លោក Mikhail Gorbachev ដែលជាមេដឹកនាំចុងក្រោយបង្អស់របស់សហភាពសូវៀត បានទទួលមរណភាពក្នុងអាយុ ៩១ ឆ្នាំ។ លោកគឺជាអ្នកដែលបានព្យាយាមមិនបានសម្រេចដើម្បីស្រោចស្រង់មហាអំណាចសហភាពសូវៀតពីការដួលរលំ ប៉ុន្តែកិច្ចប្រឹងប្រែងរបស់លោកបាននាំឱ្យមានកំណែទម្រង់ដ៏អស្ចារ្យនានាដែលនៅទីបំផុតបាននាំឱ្យមានការបញ្ចប់សង្គ្រាមត្រជាក់។
មន្ទីរពេទ្យ Central Clinical Hospital នៅជាយរដ្ឋធានីមូស្គូនៃប្រទេសរុស្ស៊ីបានប្រាប់ទីភ្នាក់ងារព័ត៌មានរដ្ឋរបស់រុស្ស៊ីថា លោក Gorbachev បានទទួលមរណភាពកាលពីយប់ថ្ងៃអង្គារ «ក្រោយពីមានជំងឺធ្ងន់ធ្ងររ៉ាំរ៉ៃយ៉ាងយូរ»។
ប្រធានាធិបតីរុស្ស៊ីលោក Vladimir Putin បាននិយាយនៅក្នុងសាររំលែកទុក្ខតាម Telegram នៅថ្ងៃពុធនេះថា លោក Gorbachev «បានយល់យ៉ាងជ្រាលជ្រៅ» អំពីភាពចាំបាច់នៅក្នុងការកែទម្រង់ប្រព័ន្ធសហភាពសូវៀត និងថាលោក «ប្រឹងប្រែងផ្ដល់ដំណោះស្រាយផ្ទាល់ខ្លួនរបស់លោកសម្រាប់បញ្ហាបន្ទាន់នានា»។
លោក Putin ថ្លែងដូច្នេះថា៖ «លោក Gorbachev គឺជាអ្នកនយោបាយនិងជារដ្ឋបុរស ដែលមានឥទ្ធិពលយ៉ាងធំលើប្រវត្តិសាស្ត្រពិភពលោក។ លោកបានដឹកនាំប្រទេសរបស់យើងក្នុងអំឡុងពេលដែលមានការផ្លាស់ប្ដូរដ៏ស្មុគស្មាញនិងខ្លាំងក្លា និងការប្រឈមទ្រង់ទ្រាយធំផ្នែកគោលនយោបាយការបរទេស សេដ្ឋកិច្ច និងសង្គម»។
ប្រធានាធិបតីសហរដ្ឋអាមេរិកលោក Joe Biden បានបញ្ជាក់នៅក្នុងសេចក្ដីថ្លែងការណ៍មួយកាលពីយប់ថ្ងៃអង្គារថា លោក Gorbachev «គឺជាបុរសម្នាក់ដែលមានចក្ខុវិស័យដ៏អស្ចារ្យ»។
លោក Biden បាននិយាយដូច្នេះថា៖ «ក្នុងនាមជាមេដឹកនាំសហភាពសូវៀត លោក [Gorbachev] បានធ្វើការជាមួយនឹងប្រធានាធិបតីសហរដ្ឋអាមេរិកលោក [Ronald] Reagan ដើម្បីកាត់បន្ថយចំនួនអាវុធនុយក្លេអ៊ែររបស់ប្រទេសយើងទាំងពីរ ដើម្បីធ្វើឱ្យប្រជាពលរដ្ឋនៅទូទាំងពិភពលោកដែលបន់ស្រន់ឱ្យមានការបញ្ចប់ការប្រជែងសព្វាវុធនុយក្លេអ៊ែរមានអារម្មណ៍ធូរស្រាល»។
លោក Gorbachev កើតនៅថ្ងៃទី ២ ខែមីនា ឆ្នាំ ១៩៣១ ក្នុងគ្រួសារក្រីក្រមួយនៅក្នុងភូមិ Privolnoye ក្នុងតំបន់ Stavropol ភាគខាងត្បូងប្រទេសរុស្ស៊ី។ លោកបានក្លាយជាបុគ្គលដ៏មានឥទ្ធិពលបំផុតមួយរូបនៅសតវត្សរ៍ទី ២០ ដោយលោកទទួលបានកិត្តិយសនៅលើពិភពលោកសម្រាប់តួនាទីរបស់លោកនៅក្នុងការកាត់បន្ថយការគំរាមកំហែងនៃការបំផ្លិចបំផ្លាញដោយសារអាវុធនុយក្លេអ៊ែរ និងនៅក្នុងការសង្គ្រោះមនុស្សរាប់លាននាក់ពីការជិះជាន់របស់សហភាពសូវៀតនៅក្នុងប្រទេសរបស់លោកនិងនៅប្រទេសផ្សេងៗទៀត។
លោក Gorbachev បានទទួលពានរង្វាន់ណូបែលសន្តិភាពកាលពីឆ្នាំ ១៩៩០ សម្រាប់តួនាទីរបស់លោកនៅក្នុងការបញ្ចប់សង្គ្រាមត្រជាក់ ប៉ុន្តែនៅក្នុងប្រទេសរុស្ស៊ីវិញ លោកត្រូវបានប្រជាពលរដ្ឋស្អប់ខ្ពើម៕
លោក Jeremey Bransten នៃវិទ្យុអឺរ៉ុបសេរី/វិទ្យុសេរីភាព រួមចំណែកនៅក្នុងសេចក្ដីរាយការណ៍នេះ។ ផ្នែកខ្លះនៃសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន AFP និងទីភ្នាក់ងារព័ត៌មាន Reuters។
