ក្រុមសហមេធាវីការពារក្តីឲ្យជនត្រូវចោទលោក មាស មុត នៅសាលាក្តីខ្មែរក្រហម កាលពីថ្ងៃចន្ទ បានសម្តែងការមិនពេញចិត្តនឹងដំណើរការនីតិវិធីរបស់អង្គបុរេជំនុំជម្រះនៃសាលាក្តីកូនកាត់នេះ ក្រោយពីសំណើរបស់ពួកគេត្រូវបានបដិសេធ។
នៅក្នុងសេចក្តីប្រកាសព័ត៌មានមួយចុះថ្ងៃទី១៩ ខែកក្កដា ឆ្នាំ២០២១ លោក អាង ឧត្តម និងលោក Michael Karnavas ដែលការពារក្តីឲ្យលោក មាស មុត អតីតមេបញ្ជាការកងទ័ពជើងទឹកខ្មែរក្រហមក្នុងសំណុំរឿង០០៣ បានសរសេរថា៖
«...បន្ទាប់ពីបានដាក់សំណើសុំធ្វើការឆ្លើយតបនោះមក អង្គបុរេជំនុំជម្រះ ដោយសង្ខេបបានបដិសេធសំណើនៅក្នុងសារអេឡិចត្រូនិក ដោយគ្រាន់តែរំឭកពីសេចក្តីណែនាំជាសារអេឡិចត្រូនិករបស់ខ្លួនថាមិនអនុញ្ញាតឲ្យមានការឆ្លើយតប»។
ការបដិសេធនេះកើតឡើងក្រោយពីអង្គបុរេជំនុំជម្រះ កាលពីខែមេសា ឆ្នាំ២០២១ បានពិចារណាថាដីកាដំណោះស្រាយពីរដែលផ្ទុយគ្នាចេញដោយសហចៅក្រមស៊ើបអង្កេតជាតិនិងអន្តរជាតិក្នុងសំណុំរឿងនេះ គឺខុសច្បាប់ហើយថាសេចក្តីសម្រេចរបស់អង្គបុរេជំនុំជម្រះនៅពេលនោះបិទផ្លូវតវ៉ា។ ការណ៍នេះ បានញ៉ាំងឲ្យសំណុំរឿង០០៣នេះ ត្រូវជាប់គាំង ដោយមិនប្រាកដថាតើសំណុំរឿងនេះ នឹងត្រូវរុញទៅជំនុំជម្រះឬទម្លាក់ចោលការចោទប្រកាន់។
សហចៅក្រមស៊ើបអង្កេតអន្តរជាតិបានចោទប្រកាន់លោក មាស មុត ពីបទឧក្រិដ្ឋកម្មប្រឆាំងមនុស្សជាតិ បទប្រល័យពូជសាសន៍ បទឧក្រិដ្ឋកម្មសង្គ្រាម និងបទល្មើសថ្នាក់ជាតិដែលស្ថិតនៅក្រោមច្បាប់របស់កម្ពុជាផងដែរ។ ប៉ុន្តែ សហចៅក្រមស៊ើបអង្កេតជាតិបានលើកលែងបទចោទប្រកាន់ប្រឆាំងនឹង លោកមាស មុត ដោយលើកហេតុផលថាអតីតមេទ័ពជើងទឹកខ្មែរក្រហមរូបនេះមិនស្ថិតក្រោមយុត្តាធិការបុគ្គលនៃសាលាក្តីខ្មែរក្រហមទេ។
ក្រៅពីរៀបរាប់ទឡ្ហីករណ៍ជាច្រើន សហមេធាវីការពារក្តីឲ្យលោក មាស មុត ក៏បានជំរុញឲ្យអង្គបុរេ ជំនុំជម្រះ«ត្រូវតែបំពេញកិច្ចឲ្យឆាប់រហ័ស នៅក្នុងការសម្រេចពីជោគវាសនានៃរឿងក្តី០០៣»។
ក្រុមមេធាវីបានបន្ថែមថា៖ «អង្គបុរេជំនុំជម្រះមិនអាចបោះបង់ចោលនូវទំនួលខុសត្រូវរបស់ខ្លួនក្នុងការប្រកាសទៅលើបញ្ហានៅចំពោះមុខខ្លួនវៀរលែងតែពួកគេមានបំណងនឹងផ្លាស់ប្តូរទំនួលខុសត្រូវនេះទៅអង្គជំនុំជម្រះតុលាការកំពូលឬទៅសហចៅក្រមស៊ើបអង្កេតឲ្យសម្រេចបញ្ចប់ជាស្ថាពរនូវដំណើរការនីតិវិធីនិងឲ្យបញ្ចប់ការភ័យខ្លាចលើការសម្រេចនៅក្នុងរឿងក្តី០០៣»។
ក្រៅពីសំណុំរឿង០០៣នេះ សាលាក្តីខ្មែរក្រហមនៅសល់សំណុំរឿង ០០៤ពាក់ព័ន្ធនឹងអតីតកម្មាភិបាលខ្មែរក្រហមម្នាក់ទៀតគឺលោក យឹម ទិត្យ ដែលសាលាក្តីកូនកាត់នេះនឹងត្រូវសម្រេចថាតើត្រូវបញ្ជូនសំណុំរឿងនេះទៅជំនុំជម្រះឬក៏ទម្លាក់ចោលបទចោទ៕
