ក្រុមមន្រ្តីមកពីក្រសួងចំនូនបួនរួមគ្នាធ្វើសន្និសីទនៅថ្ងៃព្រហស្បតិ៍ ដើម្បីបន្ថែមការការពារអំណះអំណាងរបស់រដ្ឋាភិបាលនិងប្រទេសចិន ប្រឆាំងទៅនឹងអត្ថបទរបស់កាសែត The Wall Street Journal ស្របពេលដែលអ្នកជំនាញបរទេសព្រមានថា កម្ពុជាអាចនឹងជំរុញលទ្ធភាពឲ្យព្រឹទ្ធសភាអាមេរិកអនុម័តសេចក្តីព្រាងច្បាប់ប្រឆាំងនឹងខ្លួន។
កាសែតអាមេរិកនេះបានផ្សាយកាលពីថ្ងៃអាទិត្យកន្លងទៅថា ប្រទេសកម្ពុជាបានចុះហត្ថលេខាជាសម្ងាត់ជាមួយប្រទេសចិន ដើម្បីអនុញ្ញាតឲ្យប្រទេសចិនតាំងមូលដ្ឋានកងទ័ពជើងទឹករបស់ខ្លួននៅទីតាំងសមុទ្ររាម ក្នុងខេត្តព្រះសីហនុ។ ការដាក់តាំងមូលដ្ឋានកងទ័ពចិននេះដែលជាផ្នែកមួយដែលទីក្រុងប៉េកាំងមានផែនការពង្រីកមូលដ្ឋានយោធារបស់ខ្លួនក្នុងពិភពលោក។
ក្រុមអ្នកនាំពាក្យរបស់រដ្ឋាភិបាលមកពីទីស្តីការគណៈរដ្ឋមន្ត្រី មកពីក្រសួងការពារជាតិ ក្រសួងការបរទេស និងក្រសួងព័ត៌មាន បានហៅសេចក្តីរាយការណ៍ព័ត៌មាននោះថាជាសេចក្តីរាយការណ៍«ព័ត៌មានមិនពិត គ្មានមូលដ្ឋានត្រឹមត្រូវ និងមានចេតនាបង្កវិទ្ធង្សនា»ប្រឆាំងនឹងប្រទេសកម្ពុជា។ ទោះជាយ៉ាងណាក្រុមមន្ត្រីអ្នកនាំពាក្យទាំងនេះអះអាងថា រដ្ឋាភិបាលមិនមានគម្រោងប្តឹងប្រឆាំងនឹងនឹងកាសែត The Wall Street Journal ទេ។
លោក ឈុំ សុជាតិ អ្នកនាំពាក្យក្រសួងការពារជាតិចាត់ទុកថា ព័ត៌មានក្នុងកាសែត The Wall Street Journal ជាព័ត៌មានប្រឌិត។
«ព័ត៌មានទាំងអស់នេះមិនមែនជាព័ត៌មានពិត ជាព័ត៌មានដែលប្រឌិតឡើងដោយមានចេតនាអាក្រក់ញុះញង់បំបែកបំបាក់ គ្មានវិជ្ជាជីវៈសារព័ត៌មាន ធ្វើឲ្យបាត់កិត្យានុភាព ឯករាជ្យភាព និងបូរណភាពទឹកដីរបស់ប្រទេសកម្ពុជា»។
ដោយឡែកលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តីបន្ថែមថា សេចក្តីរាយការណ៍របស់កាសែតអាមេរិកនោះជា«ព័ត៌មានភូតកុហក»។
សេចក្តីរាយការណ៍ដ៏ចម្រូងចម្រាសទាក់ទងទៅនឹងការចុះកិច្ចព្រមព្រៀងសម្ងាត់ដើម្បីអនុញ្ញាតឲ្យកងយោធាជើងទឹកចិន មានសិទ្ធិផ្តាច់មុខក្នុងការប្រើប្រាស់ដែនសមុទ្ររាមជាមូលដ្ឋានឈរជើង បានបង្កឲ្យមានការច្រានចោលពីរដ្ឋាភិបាលចិននិងរដ្ឋាភិបាលកម្ពុជាជាបន្តបន្ទាប់។
