ភ្ជាប់​ទៅ​គេហទំព័រ​ទាក់ទង

លោកស្រី Merkel ធ្វើ​ដំណើរ​​ទៅ​ប្រទេស​តួកគី​ដើម្បី​ព្យាយាម​សង្គ្រោះ​កិច្ចព្រមព្រៀង​ជនអន្តោប្រវេសន៍​របស់​សហភាព​អឺរ៉ុប


លោកស្រី Merkel ធ្វើ​ដំណើរ​​ទៅ​ប្រទេស​តួកគី​ដើម្បី​ព្យាយាម​សង្គ្រោះ​កិច្ចព្រមព្រៀង​ជនអន្តោប្រវេសន៍​របស់​សហភាព​អឺរ៉ុប។

លោកស្រី​អធិការបតី​អាល្លឺម៉ង់ Angela Merkel ​និង​ក្រុមមន្រ្តី​សហភាព​អឺរ៉ុប​ដទៃទៀត​នឹង​ធ្វើ​ដំណើរ​ទៅ​កាន់​ប្រទេស​តួកគី​ក្នុង​សប្តាហ៍​នេះ ​ដើម្បី​ព្យាយាម​បន្ធូរបន្ថយភាពតានតឹង​ដែល​បាន​កើនឡើង​ ចាប់​តាំង​ពី​ភាគី​ទាំង​២​បាន​ចុះ​ហត្ថលេខា​លើ​កិច្ចព្រមព្រៀង​មួយ​កាល​ពី​ខែ​មុន ដើម្បី​គ្រប់គ្រង​ចំនួន​ជនអន្តោប្រវេសន៍​ដែល​ហូរ​ចូល​ទៅ​កាន់​អឺរ៉ុប​។


នៅ​ក្រោម​កិច្ចព្រមព្រៀង​ដែល​មាន​ទឹកប្រាក់​ជិត​៧​ពាន់​លាន​ដុល្លារ ជនអន្តោប្រវេសន៍​ដែល​កំពុង​តែ​ស្ថិត​នៅ​ឆ្នេរសមុទ្រ​របស់​ប្រទេស​ក្រិក​នឹង​ត្រូវ​បញ្ជូន​ឲ្យ​ត្រឡប់​ទៅ​កាន់​ប្រទេស​តួកគី​វិញ ​ហើយជាថ្នូរ​នឹង​ការទទួល​យក​ជន​អន្តោប្រវេសន៍​នេះ ប្រជាជន​តួកគី​នឹង​ត្រូវ​បាន​អនុញ្ញាត​ឲ្យ​ធ្វើ​ដំណើរ​ទៅ​កាន់​អឺរ៉ុប​ដោយ​មិន​បាច់​មាន​ទិដ្ឋាការ។


កិច្ច​ព្រមព្រៀង​ដែល​ត្រូវ​បាន​អនុវត្ត​កាល​ពី​៣​សប្តាហ៍​មុន​នេះ ដំបូងឡើយ​មាន​គោលបំណង​ដើម្បីកាត់បន្ថយ​ចំនួន​ជន​អន្តោប្រវេសន៍​ដែល​ចូល​មក​កាន់​ប្រទេស​ក្រិក​ដោយ​ខុស​ច្បាប់។ ប៉ុន្តែ​នា​ពេល​ថ្មីៗ​នេះ ទូក​នានា​បាន​មក​ដល់​ប្រទេស​ក្រិក​ដោយ​ដឹកមនុស្ស​ប្រហែល​១៥០​នាក់​ជា​រៀងរាល់​ថ្ងៃ។ នេះ​បើ​យោង​តាម​អង្គការ​ទេសន្តរប្រវេសន៍​អន្តរជាតិ។


ទំនាក់ទំនង​ការទូត​បាន​រើបឡើង បន្ទាប់​ពី​លោក​ប្រធានាធិបតី​តួកគី Recep Tayyip Erdogan បាន​ព្រមាន​ថា ប្រទេស​របស់​លោក​នឹង​ឈប់​អនុវត្ត​ទៅ​តាម​កិច្ច​ព្រមព្រៀង​នេះ​ ​ប្រសិន​បើ​សហភាព​អឺរ៉ុប​មិន​ព្រម​ធ្វើ​តាម​ពាក្យ​សន្យា​របស់​ខ្លួន អនុញ្ញាត​ឲ្យ​ពលរដ្ឋ​តួកគី​អាច​ធ្វើ​ដំណើរ​ដោយ​មិន​ចាំបាច់​មាន​ទិដ្ឋាការ​ទៅ​អឺរ៉ុប​ទេ​នោះ។


លោកស្រី Merkel និង​មន្រ្តី​ការទូត​ដទៃទៀត​បាន​សន្យា​ថា​នឹង​លើកឡើង​អំពី​បញ្ហា​ទិដ្ឋាការ​នេះ​នៅ​ពេល​បន្ទាប់ ប៉ុន្តែ​លើកលែង​តែ​ប្រទេស​តួកគី​ធ្វើ​ទៅ​តាម​កិច្ចព្រមព្រៀង​និង​ផ្តល់​ជម្រក​មាន​សុវត្ថិភាព​ដល់​ជនភៀសខ្លួន​ជាមុន​សិន​។


អង្គការ​សិទ្ធិមនុស្ស រួម​មាន​ទាំង​អង្គការ Amnesty International ផង​នោះ បាន​ចោទប្រកាន់យោធា​របស់​ប្រទេស​តួកគី​អំពី​ការបាញ់​ប្រហារ​ដោយ​ខុសច្បាប់​ទៅ​លើ​ជនភៀសខ្លួន​ស៊ីរី​និង​ចាប់​បញ្ជូន​ជនភៀសខ្លួន​ទាំង​នោះទៅ​កាន់​ប្រទេស​ដែល​ហែកហួរ​ដោយ​សង្គ្រាម​របស់​ពួកគេ​វិញ៕

XS
SM
MD
LG