ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អង្គការ​សហប្រជាតិ៖ ការ​ថែទាំ​សុខភាព​ផ្លូវ​ចិត្ត​ជា​រឿង​ចាំ​បាច់​ដើម្បី​ឆ្លើយ​តប​នឹង​វិបត្តិ​ជំងឺ​កូវីដ​១៩


អគ្គលេខាធិការ​អង្គការ​សហប្រជាជាតិ​លោក Antonio Guterres ថ្លែង​នៅ​ក្នុង​សន្និសីទ​កាសែទ​មួយ​នៅ​ទីស្នាក់ងារ​សហភាព​អាហ្វ្រិក​កាលពី​ថ្ងៃទី៨ ខែកុម្ភៈ ឆ្នាំ២០២០។

អង្គការ​សហប្រជាជាតិ​កំពុង​អំពាវនាវ​ឲ្យ​មាន​ការ​ផ្ដល់​ជូន​នូវ​សេវា​ថែទាំ​សុខភាព​ផ្លូវ​ចិត្ត​ដល់​មនុស្ស​រាប់​លាន​នាក់​ដែល​កំពុង​មាន​វិបត្តិ​នេះ ដោយសារតែ​ការ​ភ័យ​ខ្លាច ភាព​ឯកោ វិបត្តិ​សេដ្ឋកិច្ច និង​ការ​រំលោភ​បំពាន​ផ្សេងៗ​ទៀត ដែល​បង្ក​ឡើង​ដោយ​ការ​រាត​ត្បាត​នៃ​ជំងឺ​កូវីដ១៩។

សេចក្ដី​សង្ខេប​ស្ដី​ពី​គោល​នយោបាយ​មួយ​របស់​អង្គការ​សហប្រជាជាតិ ដែល​មាន​ចំណងជើង​ថា៖ «កូវីដ១៩ និង​តម្រូវការ​ចាំ​បាច់​ក្នុង​ការ​ចាត់​វិធានការ​ការពារ​សុខភាពផ្លូវ​ចិត្ត» ដែល​ចេញផ្សាយ​ដោយ​អគ្គលេខាធិការ​អង្គការ​សហប្រជាជាតិ​លោក Antonio Guterres បាន​បង្ហាញ​ពី​បញ្ហា​ដែល​កើត​មាន​ឡើង ដោយសារ​វិបត្តិ​នេះ និង​ផ្ដល់​ជូន​នូវ​អនុសាសន៍​មួយ​ចំនួន។

ការ​ស្ទង់​មតិ​ថ្នាក់​ជាតិ​មួយ​ចំនួន​ដែល​បាន​ធ្វើ​ឡើង​នៅ​ក្នុង​ឆ្នាំ​នេះ បង្ហាញ​ពី​ការ​កើន​ឡើង​នូវ​ភាព​តាន​តឹង​ក្នុង​ចំណោម​ប្រជាពលរដ្ឋ ដែល​ក្នុង​នោះ មាន​រហូត​ដល់ ៣៥% ក្នុង​ប្រទេស​ចិន ៦០% នៅ​ក្នុង​ប្រទេស​អ៊ីរ៉ង់ និង ៤៥% នៅ​សហរដ្ឋ​អាមេរិក។ ការ​ស្រាវជ្រាវ​ស្រដៀង​គ្នា​នេះ​ដែរ​ក្នុង​ចំណោម​បុគ្គលិក​ផ្នែក​សុខាភិបាល បាន​រក​ឃើញ​ថា កម្រិត​នៃ​ភាព​តាន​តឹង​នេះ​បាន​កើន​ឡើង​ជា​មធ្យម​ចំនួន ៤៥% នៅ​ក្នុង​ប្រទេស​កាណាដា ចិន និង​ប៉ាគីស្ថាន។

អ្នកស្រី Devora Kestel គឺជា​នាយក​ផ្នែក​សុខភាព​ផ្លូវចិត្ត និង​ការ​ប្រើប្រាស់​ថ្នាំ នៃ​អង្គការ​សុខ​ភាព​ពិភព​លោក។ អ្នកស្រី​និយាយ​ថា វិធានការ​ត្រូវតែ​ធ្វើ​ឡើង​ក្នុង​ពេល​នេះ ដើម្បី​ការពារ និង​លើក​កម្ពស់​ការ​ថែទាំ​សុខភាព​ផ្លូវ​ចិត្ត​សម្រាប់​ស្ថានភាព​ដែល​មាន​ស្រាប់​ដូច​នេះ។

អ្នកស្រី Kestel បាន​និយាយថា៖ «នេះ​គឺ​ជា​អ្វី​ដែល​ចាំបាច់​ត្រូវ​ធ្វើ​ក្នុង​អំឡុង​ពេល​មាន​វិបត្តិ​នេះ ដូច្នេះ​យើង​អាច​ការពារ​កុំ​ឲ្យ​រឿង​នេះ​កាន់​តែ​អាក្រក់​ទៅ នៅ​ពេល​អនាគត​ដ៏​ខ្លី​ខាង​មុខ...។ នៅ​គ្រប់​ប្រទស​ទាំង​អស់​ក្នុង​ពិភពលោក យើង​កំពុង​តែ​ជួប​ប្រទះ​នឹង​វិបត្តិ​សេដ្ឋកិច្ច ដែល​នឹង​ប៉ះ​ពាល់​ដល់​ប្រជាជន»។

