កម្មកររាប់លាននាក់នៅក្នុងប្រទេសឥណ្ឌាបានធ្វើកូដកម្មរយៈពេលមួយថ្ងៃ នៅទូទាំងប្រទេស កាលពីសប្តាហ៍កន្លងទៅនេះ ដើម្បីប្រឆាំងផែនការរដ្ឋាភិបាលដើម្បីធ្វើការកែទម្រង់ច្បាប់ការងារ ដែលអ្នកតវ៉ានិយាយថានឹងធ្វើឲ្យមានហានិភ័យការងារ និងធ្វើឲ្យមនុស្សសាមញ្ញទូទៅទទួលរងទុក្ខ។ ការតវ៉ានេះបញ្ជាក់ឲ្យឃើញពីឧបសគ្គដែលរដ្ឋាភិបាលកំពុងជួបប្រទះ ទាក់ទងនឹងការអនុវត្តកំណែទម្រង់សេដ្ឋកិច្ច។
កាលពីសប្តាហ៍កន្លងទៅនេះ កម្មករប្រហែល១៥០លាននាក់បានផ្អាកការងារតាមរោងចក្រឧស្សាហកម្ម កន្លែងបូមរ៉ែ និងធ្យូង និងធនាគាររដ្ឋមួយចំនួន ដោយទាមទារឲ្យរដ្ឋាភិបាលដកផែនការអនុវត្តច្បាប់ការងារតឹងរ៉ឹងជាងមុន និងលុបចោលកម្មវិធីលក់ភាគហ៊ុនឧស្សាហកម្មមួយចំនួនដែលជារបស់រដ្ឋ។
ដោយមានអ្នកបើកបររថយន្តតាក់ស៊ី និងឆៃកែវចូលរួមក្នុងបាតុកម្មនោះ ការដឹកជញ្ជូនក៏ត្រូវផ្អាកនៅតាមទីក្រុងធំៗដូចជាញូវដេលី (New Delhi) និង Mumbai។ សាលា និងមហាវិទ្យាល័យនៅតាមទីក្រុងមួយចំនួនក៏ត្រូវបិទដែរ។
ការប៉ះទង្គិចខ្លះៗរវាងប៉ូលិស និងសកម្មជនបានកើតឡើងនៅភាគខាងកើតនៃទីក្រុង Kolkata។
ការតវ៉ានេះដឹកនាំដោយសហជីពពាណិជ្ជកម្មធំៗចំនួន១០ ដែលនិយាយថាគម្រោងរបស់រដ្ឋាភិបាលក្នុងការកែប្រែច្បាប់ការងារ នឹងប៉ះពាល់ដល់សុខុមាលភាពកម្មកររាប់លាននាក់នៅក្នុងប្រទេស និងសុវត្ថិភាពការងារថយចុះ។
Sanjeeva Reddy ប្រធានសភាសហជីពពាណិជ្ជកម្មរបស់ឥណ្ឌា បានប្រាប់ VOA ថាពួកគេកំពុងតវ៉ានឹងអ្វីដែលលោកហៅថាគោលនយោបាយគាំទ្រពាណិជ្ជកម្មរបស់រដ្ឋាភិបាល។
Sanjeeva Reddy បានបន្តថា៖ «គ្មានការពិគ្រោះយោបល់ ឬពិភាក្សាអ្វីសោះ ពួកគេចង់តាក់តែងច្បាប់ថ្មីប្រឆាំងនឹងពលករ និងប្រឆាំងនឹងសហភាពពាណិជ្ជកម្ម ដែលជាការគាំទ្រពួកនិយោជក និងពួកមូលធនតែម្ខាង»។
លោក Narendra Modi នាយករដ្ឋមន្រ្តីឥណ្ឌាបានបើកយុទ្ធនាការដ៏ធំមួយ ដើម្បីកែទម្រង់ច្បាប់អាជីវកម្ម ឲ្យទាក់ទាញវិនិយោគបរទេស និងប្រែក្លាយប្រទេសឥណ្ឌាឲ្យទៅជាមណ្ឌលផលិតកម្មមួយ។
សេចក្តីព្រាងច្បាប់ចំនួនពីរទាក់ទងនឹងវិស័យការងារត្រូវបានតាក់តែងឡើង ប៉ុន្តែមិនទាន់បានដាក់ជូនរដ្ឋសភាពិនិត្យនៅឡើយទេ។
ការពិភាក្សាជាមួយសហជីពពាណិជ្ជកម្មបានពន្យារពេលលើបញ្ហាដូចជា ការលុបចោល ការបិទរោងចក្រ ការបង្កើតសហជីព និងការតម្លើងប្រាក់ខែជាអប្បបរមា២៥០ដុល្លារក្នុងមួយខែ។ មាត្រាដែលមានវិវាទបំផុតគឺពាក់ព័ន្ធទៅនឹងការអនុញ្ញាតឲ្យក្រុមហ៊ុនដែលមានកម្មករតិចជាង៣០០នាក់អាចបញ្ឈប់កម្មករទាំងនោះបានដោយមិនចាំបាច់មានការអនុម័តយល់ព្រមពីរដ្ឋាភិបាល។ ចំនួនកម្រិតបច្ចុប្បន្នគឺ១០០នាក់។
ការប្រឆាំងតវ៉ានេះ បង្ហាញថាការនាំយកសហជីពពាណិជ្ជកម្ម និងបក្សប្រឆាំងឲ្យចូលរួមផ្លាស់ប្តូរច្បាប់ការងារនឹងមានការលំបាកខ្លាំងណាស់។
ក្រុមអ្នកប្រឆាំងបានពន្យារពេលកំណែទម្រង់ពន្ធសំខាន់ៗ និងកំណែទម្រង់ដីធ្លីនៅសភាជាន់ខ្ពស់រួចទៅហើយ។ នៅសភាជាន់ខ្ពស់ រដ្ឋាភិបាលមិនសូវមានសំឡេងច្រើននោះទេ។
លោក Satish Misra ដែលមប្រើការឲ្យមូលនិធិស្រាវជ្រាវអ្នកសង្កេតការណ៍និយាយថា រដ្ឋាភិបាលប្រឈមនឹងភារកិច្ចដ៏លំបាកមួយ។
លោក Satish Misra លើកឡើងថា «បញ្ហាគឺច្បាប់កំណែទម្រង់ការងារត្រូវការការយល់ព្រមច្រើនជាងនេះទៀត ហើយរដ្ឋាភិបាលមិនមានលទ្ធភាពអ្នកដែលនិន្នាការផ្សេងឲ្យចូលរួមជាមួយពួកគេនោះទេ»។
ធនាគារពិភពលោកនិយាយថា ឥណ្ឌាជាប្រទេសមួយដែលមានទីផ្សារការងារដ៏តឹងតែងបំផុតមួយ។ បញ្ហានេះបានធ្វើឲ្យការផលិតដែលមានចំណែក១៦ភាគរយនៃផលិតផលក្នុងស្រុកទាំងអស់របស់ប្រទេសនេះធ្លាក់ចុះ៕
ប្រែសម្រួលដោយ សើ សាយ្យាណា
