កាលពីថ្ងៃទី ៣ ខែមិថុនា ប្រធានាធិបតីជាប់ឆ្នោតថ្មីរបស់ប្រទេសម៉ិកស៊ិកអ្នកស្រី Claudia Sheinbaum បានបង្ហាញក្ដីសង្ឃឹមដល់ប្រជាជនម៉ិកស៊ិកជាងមួយភាគបីដែលមិនបានបោះឆ្នោតឱ្យអ្នកស្រី ដោយអ្នកស្រីសន្យាផ្សះផ្សាប្រទេស។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
អ្នកស្រី Sheinbaum ដែលជាស្ត្រីដំបូងដែលឈ្នះតំណែងជាប្រធានាធិបតីនេះ នឹងប្រឈមនឹងផ្លូវដ៏លំបាកឆ្ពោះទៅរកការផ្សះផ្សាប្រទេសមួយដែលបានបែកបាក់យ៉ាងខ្លាំងដែលបន្សល់ទុកដោយលោកប្រធានាធិបតីជិតផុតអាណត្តិ Andrés Manuel López Obrador។
អ្នកស្រី Sheinbaum បានសន្យាថានឹងបន្តទិសដៅនយោបាយដែលកំណត់ដោយលោក López Obrador បើទោះបីជាប្រជាជនជាទូទៅមិនពេញចិត្តដោយសារតែអំពើហិង្សាជាបន្តរបស់ក្រុមជួញដូរគ្រឿងញៀននិងបញ្ហាសេដ្ឋកិច្ចក៏ដោយ។
អ្នកស្រី Sheinbaum បានបញ្ជាក់នៅក្នុងការថ្លែងសុន្ទរកថាពេលទទួលជ័យជម្នះរបស់អ្នកស្រីថា៖ «ទោះបីជាប្រជាជនភាគច្រើនគាំទ្រគម្រោងរបស់យើងក៏ដោយ កាតព្វកិច្ចរបស់យើងគឺថាយើងនឹងនៅតែគិតគូរដល់ជនជាតិម៉ិកស៊ិកគ្រប់រូបដោយស្មើភាពគ្នា»។
ក៏ប៉ុន្តែ វាមានរយៈពេល ៤ ខែទៀតទម្រាំតែអ្នកស្រី Sheinbaum អាចឡើងកាន់តំណែងបាន ហើយកាលពីថ្ងៃទី ៣ ខែមិថុនា លោក López Obrador ហាក់ដូចជាបានប្តេជ្ញាជំរុញទៅមុខឱ្យមានការផ្លាស់ប្ដូររដ្ឋធម្មនុញ្ញតាមការចង់បានរបស់លោក មុនពេលលោកចាកចេញពីតំណែងជាប្រធានាធិបតីនៅថ្ងៃទី ៣០ ខែកញ្ញាខាងមុខ។
វិធានការរបស់លោក López Obrador នេះបាននាំឱ្យមានការបែកបាក់យ៉ាងខ្លាំងរួចមកហើយ ដោយអ្នកប្រឆាំងភាគច្រើនបារម្ភថាវិធានការនេះនឹងធ្វើឱ្យលទ្ធិប្រជាធិបតេយ្យរបស់ប្រទេសម៉ិកស៊ិកចុះខ្សោយយ៉ាងខ្លាំង។
គណបក្ស Morena របស់លោក López Obrador ដែលលោកបានបង្កើតឡើង ហើយដែលលោកនៅតែមានប្រជាប្រិយភាពជាងអ្នកស្រី Sheinbaum ហាក់ដូចជាកំពុងស្ថិតនៅលើផ្លូវដែលឈានទៅដល់ការឈ្នះបានសំឡេងពីរភាគបីដែលជាសំឡេងភាគច្រើនដែលជាចំនួនត្រូវការដើម្បីអាចកែប្រែរដ្ឋធម្មនុញ្ញបាន។
លោក López Obrador បានដាក់ចេញរួចហើយនូវសំណើកែប្រែរដ្ឋធម្មនុញ្ញចំនួន ២០ ចំណុចដែលលោកគ្រោងនឹងដាក់ជូនសភា ដែលក្នុងនោះរួមមានទាំងការលុបចោលនូវទីភ្នាក់ងារត្រួតពិនិត្យឯករាជ្យនិងនិយតកម្មផងដែរ។
វិធានការកែប្រែរដ្ឋធម្មនុញ្ញនេះគឺជាអ្វីដែលធ្វើឱ្យមនុស្សមួយចំនួននៅក្នុងប្រទេសម៉ិកស៊ិកព្រួយបារម្ភ។
