មន្រ្តីជាន់ខ្ពស់នៃក្រសួងកសិកម្មឲ្យដឹងថាក្រសួងរង់ចាំការវាស់វែងឯកភាពគ្នាបន្តទៀតលើទំហំដីជម្លោះរវាងក្រុមហ៊ុនវៀតណាមហ័ងអាញ់ យ៉ាឡាយ(HAGL)និងជនជាតិដើមភាគតិច មុននឹងកាត់ទៅឲ្យសហគមន៍ជនជាតិដើមភាគតិចក្នុងស្រុកអណ្តូងមាស ខេត្តរតនគិរី។
កាលពីខែមីនាឆ្នាំ២០១៩ ក្រុមហ៊ុនវៀតណាមបានឯកភាពកាត់ដីជាង៦០កន្លែងដើម្បីទុកឲ្យប្រជាពលរដ្ឋ។ ក្នុងនោះមានដីព្រៃអារក្ស តំបន់ទឹកអូរធម្មជាតិ ព្រៃចម្ការវិលជុំ តំបន់ភ្នំ និងដីព្រៃកប់សពជាដើម។ ប៉ុន្តែការឯកភាពនេះត្រូវរង់ចាំការសម្រេចពីក្រសួងកសិកម្ម។
លោក ស្រី វុឌ្ឍី អ្នកនាំពាក្យក្រសួងកសិកម្ម ប្រាប់ VOA នៅថ្ងៃច័ន្ទនេះថា កន្លងមកមានកិច្ចសហការសម្របសម្រួលដោះស្រាយរវាងក្រុមហ៊ុន សហគមន៍អ្នកតវ៉ាទាមទារដី ការិយាល័យទីប្រឹក្សាដោះស្រាយវិវាទ CAOនិងអាជ្ញាធរមូលដ្ឋាន។ លោកបន្តថា លទ្ធផលនៃដំណើរការសម្របសម្រួលដោះស្រាយ ក្រុមការងារកំណត់បានទំហំផ្ទៃដីដែលត្រូវកាត់ចេញពីដីសម្បទានសេដ្ឋកិច្ចសរុបចំនួន៧៤២,២៦ហិកតា និងមានការឯកភាពពីអភិបាលខេត្តរតនគិរី។
បើតាមលោក ស្រី វុឌ្ឍី បន្ទាប់ពីទទួលបានសំណើរបស់អភិបាលខេត្តរតនគិរី ក្រសួងបានចាត់ក្រុមការងារចុះទៅពិនិត្យជាក់ស្តែងលើករណីនេះ។ លោកបន្តថា ក្រុមការងារខេត្ដដែលជាអ្នកចុះសិក្សាកំណត់ទីតាំងដីពាក់ព័ន្ធជាមួយប្រជាពលរដ្ឋចំនួន១២ភូមិ តំណាងសហគមន៍ប្រជាពលរដ្ឋ និងក្រុមការងារដោះស្រាយវិវាទ CAO។
អ្នកនាំពាក្យរូបនោះឲ្យដឹងទៀតថា ទំហំតួលេខផ្ទៃដីដែលស្នើសុំកាត់នោះនៅមិនទាន់មានឯកភាពគ្នានៅឡើយ ដោយសារខេត្តស្នើសុំកាត់ចេញពីដីសម្បទានចំនួន៧៤២,២៦ហិកតា ហើយផ្ទៃដីឯកភាពគ្នាមានចំនួន៥៧២ និងផ្ទៃដីមិនទាន់បានឯកភាពគ្នាមានប្រមាណ១៧០ហិកតា។
