ប្រជាពលរដ្ឋកម្ពុជាប្រមាណ ៨លាន ២សែននាក់ បាននាំគ្នាចេញទៅបោះឆ្នោតកាលពីព្រឹកថ្ងៃអាទិត្យនេះ នៅក្នុងការបោះឆ្នោតជាតិអាណត្តិទី ៧ ដែលធ្វើឡើងដោយគ្មានវត្តមានគណបក្សភ្លើងទៀន ដែលជាគណបក្សប្រឆាំងដ៏ចម្បងមួយ។ នេះបើតាមទិន្នន័យបឋមរបស់គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប។
ចំនួនអ្នកចេញទៅបោះឆ្នោតនេះស្មើនឹង ៨៤% នៃចំនួនពលរដ្ឋដែលមានឈ្មោះក្នុងបញ្ជីបោះឆ្នោតប្រមាណ ៩លាន ៧សែននាក់។
បើតាមគ.ជ.ប កាលពីការបោះឆ្នោតក្រុមប្រឹក្សាឃុំសង្កាត់កាលពីឆ្នាំ ២០២២ ដែលមានវត្តមានគណបក្សភ្លើងទៀន ប្រជាពលរដ្ឋប្រមាណ ៧លាន ៤សែននាក់ បានចេញទៅបោះឆ្នោត ស្មើនឹង ៨០% នៃចំនួនអ្នកបោះឆ្នោតសរុបប្រមាណ ៩លាន ២សែននាក់។
មិនទាន់មានទិន្នន័យផ្លូវការថា តើសន្លឹកឆ្នោតមិនបានការសរុបមានចំនួនប៉ុន្មាននៅឡើយទេ៕