លោក Alfredo Coutiño ប្រធានក្រុមហ៊ុនប្រឹក្សាយោបល់ Moody's Analytics បានសរសេរនៅក្នុងរបាយការណ៍មួយកាលពីថ្ងៃទី ៣ ខែមិថុនាថា៖ «បរិយាកាសនៃការបែកបាក់នយោបាយគឺកាន់តែអាក្រក់ជាងមុនក្នុងអំឡុងពេលនៃការគ្រប់គ្រងរបស់ប្រធានាធិបតីបច្ចុប្បន្ន។ ប្រទេសនេះមានការបែកបាក់គ្នាយ៉ាងខ្លាំង ហើយត្រូវការឱ្យមានការដឹកនាំនយោបាយរបស់ប្រធានាធិបតីថ្មីដើម្បីស្ដារឯកភាពជាតិ»។
នៅពេលនេះ លោក López Obrador បានចូលរួមអបអរសាទរជ័យជម្នះរបស់អ្នកស្រី Sheinbaum ជាងការសងសឹក ទោះបីជាពេញមួយអាណត្តិរយៈពេល ៦ ឆ្នាំរបស់លោក លោកបានបន្ទាបបន្ថោកអ្នកកាសែតនិងអ្នកប្រឆាំងលោកជាងក្រុមជួញដូរគ្រឿងញៀននៅក្នុងប្រទេសក៏ដោយ។
លោក López Obrador បាននិយាយថា៖ «នេះពិតជាប្រវត្តិសាស្ត្រមួយ។ យើងកំពុងរស់នៅក្នុងពេលវេលាដ៏វិសេសវិសាល អស្ចារ្យ និងរុងរឿង»។
លោកក៏បានសន្យាជាថ្មីម្តងទៀតក្នុងការអនុញ្ញាតឱ្យអ្នកស្រី Sheinbaum គ្រប់គ្រងប្រទេស ដោយលោកនឹងមិនព្យាយាមគ្រប់គ្រងពីក្រោយឆាកបន្ទាប់ពីលោកចាកចេញពីតំណែងនោះទេ។
លោកបានថ្លែងដូច្នេះថា៖ «ខ្ញុំសូមនិយាយឱ្យឮៗនិងច្បាស់ៗថា បន្ទាប់ពីខ្ញុំចប់អាណត្តិ ខ្ញុំនឹងចូលនិវត្តន៍ហើយខ្ញុំនឹងមិនចូលរួមក្នុងសកម្មភាពសាធារណៈឬនយោបាយទៀតទេ»។
អ្នកស្រី Sheinbaum ដែលជាអ្នកវិទ្យាសាស្ត្រអាកាសធាតុនិងជាអតីតអភិបាលក្រុងម៉ិកស៊ីកូ បានប្តេជ្ញាបន្តគោលនយោបាយរបស់លោក López Obrador ហើយនៅក្នុងសុន្ទរកថាទទួលជ័យជម្នះរបស់អ្នកស្រីនៅថ្ងៃទី ៣ ខែមិថុនា អ្នកស្រីបានផ្តល់សញ្ញាតិចតួចប៉ុណ្ណោះអំពីរបៀបដែលអ្នកស្រីនឹងគ្រប់គ្រងប្រទេសក្នុងនាមជាប្រធានាធិបតី។
អ្នកស្រី Sara Ríos អាយុ ៧៦ ឆ្នាំ ដែលជាសាស្រ្តាចារ្យចូលនិវត្តន៍ផ្នែកអក្សរសាស្ត្រនៅសាកលវិទ្យាល័យជាតិស្វយ័តម៉ិកស៊ិក (National Autonomous University of Mexico) បានបង្ហាញទំនុកចិត្តលើអ្នកស្រី Sheinbaum ថា អ្នកស្រីនឹងផ្សះផ្សាប្រទេស។
អ្នកស្រី Ríos បាននិយាយថា៖ «មធ្យោបាយតែមួយគត់ដែលនាំយើងឆ្ពោះទៅមុខគឺតាមរយៈការធ្វើការជាមួយគ្នា។ អ្នកស្រី Sheinbaum នឹងធ្វើការដើម្បីនាំមកនូវសន្តិភាពសម្រាប់ប្រទេស ហើយនឹងគ្រប់គ្រងឱ្យមានការរីកចម្រើន ប៉ុន្តែវាជាដំណើរដែលនឹងប្រព្រឹត្តទៅយឺតៗ»។
ការបោះឆ្នោតនេះត្រូវបានគេមើលឃើញយ៉ាងទូលំទូលាយថាជាការបោះឆ្នោតប្រជាមតិលើលោក López Obrador ដែលជាអ្នកបានបង្កើតគម្រោងនានាសម្រាប់សង្គម ប៉ុន្តែបានបរាជ័យភាគច្រើនក្នុងការកាត់បន្ថយអំពើហិង្សារបស់ក្រុមជួញដូរគ្រឿងញៀននៅក្នុងប្រទេស។
អ្នកស្រី Sheinbaum ដែលមានអាយុ ៦១ ឆ្នាំទំនងជានឹងមិនទទួលបានភក្តីភាពទាំងស្រុងពីប្រជាជនដូចអ្វីដែលលោក López Obrador ទទួលបាននោះទេ៕
ប្រែសម្រួលដោយអ្នកស្រី លី ម៉ូរីវ៉ាន់
វេទិកាបញ្ចេញមតិ