លោក ស្រី វុឌ្ឍី បញ្ជាក់ថា៖ «ដោយតួលេខមិនឯកភាពគ្នា អង្គប្រជុំបានសម្រេចៈស្នើសហគមន៍ ប្រជាពលរដ្ឋ ក្រុមហ៊ុន ក្រុមការងារខេត្ត ក្រុមការងារ CAOនិងអាជ្ញាធរមូលដ្ឋានពិនិត្យឡើងវិញពីទំហំផ្ទៃដីដែលត្រូវកាត់ចេញពីដីសម្បទានសេដ្ឋកិច្ចឲ្យមានឯកភាពគ្នា»។
លោកបន្តថា បន្ទាប់ពីបានឯកភាពគ្នា ក្រុមការងារក្រសួងកសិកម្ម រុក្ខាប្រមាញ់ និងនេសាទ និងអាជ្ញាធរខេត្តនឹងចុះទៅពិនិត្យជាក់ស្តែងដល់ទីតាំងដើម្បីពិនិត្យបន្ថែម។
លោកមានប្រសាសន៍ថា៖ «យូរ ឬឆាប់អាស្រ័យលើក្រុមការងារ»។
នៅថ្ងៃច័ន្ទនេះ អង្គការសមធម៌កម្ពុជាបានចេញសេចក្តីថ្លែងការណ៍មួយ ដោយជំរុញឲ្យអាជ្ញាធរដោះស្រាយបញ្ហាដីធ្លីនេះជាបន្ទាន់ និងជំរុញឲ្យក្រុមហ៊ុនទទួលខុសត្រូវតាមការសន្យា ប្រគល់ដីជូនសហគមន៍វិញ។ អង្គការសមធម៌កម្ពុជាឲ្យដឹងថា នៅពេលរង់ចាំការសម្រេចជាផ្លូវការពីក្រសួងកសិកម្ម ក្រុមហ៊ុនវៀតណាមបានឈូសឆាយភ្នំអារក្សចំនួន២កន្លែង ឈូសឆាយតំបន់ដីសើម ឈូសឆាយតំបន់បាញ់សត្វតាមបែបប្រពៃណី និងឈូសឆាយ ដីកប់សព។
បើតាមរបាយការណ៍របស់អង្គការសមធម៌កម្ពុជា ជនជាតិដើមភាគតិច១២សហគមន៍ក្នុងស្រុកអណ្ដូងមាស និងស្រុកអូរជុំ សរុបប្រមាណ១៣៧០ខ្នង បានរងគ្រោះនៅក្នុងជម្លោះដីធ្លីជាមួយក្រុមហ៊ុនវៀតណាមហ័ងអាញ់ យ៉ាឡាយ។ ដីស្រែចម្ការរបស់សហគមន៍ជនជាតិដើមភាគតិចចំនួន១ម៉ឺន៩ពាន់ហិកតាបានធ្លាក់ទៅក្នុងការគ្រប់គ្រងរបស់ក្រុមហ៊ុនវៀតណាមនេះ។ អង្គការដដែលគូសបញ្ជាក់ថា ការបាត់បង់ដីធ្លីនេះបានធ្វើឲ្យការរកអាហារ និងផលិតផលព្រៃឈើនៃជនជាតិដើមភាគតិចទាំងនេះធ្លាក់ចុះយ៉ាងច្រើន ដូចជាបាត់បង់ឈើដើម្បីពួកគេអាចរកជ័រចុង ការរកត្រី ឃ្មុំ អុស ថ្នាំបុរាណ សត្វព្រៃ ផ្លែឈើព្រៃ បន្លែព្រៃ វល្លិ៍ និងផ្ដៅជាដើម។
គួរបញ្ជាក់ថា ក្នុងឆ្នាំ២០១០ រដ្ឋាភិបាលបានផ្ដល់ដីសម្បទានសេដ្ឋកិច្ចចំនួន៥ម៉ឺនហិកតាដល់ក្រុមហ៊ុនវៀតណាមឈ្មោះ ហ័ងអាញ់ យ៉ាឡាយ ដើម្បីធ្វើការវិនិយោគលើការដាំដំណាំកៅស៊ូរយៈពេល៩៩ឆ្នាំ៕