អ្នកស្រី Kestel និយាយ​ថា បញ្ហា​សុខភាព​ផ្លូវ​ចិត្ត បាន​កើន​ឡើង​ក្នុង​អំឡុង​ពេល​មាន​វិបត្តិ​សេដ្ឋកិច្ច​ស្រដៀង​គ្នា​នេះ​ដែរ​កាល​ពី​អតីតកាល ដែល​បង្កឲ្យ​មាន​អត្រា​នៃ​ការ​ធ្វើ​អត្តឃាត​ខ្ពស់។

អនុសាសន៍​ចម្បង​មួយ​នៅ​ក្នុង​សេចក្ដី​សង្ខេប​គោលនយោបាយ​របស់​អគ្គលេខាធិការ​អង្គការ​សហប្រជាជាតិ​គឺ​ធានា​ឲ្យ​មាន​យ៉ាង​ទូលំ​ទូលាយ​នូវ​ការ​ផ្ដល់​សេវា​ថែទាំ​សុខភាព​ផ្លូវចិត្ត និង​ការ​គាំទ្រ​ផ្លូវចិត្ត ក្នុង​ស្ថានការណ៍​អាសន្ន​នានា។

អ្វី​ដែល​អាច​ទំនង​ជា​ធ្វើ​បាន​នៅ​ក្នុង​ប្រទេស​អភិវឌ្ឍន៍ ប្រហែល​ជា​មិន​អាច​ទៅ​រួច​ទេ​នៅ​ក្នុង​ប្រទេស​កំពុង​អភិវឌ្ឍន៍។ តួយ៉ាង អង្គការ​សុខភាព​ពិភពលោក​កត់​សម្គាល់​ថា មនុស្ស​ម្នាក់​ក្នុង​ចំណោម ៥ នាក់​នៅ​ក្នុង​ប្រទេស​ស៊ូដង់​ខាង​ត្បូង​មាន​បញ្ហា​ផ្លូវ​ចិត្ត ដែល​នៅ​ទី​នោះ​មាន​អ្នក​ជំនាញ [ខាង​សុខភាព​ផ្លូវចិត្ត​នេះ] តែ​ម្នាក់​ប៉ុណ្ណោះ​សម្រាប់​ព្យាបាល​មនុស្ស ៤ លាន​នាក់​ទូទាំង​ប្រទេស។

អ្នកស្រី Kestel ប្រាប់ VOA ថា អង្គការ​សុខភាព​ពិភព​លោក និង​ទីភ្នាក់ងារ​ផ្សេងៗ​ទៀត បាន​ធ្វើ​ការងារ​នេះ​អស់​រយៈពេល​រាប់​ឆ្នាំ​មក​ហើយ ដើម្បី​ពង្រឹង​សមត្ថភាព​របស់​ក្រុម​ការងារ​ដែល​មិន​មែន​ជា​អ្នក​ផ្ដល់​សេវា​សុខភាព​ផ្លូវ​ចិត្ត ឲ្យ​ធ្វើ​ការថែទាំ និង​ព្យាបាល​អ្នកជំងឺ។

អ្នកស្រី Kestel បាន​និយាយ​ថា៖ «យើង​កំពុង​លើក​កម្ពស់​ភាព​ជា​គំរូ​ក្នុង​សហគមន៍ ដែល​មេដឹក​នាំ​សហគមន៍​ខ្លះ ឬ​ក៏​ផ្នែក​ខ្លះ​នៅ​ក្នុង​សហគមន៍ ដូចជា​គ្រូ​ឱសថ​បូរាណ​ជា​ដើម ក្នុង​បរិបទ​ខ្លះ អាច​ទទួល​បាន​ចំណេះ​ដឹង និង​ការ​បណ្ដុះបណ្ដាល​មូល​ដ្ឋាន ដែល​ពួកគេ​ត្រូវការ ដើម្បី​ផ្ដល់​ការ​ព្យាបាល​ដល់​អ្នក​ជំងឺ»។

អង្គការ​សហប្រជាជាតិ​បាន​ឲ្យ​ដឹង​ថា របួស​ផ្លូវ​ចិត្ត​នឹង​នៅតែ​បន្ត​កើត​ឡើង ក្រោយ​ពេល​វិបត្តិ​ជំងឺ​កូវីដ១៩ ដែល​ជា​ជំងឺ​ដែល​បង្ក​ឡើង​ដោយ​វ៉ីរុស​កូរ៉ូណា​នេះ បញ្ចប់​ទៅ។ អង្គការ​សហប្រជាជាតិ​បាន​ជំរុញ​ឲ្យ​ប្រទេស​ទាំង​អស់​កែ​ទម្រង់ ពង្រឹង និង​វិនិយោគ​ថវិកា​បន្ថែម​ទៀត​ទៅ​ក្នុង​ប្រព័ន្ធ​ថែទាំ​សុខភាព​ផ្លូវ​ចិត្ត។ អង្គការ​នេះ​ក៏​បាន​ឲ្យ​ដឹង​ផង​ដែរ​ថា សេវា​ទាំង​នេះ​នឹង​ត្រូវការ​ចាំបាច់​ដើម្បី​ទ្រទ្រង់​ដល់​សង្គមជាតិ​នីមួយ​ៗ នៅ​ពេល​ដែល​ពួកគេ​ងើប​ឡើង​ពី​ព្រឹត្តិការណ៍​ដ៏​អាក្រក់​ជា​ប្រវត្តិ​សាស្ត្រ ដែល​បាន​កែ​ប្រែ​ជីវិត​រស់​នៅ​របស់​ប្រជាពលរដ្ឋ​ជុំវិញ​ពិភព​លោក​នេះ៕

ប្រែសម្រួលដោយ សឿន វឌ្ឍនា

តួលេខនៃករណីឆ្លងជំងឺកូវីដ១៩

XS
SM
MD
LG