ប៉ូលិសអ៊ីស្រាអែលបានបាញ់ឧស្ម័នបង្ហូរទឹកភ្នែកទៅលើក្រុមបាតុករប៉ាឡេស្ទីន នៅក្នុងទីក្រុង Bethlehem ខណៈដែលក្រុមប៉ាឡេស្ទីនអំពាវនាវឲ្យមានទិវាបញ្ចេញកំហឹង។ ប៉ូលិសអ៊ីស្រាអែលបានដាក់ពង្រាយកងរក្សាសន្តិសុខបន្ថែមនៅក្នុងទីក្រុងហ្ស៊េរុយសាឡិម បន្ទាប់ពីលោកប្រធានាធិបតី ត្រាំ បានប្រកាសថាទីក្រុងនេះជារដ្ឋធានីនៃប្រទេសអ៊ីស្រាអែល ហើយថាស.រ.អាគ្រោងផ្លាស់ប្តូរស្ថានទូតរបស់ខ្លួនទៅទីនោះ។
ការធ្វើបាតុកម្មកំពុងធ្វើឡើងនៅថ្ងៃសុក្រនេះ នៅក្នុងប្រទេសផ្សេងៗនៅមជ្ឈិមបូពា និងប្រទេសផ្សេងៗទៀតដែលមានជនអ្នកកាន់សាសនាឥស្លាមភាគច្រើន។
មនុស្សរាប់ពាន់នាក់បាននាំគ្នាធ្វើបាតុកម្មនៅមុខស្ថានទូតស.រ.អាក្នុងទីក្រុងគូឡាឡាំពួ ប្រទេសម៉ាឡេស៊ី នៅថ្ងៃសុក្រនេះ។ នៅក្នុងប្រទេសឥណ្ឌូណេស៊ី ដែលជាប្រទេសមានពលរដ្ឋកាន់សាសនាឥស្លាមច្រើនជាងគេបង្អស់នោះ បាតុកររាប់រយនាក់ដែលបានប្រមូលផ្តុំគ្នានៅមុខស្ថានទូតអាមេរិក ក្នុងរដ្ឋធានីហ្សាការតា។ បាតុករខ្លះបានកាន់បដាដែលនិយាយថា « ត្រាំ ឆ្កួត» «ស្លាប់ទៅ ត្រាំ» និង «ស្លាប់ទៅអាមេរិក»។
ស្របពេលជាមួយគ្នានេះ ក្រុម Hamas និយមជ្រុល បានអំពាវនាវឲ្យមានការបះបោរប្រឆាំងនិងអ៊ីស្រាអែល៕
