រឹម​ត្រូវ​ និង​យុត្តិធម៌​ទេ ​នោះ​លទ្ធិប្រជាធិបតេយ្យ​របស់​កម្ពុជា​ មុខ​ជា​នឹង​ដើរ​ថយក្រោយ។​

លោក​ សំ គន្ធាមី​ នាយក​ប្រតិបត្តិ​នៃ​គណៈកម្មាធិការ​អព្យាក្រឹត្យ​ និង​យុត្តិធម៌​ ដើម្បី​ការ​បោះ​ឆ្នោត​ដោយ​សេរី​ និង​ត្រឹមត្រូវ​នៅ​កម្ពុជា​ ហៅ​កាត់​ថា​ និកហ្វិក​ បាន​ថ្លែង​ថា​ ក្រោយ​ការ​លើក​ឡើង​របស់​ព្រឹទ្ធសភា​អាមេរិក​ ​រាជរដ្ឋាភិបាល​កម្ពុជា​ ត្រូវ​ធ្វើ​ការ​បន្ធូរ​បន្ថយ​ភាព​តានតឹង​ផ្នែក​នយោបាយ​នៅ​ក្នុង​ប្រទេស​ ដើម្បី​បើក​ផ្លូវ​ឲ្យ​មាន​បរិយាកាស​សម​ប្រកបមួយ​ដល់​ដំណើរ​ការ​រៀប​ចំ​ការ​បោះ​ឆ្នោត​នៅ​ក្នុង​ប្រទេស។​

លោក​បញ្ជាក់​បន្ត​ថា​ លទ្ធិប្រជាធិបតេយ្យ ​នឹង​ពុំ​មាន​នៅ​ក្នុង​ប្រទេស​កម្ពុជា​នោះ​ទេ​ ប្រសិន​បើ​ការ​បោះ​ឆ្នោត នឹងត្រូវ​បាន​រៀបចំឡើង​ដោយ​ បរិយាកាស​ដែល​ពោរពេញ​ទៅ​ដោយ​ការភ័យខ្លាច​នោះ។​

«បើ​សិន​ជា​លទ្ធិប្រជាធិបតេយ្យ​របស់​យើង​ ការ​បោះ​ឆ្នោត​របស់​យើង​ មិន​ប្រកប​ដោយ​សេរី​និង​យុត្តិ​ធម៌​ទេ​ អា​ហ្នឹង​ហើយ​ក៏​អត់​មាន​ប្រជាធិបតេយ្យ​ដែរ​ ហើយ​បើ​ការ​បោះ​ឆ្នោត​យើង​នៅ​មាន​បរិយាកាស​នយោបាយ​ហ្នឹង​ មាន​ការ​ភិតភ័យ អ្នក​បោះ​ឆ្នោត​ភិតភ័យ​ គណបក្ស​នយោបាយ​ទាំង​អស់​ មិន​អាច​ប្រកួត​ប្រជែង​ស្មើភាពគ្នា​ក្នុង​វិស័យ​នយោបាយ​ទេ​ អា​ហ្នឹង​ហើយ​ដែល​គេ​វាស់​វែង​ទាំង​អស់​ហ្នឹង​ហើយ។​ អីចឹង​ហើយ​ បាន​គេ​កំណត់​ថា​ លទ្ធិប្រជាធិបតេយ្យ​ហ្នឹង​ មាន​ប៉ុណ្ណា​ ដោយសារ​ការ​វាស់​វែង​ហ្នឹង​ឯង»។ ​

យ៉ាងណាក៏ដោយ​ ​លោក​នាយក​រដ្ឋ​មន្ត្រី​ ហ៊ុន សែន ដែល​ស្ថិត​ក្នុង​អំណាច​ជាង​បី​ទសវត្សរ៍​ ​បាន​បញ្ជាក់​សា​ជាថ្មី​ ប្រាប់​ក្រុម​អ្នក​គាំទ្រ​គណបក្ស​ប្រជាជន​កម្ពុជា ក្នុង​ថ្ងៃ​ប្រារព្ធ​ខួប​ទី​៦៥​ឆ្នាំ​នៃ​ការ​បង្កើត​គណបក្ស​ប្រជាជន​កម្ពុជា​កាលពី​ថ្ងៃ​ទី​២៨​មិថុនា​ ថា កម្ពុជា​មិន​មាន​វិបត្តិ​នយោបាយ​នោះ​ទេ​ គឺ​មាន​តែ​វិបត្តិ​បុគ្គល​របស់​អ្នក​នយោបាយ​មួយ​ចំនួន។

លោក​នាយករដ្ឋមន្ត្រី​ខ្មែរ​រូប​នេះ ក៏​បាន​ផ្ដាំ​ផ្ញើ​ក្រុម​អង្គការ​សង្គម​ស៊ីវិល​ កុំ​ឲ្យ​យក​ខ្លួន​ទៅ​ភ្ជាប់​ជាមួយ​នឹង​វិបត្តិ​បុគ្គល​ទាំង​នោះ។​

លោក​បាន​ថ្លែងបន្ត​នា​ឱកាស​ប្រារព្ធ​ខួប​បង្កើត​បក្ស​នោះថា​ ប្រទេស​កម្ពុជា​គឺ​ជា​ប្រទេស​ឈរ​លើ​គោល​ការណ៍​ប្រជាធិបតេយ្យ​ និង​នីតិរដ្ឋ។

លោក​ក៏​បាន​អះ​អាង​ផង​ដែរ​ថា ​ការ​ខិតខំ​ប្រកូក​ប្រកាស​របស់​មនុស្ស​ខ្លះ​ដែល​ថា​ កម្ពុជា​កំពុង​មាន​វិបត្តិ​ ឬ​កម្ដៅ​នយោបាយ​នោះ​ គឺ​ធ្វើ​ឡើង​ក្នុង​ឧបាយកល​ទុច្ចរិត​ និង​ប៉ុនប៉ង​បំភាន់​សាធារណមតិ​ប៉ុណ្ណោះ៕

XS
SM
MD
LG