កាលពីថ្ងៃពុធ អ្នកនាំពាក្យក្រសួងការពារជាតិចិនបានហៅសេចក្តីរាយការណ៍ព័ត៌មាននោះថាគ្រាន់តែជា «ពាក្យចចាមអារ៉ាម»។ ប៉ុន្តែលោកមិនបានធ្វើការចោទប្រកាន់ពីចេតនាណាមួយនៃការផ្សាយនោះទេ។
នៅមុននោះបន្តិច នាយករដ្ឋមន្ត្រីខ្មែរ លោក ហ៊ុន សែន ក៏បានទាត់ចោលព័ត៌មានពីការចុះកិច្ចព្រមព្រៀងសម្ងាត់ស្តីពីការដាក់តាំងមូលដ្ឋានកងទ័ពជើងទឹកចិនក្នុងដែនសមុទ្រកម្ពុជានេះដែរ។ លោក ហ៊ុន សែន បានហៅសេចក្តីរាយការណ៍នោះថា «នេះជាព័ត៌មានប្រឌិតដ៏អាក្រក់បំផុតប្រឆាំងជាមួយកម្ពុជា»។
លោក Steve Severinghaus ប្រធានផ្នែកទំនាក់ទំនងជាន់ខ្ពស់របស់កាសែត The Wall Street Journal ប្រាប់ VOA តាមរយៈសារអេឡិចត្រូនិចឬអ៊ីមែលនៅព្រឹកថ្ងៃព្រហស្បតិ៍នេះតាមន័យដើមថា៖«ពួកយើងប្រកាន់ជំហររឹងមាំលើការរាយការណ៍ព័ត៌មានរបស់យើង»។
លោក BradleyJensen Murg អ្នកជំនាញសេដ្ឋកិច្ចនយោបាយនៅសាកលវិទ្យាល័យ Seattle Pacific សហរដ្ឋអាមេរិកប្រាប់ VOA ថា លោកមិនទាន់មានឯកសារនៃកិច្ចព្រមព្រៀងសម្ងាត់ដែលផ្សាយដោយកាសែតThe Wall Street Journal នៅឡើយទេ។ ប៉ុន្តែលោកយល់ថា របាយការណ៍នេះនឹងមិនធ្វើឲ្យទំនាក់ទំនងរបស់សហរដ្ឋអាមេរិកជាមួយកម្ពុជានិងជាមួយចិនមានភាពល្អប្រសើរនោះទេ។
លោកបញ្ជាក់ជាភាសាអង់គ្លេសនិងត្រូវបានប្រែសម្រួលជាភាសាខ្មែរថា៖
«បើតាមទស្សនៈរបស់ខ្ញុំ សហរដ្ឋអាមេរិកពិតជាកំពុងស្វះស្វែងធ្វើឱ្យប្រសើរឡើងនូវទំនាក់ទំនងជាមួយប្រទេសកម្ពុជា ហើយការប៉ុនប៉ងណាមួយដែលមិនមានភស្តុតាងនឹងធ្វើឲ្យមានលទ្ធផលផ្ទុយទៅនឹងទំនាក់ទំនងធម្មតារវាងរដ្ឋាភិបាលសហរដ្ឋអាមេរិកនិងប្រទេសកម្ពុជាក្នុងរយៈពេលប៉ុន្មានឆ្នាំចុងក្រោយនេះ»។
សាស្រ្តាជំនាញវិទ្យាសាស្រ្តនយោបាយរូបនេះបន្ថែមថា ប្រសិនបើរបាយការណ៍នេះជារបាយការណ៍ពិត នោះនឹងធ្វើឲ្យមានផលប៉ះពាល់ធ្ងន់ធ្ងរដល់អនាគតនៃការអនុម័តច្បាប់ស្តីពី«លទ្ធិប្រជាធិបតេយ្យនៅកម្ពុជា»ដែលកំពុងស្ថិតក្នុងដៃព្រឹទ្ធសភាអាមេរិក។
បញ្ហានេះនឹងជួយជំរុញលទ្ធភាពឲ្យគណៈកម្មាធិការទំនាក់ទំនងការបរទេសរបស់ព្រឹទ្ធសភាអាមេរិកអនុម័តសេចក្តីព្រាងច្បាប់នោះ ក៏ដូចជាលទ្ធភាពជំរុញឲ្យសេចក្តីព្រាងច្បាប់នេះអនុម័តដោយព្រឹទ្ធសភាទាំងមូល៕
