លោកស្រីទីមួយរបស់សហរដ្ឋអាមេរិក Melania Trump បានដាក់បណ្តឹងបរិហាកេរ្តិ៍ឡើងវិញប្រឆាំងនឹងក្រុមហ៊ុនដែលបានបោះពុម្ភផ្សាយគេហទំព័រ Daily Mail ដោយនិយាយថាអត្ថបទដែលបានផ្សាយកាលពីខែសីហាឆ្នាំ២០១៦បានធ្វើឱ្យខូចខាតដល់សមត្ថភាពក្នុងការរកប្រាក់ជាច្រើនលានដុល្លារក្នុងអំឡុងពេលមួយដែលលោកស្រីអាចជាស្ត្រីដែលគេចង់ថតរូបបំផុតនៅក្នុងពិភពលោក។
អត្ថបទនោះបានផ្សាយពីការចោទប្រកាន់មិនពិតនៅក្នុងសៀវភៅមួយនិងទស្សនាវដ្តីមួយរបស់ប្រទេសស្លូវ៉ានីថាទីភ្នាក់ងារបង្ហាញម៉ូតដែលលោកស្រី ត្រាំ ធ្លាប់ធ្វើការគឺជាទីភ្នាក់ងារផ្តល់សេវាស្រ្តីកំដរភ្ញៀវ។
មេធាវីរបស់លោកស្រីត្រាំបានថ្លែងនៅក្នុងពាក្យបណ្តឹងដែលបានដាក់ប្តឹងនៅទីក្រុងញូវយ៉កថាអត្ថបទនោះបានពណ៌នាដោយមិនពិតថាលោកស្រីគឺជាស្ត្រីរកស៊ីផ្លូវភេទហើយថាគេហទំព័រ Daily Mail បានផ្សាយអត្ថបទនោះដោយដឹងថាការចោទប្រកាន់នោះ មិនពិតឬក៏មាន «ការធ្វេសប្រហែលក្នុងការស្រាវជ្រាវរកការពិត»។
ពាក្យបណ្តឹងនោះទាមទារប្រាក់សំណងចំនួន ១៥០លានដុល្លារចំពោះថ្លៃខូចខាតមុខរបររបស់លោកស្រីនិងការប៉ះពាល់ផ្លូវអារម្មណ៍។
នៅពេលដែលអត្ថបទនោះត្រូវផ្សាយផ្សព្វផ្សាយ ស្វាមីរបស់លោកស្រីគឺលោកដូណាល់ ត្រាំត្រូវបានគេតែងតាំងជាបេក្ខជនប្រធានាធិបតីសម្រាប់គណបក្សសាធារណរដ្ឋនៅឯមហាសន្និបាតគណបក្សដោយលោកស្រី Melania ក៏បានឡើងថ្លែងសុន្ទរកថាផងដែរ៕
